11
Kig Lelaat nu Megbebayaˈ tu nga Sapuˈ ni Israel
1 Naa kagina maˈantu, saaken ku dayun, ki nga sapuˈ ni Israel, su nga piglegetawan nu Megbebayaˈ, tiliudan bailan nu Megbebayaˈ? Ndiˈ lai mesuˈat! Puˈ pia naan, getaw Israel dau dema maaˈ da dinilan. Sapuˈu ni Abraham mukaˈ kausebaanu ni Benjamin. 2 Su nga getaw tinduˈen sumakup diniin su ndaˈ pa mbaali gekleb langit buˈ lupaˈ, ndiˈ meteliudan nu Megbebayaˈ. Ndaˈ ba niu mesuunay su tinaluˈ ni Elias, saˈ dengatenen su nga sapuˈ ni Israel ditu Megbebayaˈ, kaliˈ pektaluˈ, 3 “Uu Megbebayaˈ, pimatay nilan su nga pimuunan mu sinuguˈ mu megwali dinilan. Gibaˈ nilan su nga gentudan gilak diniˈa. Naan laaki mibilin mektamuy diniˈa, mukaˈ mauyaˈan nilan petain dau dema sia.” 4 Laak kaliˈ sembag su Megbebayaˈ, “Duun pai pinaasu pitu ngibu tawan getaw, ndaˈu ilan mainsan pepengedapay tu sagya diwata, si Baˈal.” 5 Maˈantu dadema nandaw, su nga getaw Israel, ndaˈ dailan gelaˈ pemilas tu Megbebayaˈ. Puˈ sabaˈ nu tulungen, duuni tinduˈen sumakup diniin, laak metuud, miniwatak dailan. 6 Naa, kagina mitenduˈen ilan puun dig lelaaten, kanaˈ sekat tu gulaula nilan. Puˈ saˈ sekat tu gulaula nu getawi tulung nu Megbebayaˈ, kanaˈ na sia tantu tulung.
7 Mendadi, maˈniniˈ. Su nga sapuˈ ni Israel, ndaˈ ilan gelaˈ mekebian tu kegawen dinilan nu Megbebayaˈ, bisan mauyaˈan nilan sia gupia. Iin laaki mikebian dun, su mitenduˈ nu Megbebayaˈ. Meliang dailan. Su ngag duma, ndaˈ penembaˈ tu keˈenggat dinilan nu Megbebayaˈ. 8 Ndaˈ ba mesulat kanugdiin, “Pitegas nu Megbebayaˈ su gulu nilan. Sampay nandaw, ndiˈ ilan mekengitaˈ mukaˈ ndiˈ ilan mekedengeg.” 9 Si David, ndaˈ ba pektaluˈ kanugdiin,
“Kagina pipeglekebibu ilan gupia nu Megbebayaˈ, laung nilan dun, ndaˈen pengebetay ki ngag limbung nilan.
Su keglekebibu nilan, mekegdaang pa dinilan, iin dayuni mbaal pelabuˈ dinilan.
10 Subay mbuta ilan adun ndiˈ ilan mekengitaˈ,
mukaˈ subay mbektut ilan sabaˈ nu gembagel kelegenay peguiten nilan.”
11 Saaken ku pa pagid, kagina maˈantu, ndaˈ metuuk di telinga nu nga getaw Judea su metuud mekatag dini Kristu, mbeleng bailan? Ndiˈ dadema lai mesuˈat! Kagina memilas su nga getaw Judea, naa su nga kanaˈ getaw Judea, mbianan na nilan su keglegawen dinilan nu Megbebayaˈ. Iini mipenggulaula dun, puˈ adun mengimbegu su nga getaw Judea tu kegawen nu nga kanaˈ getaw Judea. 12 Naa, gembageli kepianan dig launan getaw mikpuun di kemilas nu nga getaw Judea. Pipianan gupia nu Megebayaˈ su nga kanaˈ getaw Judea puˈ ndaˈ medawat nu nga getaw Judea su kepepianen sia dig delendeman nilan. Labi pa pepianayen sug launan getaw, saˈ metektub nai kelaun nu nga getaw Judea sumakup dini Kristu ditug binayaˈ gebii buˈ gendaw.
