9
Sug Bansa Pimiliˈ nu Megbebayaˈ
1 Naa, ki pekteluˈen ku kini, kagina sakupu ni Kristu, peglegintuuden ku, ndiˈu megbalus. Dig dialem delendeman ku kanaˈ balus, puˈ iini megbayaˈ dun sug Balakat nu Megbebayaˈ. 2 Miubaˈu gupia, maˈniin ndaˈi taman nu kelegenayu, sabaˈ nug lelaatu tu nga samau getaw Judea. 3 Puˈ saˈ sia mesuˈat, mauyaˈan ku naan siai ukuman nu Megbebayaˈ, mukaˈ pesuayu niin sia dini Kristu, sabayaˈ dinilan nga getaw Israel. 4 Ki nga getaw Israel kini, ilan su pimiliˈ nu Megbebayaˈ piglegetawanen. Kanugdiin binataˈen ilan, mukaˈ pinitaˈen dinilan su kelengas nu pegbayaˈen maitaˈ di tiagen. Pisadan nu Megbebayaˈ su nga ginepuˈay nilan, mukaˈ pinalintaanen ilan. Danilani tantu kektamuy, mukaˈ melauni pinasad nu Megbebayaˈ dinilan. 5 Megdedengegi nga ginepuˈay nilan, si nga Abraham. Samabansa dailan dema ni Kristu su meguit dig launanen, su Megbebayaˈ gempia pegdedengegen di ndaˈi gikteben. Amen.
6 Naa, ndiˈu metaluˈ puˈ mibulugan su pinasad nu Megbebayaˈ di nga getaw Israel kanugdiin. Iini teluˈen ku, kanaˈ nug launan getaw Israeli mpemiliˈ nu Megbebayaˈ. Duuni mpemiliˈ, duuni ndaˈ. 7 Mukaˈ dadema, kanaˈ bataˈ nu Megbebayaˈ sug launan nu sapuˈ ni Abraham, puˈ miktaluˈ su Megbebayaˈ dini Abraham kanugdiin, “Su sapuˈ nug bataˈ mu si Isaac, iin laaki pemilangen sapuˈ mu.” 8 Saˈitada, kanaˈ nu nga migigetaw di gasal getawig bataˈ nu Megbebayaˈ. Iini pemilangen tantu bataˈ nu Megbebayaˈ, su migigetaw puun tu pinasad nu Megbebayaˈ dini Abraham. 9 Puˈ su kepasaden, miktaluˈ su Megbebayaˈ dini Abraham kanugdiin, “Saˈ mateng nai gendaw, mpuliˈ dau dini. Megbataˈ dayun su sawa mu si Sara, bataˈlaki.”
10 Naa, sinangkaliˈ pa tanan, su sawa ni Isaac kiin, si Rebecca, migbedes gapid, bataˈ ni Isaac, ginepuˈay nami. 11-12 Saˈ sungu megbataˈ si Rebecca, miktaluˈ su Megbebayaˈ diniin, “Su gulangbataˈi mbaal sesuguˈen nu ngudanen.” Iini tinaluˈen dun, puˈ adun mbaluy su pigdelendemen mpinig su nga pimiliˈen. Su ketaluˈen dun, ndaˈ pailan pegigetaw, ndaˈ pai gulaula nilan melaat saˈ gempia, kaas misuunan ta kanaˈ puun tu gulaula nilan su kepemiliˈ dinilan duaˈ, segaga puun da tu ketenduˈ nu Megbebayaˈ. 13 Ndaˈ ba mesulat kanugdiin di Misulat Taluˈ nu Megbebayaˈ, “Pitailu si Jacob, laak misengayu si Esau.”
14 Taˈ alandun dayuni gempia ta teluˈen? Duun baig limbung nu Megbebayaˈ? Ndaˈidun lai! 15 Puˈ miktaluˈ su Megbebayaˈ dini Moises, “Lelaatan ku su mauyaˈan ku lelaatay, mukaˈ petailen ku su mauyaˈan ku petailen.” 16 Kaas misuunan ta puˈ su kepemiliˈ nu Megbebayaˈ, iin dai metau dun, kanaˈ nu mauyaˈan nu getaw, kanaˈ dadema nu tegelen, puˈ danug lelaat nu Megbebayaˈ. 17 Ndaˈ ba mesulat kanugdiin puˈ miktaluˈ su Megbebayaˈ ditu gadiˈ nu getaw Ehipto, “Iini pipeglegadiˈu yaˈa dun, adun paitaˈu su pegbayaˈu mukaˈ su ginuungu, puˈ dinaagu yaˈa. Keduaˈen, pipeglegadiˈu yaˈa puˈ adun megdedengegu di tibuukan lumbang, puun diniˈa.” 18 Kaas gempantek, lelaatan nu Megbebayaˈ su nga mauyaˈanen lelaatay, mukaˈ pebuklusenen dadema su nga mauyaˈanen pebuklusay.
