¹ Kaas yamu nga Mingumpated, duuni penengiin ku diniu. Pegwakil niuig lawas niu tu Megbebayaˈ maaˈ nu guliden pektetubuˈ pa, gilak tu Megbebayaˈ mukaˈ leliagen dun iin, puˈ melelaat gupia su Megbebayaˈ dinita. Kiai tantu kektamuy tu Megbebayaˈ. ² Ndiˈ niu dunutay sug betad nu kinilawan dig lumbang kini. Tumuˈ pepelinen niuig delendeman niu tu Megbebayaˈ, adun pebegunenig betad dig delendeman niu. Mesuunan niu dayun su mauyaˈan nu Megbebayaˈ, su melengas, sug leliagen dun iin mukaˈ su tampusan kepianan.

³ Naa, kagina tinulungu nu Megbebayaˈ puˈ bigayanu niin gelalu, iini pelaktagu diniu, saladuaˈ, ndiˈ niu pemilangayig lawas niu metaas pa di mbantang delendemen niu. Laak betang niu di ginaa niu ki sinukalay. Pebantang niui ketaas nug lawas niu tu tinawan bigay diniu nu Megbebayaˈ mekpuun di kekpetuud niu. ⁴ Puˈ su ngag lawas ta, melauni sengkapanen, ndiˈ ba? Mukaˈ lainlaini kegamit ta dun su nga sengkapan. ⁵ Maˈnia daita dema, puˈ bisan melaun ita sakup ni Kristu, maˈniin salabuuk lawas ita suminalabuuk dini Kristu, mikpingkit ita, launan ta, adun bisan migininisan ita, mibaluy ita salabuuk lawas. ⁶ Mendadi diadia dinita, lainlaini tinawanen bigay nu Megbebayaˈ mekpuun di tulungen dinita. Su tinawan ta, subay peguaˈen ta. Naa saˈ upama iinig bigay diniˈa, metawa megwali taluˈ nu Megbebayaˈ, subay megwalia lepeng tu kesalig mu. ⁷ Saˈ pasiˈ metawa megabang, megabanga gusay. Su metau mekpetuˈun, subay menamal mekpetuˈun. ⁸ Saˈ su mbantang mengulikseg tug dumanen, subay penguliksegenen gupia. Su metau megbegay, subay megbegay di ndaˈi geginugunen dun. Su meglekaunutan, subay ndiˈ megliawliaw. Adin su melelaat tug dumanen, subay tembusanen sug lelaaten.

⁹ Maˈantu, subay ndaˈi metaas mbabaˈ di kekpetail niu di nga samataw niu.

Teliuday niu su melaaten, mukaˈ pektalentenay niu su melengas.

¹⁰ Pekpinetailay amu lepeng tu petailan nu kepetedan sakup ni Kristu. Subay megbinesaay amu gupia.

¹¹ Subay ektak niui tegel niu mengimbaal, mukaˈ gelaˈ niui ginaa niu di kektamuy niu tu Kaunutan ta Megbebayaˈ.

¹² Subay leliagen amu sabaˈ nu pedetengen ta puˈ pepianan ita gupia nu Megbebayaˈ ditug binayaˈ gebii buˈ gendaw.

Pektigel amu di kelegenay niu.

Penamal amu menenabi.

¹³ Su nga piglegetawan nu Megbebayaˈ mekelelaatlelaati kebetangen, pemegayay niu, mukaˈ su nga meguliug diniu, dedialay niu.

¹⁴ Naa su mekpeleget diniu, penenebiay niu, adun pepianan ilan nu Megbebayaˈ. Pepianay niu ilan, ndiˈ niu ilan tuyuday.

¹⁵ Saˈ duuni liliag gupia, salabuuk amu tug leliagen. Saˈ duuni mengelaw, salabuuk damu dema tu gelawen.

¹⁶ Subay peksama niui kektagikul niu tu ngag duma niu. Ndiˈ amu mekpelabawlabaw. Su mekpebabaˈ dig lawasen, telimaˈ niu. Ndiˈ niu delendemay puˈ metaas pai sinuunan niu.

¹⁷ Saˈ duuni mekpelaat diniu, ndiˈ niu iin suliˈay melaat. Iini penggulaulaan niu, sug delendeman nug launan getaw melengas.

¹⁸ Peksalabuuk amu gikteb nu megaga niu.

¹⁹ Uu Mingumpated, ndiˈ amu suliˈ, bisan taˈ alanduni kelaatan niu. Pegwakil niu tu Megbebayaˈ ki suliˈ dun, puˈ ndaˈ ba mesulat di Misulat Taluˈen, “Kaliˈ pektaluˈ su Kaunutan Megbebayaˈ, ‘Naani metau sumuliˈ tu nga getaw mekpelaat dig dumanen.’” ²⁰ Tumuˈ maaˈ danu sala misulat kanugdiin, laungen, “Saˈ duuni kumuntra diniˈa megutem, paan mu iin. Saˈ kuaun, painum mu. Saˈ maˈniai penggulaulaan mu diniin, mpiid dayun gupia ditu pinggulaulanen diniˈa.” ²¹ Ndiˈ amu mekpedaag di melaat. Pedaag niu su melengas tu melaaten.