Su Kegawen nu nga Kanaˈ Getaw Judea
13 Yamu nga kanaˈ getaw Judea, taman taluˈu diniu, kagina mitenduˈu nu Megbebayaˈ peneliganu niin, adun ukitan ku amu mekatag dini Kristu, liliagu gupia tu sinuguˈan dinaan nu Megbebayaˈ. Menamalu dumunut dun, 14 puˈ adun saˈ mesuˈat, pepengimbeguun ku su samau getaw Judea, adun duun dinilani megawen. 15 Puˈ saˈ tiliudan nu Megbebayaˈ su nga getaw Judea, miseksud diniin su ngag lain bansa dinig lumbang. Saˈ mpeduma puliˈi nga getaw Judea, maˈniin na metubuˈ puliˈ su nga minatay.
16 Mendadi ki nga getaw Judea, kagina sakup nu Megbebayaˈ su nga ginepuˈay nilan, si nga Abraham, sakupen dadema su nga sapuˈ nilan. Pesemaan ku ilan di pan pengilak tu Megbebayaˈ. Saˈ begay nu getaw tu Megbebayaˈi sailasan di pan, daniin su tibuuk pan. Mukaˈ maˈnia dademai gayu. Saˈ begay nu getaw tu Megbebayaˈi gangeten, daniin dadema su nga panganen. 17 Naa, ki nga getaw Judea, pesemaan ku ilan pa pagid tu panga nu gayu olibo. Duuni panganen pinutuk na, adun sumpat duni panga nu guliˈ olibo. Yamu nga kanaˈ getaw Judeai panga nu guliˈ, puˈ piduma namu nu Megbebayaˈ tu melembuˈ ketubuˈ nu gayu pimula, saˈitada su kepepia nu Megbebayaˈ tu nga getaw Judea. 18 Laak dagid, subay ndiˈ amu mekpelabawlabaw di ngag daan panga nu gayu olibo. Ndiˈ amu mangyaˈ dun, puˈ panga laak amu. Kanaˈ amui mekepepagen tu gangeten, su gangeteni mekepepagen diniu.
19 Naa, pinenggiˈ duuni mektaluˈ dayun dinaan, “Metuud, laak iini pinutuk dun su ngag daan panga kia, puˈ adun sumpatan nami.” 20 Sembagen ku, metuud daan, yamui suminukli di nga getaw Judea. Laak dagid iini teliudan ilan dun nu Megbebayaˈ, puˈ ndaˈ ilan pekpetuud dini Kristu. Yamu pasiˈ, iini ndaˈ amu teliuday dun, puˈ suminalig amu diniin. Pia maˈantu, ndiˈ niu pengangyaˈ, subay mendek amu. 21 Puˈ saˈ pinutuk nu Megbebayaˈ su tantu panga, saˈitada su nga getaw Judea, batik niu dun ba, saˈ metalin amu, saˈ ndiˈ amu menamal sumalig diniin, ndiˈ amu dadema mputuk? 22 Subay pektalentenan niu ini, sug betad nu Megbebayaˈ, ndaˈi gikteb nug lelaaten tu nga getaw lilaatanen, mukaˈ ndaˈi tamanen su kekpetugaˈen tu getaw pitugaˈen. Petugaˈenen gupia su nga mimilas kia getaw Judea. Laak yamu, penemalan amu niin lelaatay, saˈ menamal amu sumalig tug lelaaten. Dagid, saˈ ndiˈ amu menamal sumalig diniin, mesuˈat putuken amu niin, saˈitada teliudan amu niin. 23 Saˈ metuudan dun dadema su nga getaw Judea, sumpat ilan puliˈ nu Megbebayaˈ tu pinutukanen dun. Puˈ ndaˈi ndiˈ megaga nu Megbebayaˈ uliˈay. 24 Yamu nga kanaˈ getaw Judea, pisamau amu di panga pinutuk di guliˈ olibo. Sinumpat namu tu puun nu tantu pimula, pia kanaˈ mbantang sumpaten. Ki nga getaw Judea, melemu pailan sumpaten puliˈ nu Megbebayaˈ tu puunen, puˈ ilani maaˈ nu tantu panga nu pimula.
