Ki sulat kini, iin nai keduaˈ sinulat ni Pablo pingumbilin dinita piwiten ditu nga sakup ni Kristu diag lunsud Corinto.

Naa si Pablo, tubusen puitay sug bekna sulaten ditu nga getaw Corinto, milibuleng iin saˈ pinembaˈ nu nga sakup dia ki sulaten kia, saˈ ndaˈ. Laak ndaˈ maiben, midia ni Pablo si Tito, sala di ngag limbangen, genat ditug lunsud Corinto. Si Tito, inukitanen si Pablo puˈ pinembaˈ tuˈu nu nga sakup dia Corinto su sulaten. Laak inukit ni Tito pa pagid puˈ duuni mikpetuˈun dia Corinto sayep, kuminuntra dini Pablo. Laung daw nu mikpetuˈun kia puˈ kanaˈ daw tantu peneligan ni Kristu si Pablo. Kaas iini piwit dun ni Pablo ki keduaˈ sulaten kini, puˈ adun pigwalinen di nga getaw Corinto su puun nu keksuden dinilan. Keduaˈen, pinengi ni Pablo dinilan mekpungun ilan gamut puiten ditu nga milegenan sakup tug benwa Judea. Mukaˈ pigwalinen dinilan ki ketenduˈ diniin ni Kristu peneliganen.

Naa, mekatag dig duma mibianan ni Pablo, duuni mbasa pa dia sala libru mpeduma dig Begu Pasadkini, Ki nga Pinggulaula nu nga Peneligan ni Isukristu9.1-30. Mekatag di pikumpungan nu nga sakup ni Kristu diag lunsud Corinto, duuni mbasa dia Nga Pinggulaula 18.1-11.