¹ Naa, duun tantui midengegu pu' duun daw pelum diniui migdusa gupia! Melaat lai daan gupia, pu' bisan dia nga kana' mekpetuud ditu Megbebaya', nda'i megdusa ma'antu. Pu' duun dawig duma niu, pinggulaulanen tu gina'ina'en, su sawa nu gama'en, mekepiidpiid gupia. ² Bisan ma'antu, megangya' pamu gusay! Tumu' pa sia melegenan amu! Naa, talu'u diniu, subay pua'en niu ki getaw kiin di pikumpungan niu. ³ Danaan, bisan kini dau melayu' diniu, ki ginau, ma'niin da ditu niu. Kagina ditu nai ginau, muka' pigwekilanu padun nu Kaunutan ta si Isus, pigdelendemu na su gempia ginukuman di getaw kia minggulaula melaat. ⁴ Naa, subay mekumpung amu, dayun sa' mekumpung namu, naan, ma'niin dia dau niu. Naa, kagina bigayan ita nu Kaunutan ta si Isus di pegbaya'en, ⁵ utidan niu dayun ki getaw kia di pikumpungan niu, pegwakil niu na dini Satanas, adun mpeglaatanig lawasen. Iini baalen niu dun adun megawen su gimuuden di gendaw mukum su Kaunutan ta si Isus tu tiba'an getaw.

⁶ Mendadi mauma dema mangya' amu? Ndi' mpia! Suunan niu su pentelu'en laung, “Sa' duuni maika' petulin pan melamug di pan, ndi' maiben tumulini tibuuk pan.” ⁷ Naa sa' ma'antu, subay ua'en niu sug daan petulin pan, sa'itada sug daan pigbetad niu mekesala'. Dayun sa' mekpetuud amu tu tinitulu'u kini, ma'niin namu nug begu pan nda'i petulin dun, su ma'aan nu getaw Israel dig Lumpuk nilan gindan ditug Liniusan. Naa misuunan ku pu' inugasan namu daan di sala'. Pu' si Kristu, su maa' nu nati karniru baalen guliden dig Lumpuk tug Liniusan, mibaal na guliden ta, kaas mibayad nai sala' ta. ⁸ Kagina ma'antu, subay metubu' ita di nda'ig limbung ta, ma'niin meglumpuk ita Lumpuk tug Liniusan, pu' nda'iduni petulin pan linamug di pan ta, sa'itada, nda'idun nai melaat delendeman ta muka' dupangan ta, pu' iin naig dunutan ta, su gempia delendeman ta muka' su metuud.

⁹ Naa su sala sulat piwitu diniu, mitalu'u diniu pu' ndi' mpia megduma amu lelayun di nga getaw megdusa. ¹⁰ Laak sa' suminulatu ma'antu, su misugatan ku dun, kana' nu nga kilawan nda' pekpetuud, nga megdusa, nga mesaku, nga tulisan, sa' su nga mektamuy tug ledawan. Pu' sa' pegliaun niu sia ilan, subay megawa' amu sia dig lumbang kini. ¹¹ Iin pasi'i sinulatu dun, pu' adun ndi' amu megduma di getaw laungen memated dinita samasakup ta dini Kristu, asa megdusa da gusay, sa' mesaku, sa' mektamuy tug ledawan, sa' menampalaksa, sa' megbebulek, sa' tulisan. Bisan dungan laak ita dinilan maan, ndi' lai mpia. ^12-13 Dagid su nga getaw dig liu, sa'itada su nga sama kilawan ta nda' pasi' pekpetuud dini Kristu, kana'u metau mukum dun. Mukum dun su Megbebaya'. Laak dagid, subay ukumen ta su penggulaula nu nga samasakup ta, pu' nda' ba mesulat di Misulat Talu' nu Megbebaya', “Su samasakup niu lelayun melaati gulaulanen, subay utidan niu di pikumpungan niu.”