¹ Naa, ki nga getaw pipegbayaˈ nu gubirnu meglekaunutan di ngag duma, subay petuuden tailan, launan ta, saladuaˈ, puˈ ndaˈiduni megbayaˈ, su Megbebayaˈi pigenatanen. Su nga meguit di nga getaw nandaw, pitindeg nu Megbebayaˈ. ² Kaas adin su memilas dinilan, pemilasenen su tinindeg nu Megbebayaˈ, mukaˈ mpelebuˈanenig lawasen. ³ Puˈ ndiˈ mendek di nga peguit di getaw su nga menggulaula melengas. Mendek dun su nga melaati gulaulanen. Subay penggulaulaan niu su melengas, adun ndiˈ namu mendek di meguit tu getaw. Enalen amu nilan dayun, ⁴ puˈ sesuguˈen ilan nu Megbebayaˈ, adun pepianan amu nilan. Saˈ upama melaat sungkini gulaula niu, tumuˈ mendek amu dun, puˈ duun daani pegbayaˈ nilan bigay nu Megbebayaˈ silutan nilan su nga mikesalaˈ. ⁵ Kaas, iini dunutan niu dun su nga meguit tu getaw, adun ndaˈi pegbiksuˈan niu, keduaˈen, sabaˈ nu silut pigwakil nu Megbebayaˈ dinilan. ⁶ Iin dademai biadan niu dun su mendawat buis, puˈ saˈ metembusan nilan su ketenduˈ dinilan, pegebangan nilan su Megbebayaˈ. ⁷ Mendadi, pemegay niu di nga meguit tu getaw su mbantang begay. Saˈ su nga mendawat buis, subay megbuis amu dun. Saˈ su mbantang pegbesaan, subay pegbesaan niu ilan gupia, launan nilan.

⁸ Ndiˈ amu peglibed di gutang niu. Daal da laaki mbayaˈ utangen niu, ki keglinelaatay niu. Puˈ adin su getaw melelaat tu samatawen, megelaˈen dunutay su Palinta nu Megbebayaˈ. ⁹ Puˈ duuni nga pinalinta maˈniniˈ, “Ndiˈa pegdusa, ndiˈa pekpatay, ndiˈa pegdaaw, ndiˈa mayak tug danug samataw mu,” mukaˈ duun pa lain pinalinta. Lumbus mitingeb tu peneluˈen, laungen, “Subay pekpetaila tu ngag duma mu maaˈ nu petail mu dig lawas mu.” ¹⁰ Saˈ duuni getaw lelaatan niu, ndiˈ niu dayun pelaatan, ndiˈ ba? Saˈ melelaat ita tug duma ta, megelaˈ ta dunutay su tibuuk Palinta nu Megbebayaˈ.

¹¹ Naa iin pa pagidi penggulaulaan niu dun, puˈ misuunan niu sungu na matengi gendaw megawen ita, kaas gempia na niu pektenudan, saˈitada belengen niu sug betad niu mekpetuyang di ginaa niu. Puˈ su bekna kekpetuud ta dini Kristu, maiben pa matengi gendaw megawen ita. Nandaw, kanaˈ na maiben. ¹² Iini kebetang ta dinig lumbang, maˈniin ita medeleman maaˈ mitulayuni gebii, laak sungu mpupusi gebii. Sungu megendaw, puˈ kanaˈ na maiben mateng puliˈ su Kaunutan ta. Kaas sug betad ta mbantang di medeleman, belengen ta. Iini penggulaulaan ta, su gempia, maaˈ nu sundalu misangkap na lumumpak saˈ medelagan na. ¹³ Subay pepian ta su gulaula ta, maaˈ nu getaw midelagan nu gendaw. Ndiˈ mpia menamal amu megbebulek mukaˈ megimbeluˈan, ndiˈ damu dema mpia megdusa, ndiˈ amu pa pagid mpia meksinualay mukaˈ meksesigiay. ¹⁴ Tumuˈ pa penunggilingay niu sug betad nu Kaunutan ta si Isukristu. Ndiˈ niu dunutay sug betad niu kinilawan, adun ndiˈ niu malap su melaat gayak niu dun.