Melelaat su Megbebayaˈ tug Launan Getaw
25 Naa, Mingumpated, kig delendeman nu Megbebayaˈ daansamaˈ pigbuninen, buasan ku na diniu, adun ndiˈ niu delendemen puˈ metaas pai sinuunan niu. Iinig delendeman nu Megbebayaˈ, puˈ pia duuni nga getaw Israel mimilas diniin, ndiˈ maulayuni kemilas nilan, puˈ memilas ilan sampay laak megelaˈ sumakupi nga kanaˈ getaw Judea tinduˈ nu Megbebayaˈ sumakup diniin. 26 Megelaˈ dayun megawen su tibaˈan sapuˈ ni Israel. Ndaˈ ba mesulat kanugdiin,
“Ki Meglegawen, genat tu Sion, sug benwa nu nga getaw Judea.
Belengenen dayun sug launan melaat gulaula nu nga sapuˈ ni Israel, puun tu kemilas nilan tu Megbebayaˈ.
27 Tinaluˈen puˈ menuud su pinasaden dinilan
puˈ tubusenen su nga salaˈ nilan.”
28 Kagina pimilas nu nga getaw Judea su Gempia Petenday mekatag dini Kristu, kuminuntra ilan tu Megbebayaˈ, kaas megawen amu nga kanaˈ getaw Judea. Laak kagina tinduˈ ilan nu Megbebayaˈ bansanen, pitailen ilan, adun menuud su pinasaden tu nga ginepuˈay nilan. 29 Puˈ ndiˈ mpalin sug delendeman nu Megbebayaˈ. Su nga getaw pimiliˈen, tenduˈenen tuˈu. Su nga getaw ginggaten pepiananen, pepiananen tuˈu. 30 Sug daan pigbetad niu, pimilas niu gupia su Megbebayaˈ. Nandaw pasiˈ, mibianan na niu sug lelaaten puun tu kemilas nu nga getaw Judea. 31 Maˈnia dademai mbianan nilan. Nandaw mimilas ilan, kaas mbianan niu sug lelaat nu Megbebayaˈ. Lemaˈ denlag mbianan pa nilan sug lelaaten ki mibianan na niu. 32 Puˈ bigay na nu Megbebayaˈ su tibaˈan getaw mbalud tu kemilas nilan, adun mbulus sug lelaaten dig launan nilan.
Pededengegen ta su Megbebayaˈ
33 Ki Megbebayaˈ, gembagel gupiai tulungen di nga getaw! Su kekesuunen, ndaˈi gikteben. Medalem dadema gupiai telisebutayen. Su pigdelendemen, ndaˈ mesabut nu getaw, pia sala tawan. Ndaˈiduni getaw mekesabut tug betaden! 34 Ndaˈ ba mesulat kanugdiin,
“Su Kaunutan ta, taˈ taway dun mai mikesuun tug delendemanen?
Taˈ taway dun mai mikektituluˈ diniin?
35 Ndaˈi kulangen, pia maikaˈ.
Kaas, taˈ taway dun mai mikegbegay diniin,
adun sia mesuliˈanen?”
36 Puˈ kanugdiin, ndaˈiduni binaal, iini minaal dun. Nandaw, ndaˈiduni mekuleg, iini megbayaˈ dun. Mukaˈ pa pagid, launan binaalen, iini binaalen dun, penemalan gusay pegbesaay su Megbebayaˈ. Kaas, enalen tain mukaˈ pegbesaan ta di ndaˈi gikteben. Amen.