Su Gangit mukaˈ sug Lelaat nu Megbebayaˈ
19 Naa, pinenggiˈ duun diniui sumaak dinaan, “Saˈ maˈantu, mauma dema besulen nu Megbebayaˈ di getaw sug dupanganen? Duun bai mekeguut tu mauyaˈan nu Megbebayaˈ?” 20 Sembagen ku dayun, “Naa su Megbebayaˈ, mpegbeluˈan mu bain, asal kilawan ka da? Mesuˈat ba sumaakig binaal ditu migbaal dun, ‘Mauma dema binaal mau maˈnini kini?’” 21 Pesemaan ku di getaw megdiun. Iin dai metau dun saˈ megbaal betangan melengas, saˈ betangan melemuˈ, sebugel daig lupaˈ.
22 Maˈantu dademai pinggulaula nu Megbebayaˈ. Pia mauyaˈanen pesuunen di nga getaw sug lengeten mukaˈ paitaˈen dinilan su ginuungen, mektigel gupia tu nga getaw piglengetanen, su ngag bantang pelebuˈan ginukumanen. 23 Mauyaˈanen dadema mpaitaˈ su kelengas nu pegbayaˈen. Puˈ su kelengas nu pegbayaˈen, bigay na gupia dinita, ita ngag bantang lelaatanen, ki ngag daansamaˈ pingandamen mekedawat tu kelengasen. 24 Puˈ itai nga ginggaten sumakup diniin, ita nga getaw Judea mukaˈ nga kanaˈ getaw Judea dadema. 25 Ndaˈ ba mesulat kanugdiin nu pimuunanen si Oseas,
“Su nga getaw kanaˈu pailan piglegetawan,
paingalan ku dun ‘piglegetawan ku nailan’.
Sug bansa kanaˈu pa mauyaˈan,
paingalan ku dun, mauyaˈan ku na.”
26 Duun pa pagidi sinulat ni Oseas, laungen,
“Diag benwa tandaˈ tiluˈan nu Megbebayaˈ su nga getaw, ‘Ndaˈig labetu diniu,’
dia pa pagid paingalanen dinilan, ‘ngag bataˈ nu tantu Megbebayaˈ’.”
27 Si Isaias pa pagid, ndaˈen ba pelaktag kanugdiin, laungen, “Pia melaun gupiai sapuˈ ni Israel, maaˈ na kelaun nug lubek tu geksid dagat, mbilang dai megawen.” 28 Puˈ ndaˈ peglugbad su ginukuman nu Megbebayaˈ di tibaˈan getaw, puˈ penggulaulaanen dedaliˈ. 29 Kaas maˈniaig duma misulat tu pimuun nu Megbebayaˈ pedaan dini Isaias, laungen, “Saˈ kanaˈ nug lelaat nu Megbebayaˈ, su megbayaˈ Kaunutan, migelaˈ sia petayay kig launan ta getaw Israel, maaˈ na nu getaw tug lunsud Sodoma mukaˈ ditu Gomora, laak duuni sinawaden bataˈ ta.”
Su nga Sapuˈ ni Israel mukaˈ su Gempia Petenday
30 Taˈ alandun dayuni gempia ta teluˈen? Ki nga kanaˈ getaw Judea, duun dinilani pimilang nu Megbebayaˈ mekesuun sabaˈ nu kesalig nilan diniin, bisan ndaˈ ilan penamal meksikesuun. 31 Laak dagid su nga sapuˈ ni Israel, pia pinemalan nilan dunutay su Palinta nu Megbebayaˈ, ndaˈ ilan mpemilang mekesuun, 32 puˈ su kegdunut nilan tu Palinta, ndaˈ nilan sekatay tu kesalig dini Kristu, puˈ sikat nilan tu tegel nilan. Saˈitada, maˈniin ilan midapal tug batu melemu meseknun. 33 Puˈ ndaˈ ba mesulat kanugdiin di Misulat Taluˈ nu Megbebayaˈ,
“Pektalentenay niu ini, betangen kuig batu meseknun ditug benwa Sion.
Mekesulaub tu getaw kig batu kini.
Laak adin su sumalig diniin, ndiˈ mekpelilu.”