¹ Naa mendadi, sembagen ku namu mekatag di sinaak niu dia sinulat niu.

Sa' sug laki, gempia da ndi' megawid duayan. ² Laak kagina melauni megdusa nemun, libun laki, diadia gempia duuni sawanen, adun ndi' mpegdaangan. ³ Laak ki nga megawid na duayan, libun laki, subay iini baalenen sug betad meksenlangan. ⁴ Pu' kana' nug libuni megbaya' dig lawasen, pu' megbaya' dun su sawanen. Miksama dademaig laki, kana' iini megbaya' dig lawasen, pu' iini megbaya' dun su sawanen. ⁵ Diadia, subay ndi'en pekpingetani sawanen. Laak taang dun adun menamal amu menenabi nga santa' gebii, mesu'at mekpiningetay amu, sa' meksinengu'ay amu. Dayun, subay puli'an niu gusayig betad niu megduay, adun ndi' amu mpegdaangan ni Satanas, saba' ndi' amu sia metau megbaya' di gayak niu.

⁶ Iini mitalu'u dun, adun mbuangi kegawid niu duayan, kana' nu pinalinta. ⁷ Mauya'an ku tantu, penunggilingan niau sia, nda'i sawau, laak misuunan ku, bigayan nu Megbebaya' su nga sakupen, saladua', tinawan, bisan su tinawan mektigel di nda'i sawanen. Diadia lain tinawani bigay dun nu Megbebaya'.

⁸ Naa yamu nu nga nda' pa pegawid duayan, libun laki, muka' yamu nu nga mibalu na, talu'u diniu, tumu' maulayun damu gusay nda'i sawa niu, ma'niin dinaan. ⁹ Dagid sa' ndi' amu pasi' metau mektigel di gayak niu, subay megawid amu duayan, pu' tumu' pa megawid amu duayan, sabaya' melamug di guned niu su gayak niu. ¹⁰ Yamu nu nga megawid na duayan, palintau diniu, ndi' mesu'at belengen nug libun su sawanen. Kana'u delendeman laak, pu' pinalinta nu Kaunutan. ¹¹ Laak, sa' upama duunig libun belengeneni sawanen, ndi' na mpia penginsuaan puli'. Mesu'at da, sa' megeksud ilan nug daan sawanen. Palintau dadema diniu pu' subay ndi' belengen nug laki su sawanen.

¹² Naa yamu nu ngag duma pelum, talu'u diniu sa' upama duunig laki mikpetuud na, laak nda' pa pekpetuud su sawanen, asa sengu'en nu sawanen su keksala nilan gusay megbenwa, subay ndi'en belengen. (Laak danaan da telu'en, kana' nug daansama' talu' nu Kaunutan ta.) ¹³ Naa ma'antu dadema, sa' upama duunig libun mekpetuud na, laak su sawanen nda' pa, dayun sengu'en nu sawanen su keksala pa nilan gusay megbenwa, subay ndi'en belengen. ¹⁴ Pu' su sawa nu getaw mekpetuud na dini Isus, pia nda' pa pekpetuud, metelima' nu Megbebaya' saba' nug dumanen mekpetuud na, pu' dialem senlangan pailan gusay. Pu' sa' kana' ma'antu, su nga gembata' nilan, ndi' metelima' nu Megbebaya'. Laak kagina ma'antu, metelima'en dailan dema. ¹⁵ Dagid, sa' mauya'an nu kana' mekpetuud belengenen su sawanen mekpetuud na, mesu'at buka' dun su mauya'anen. Sa' kiai mbianan, nda'i megbelabag dun, pu' inggat amu nu Megbebaya' metubu' amu di kelinaw. ¹⁶ Pu' ya'a mekpetuuda na, nda' mu mesuunay sa' magak mui sawa mu mekpetuud pa ditu Kaunutan adun megawen dadema.

¹⁷ Mendadi saladua' diniu, pia ta' alanduni kebetangen su kegenggat diniin nu Megbebaya' sumakup diniin, subay iin gusayi kebetangen, lepeng tu kebetang bigay diniin nu Kaunutan. Kiniig betad titulu'u dig lumaun pikumpungan nu sakup. ¹⁸ Su kedawat mu di kegenggat dini'a nu Megbebaya', alandun mai kebetang mu? Mitu'usan ka na tu'us nu nga getaw Judea? Titulu'u dini'a, ndi' mu belengay su tu'us kiin. Laak dagid sa' nda'a metu'usay tu'us nu nga getaw Judea, ndi'a na kambat tu'usan. ¹⁹ Pu' sa' mitu'usan ka, sa' nda', nda'i pantagen. Pu' iini pemilangen nu Megbebaya', su kekpetuud ta tu Palintanen. ²⁰ Kaas diadia subay megbatag da gusayi kebetangen su kegenggat diniin nu Megbebaya' sumakup diniin. ²¹ Gulipen ka ba su kegenggat dini'a? Naa petuyangen na. Laak sa' mesu'at lekaten ka, subay mekpelekata. ²² Pu' ma'niin ma, adin su gulipen su kegenggat diniin nu Kaunutan, iini pemilangen nu Kaunutan biluy na. Ma'nia dademai getaw kana' gulipen su kegenggat diniin, pemilangen ni Kristu gulipenen na. ²³ Ma'niin amu daan nu gulipenen, pu' gembagel gupiaig bayad nu Megbebaya' su kesaluyen diniu. Kaas ndi' mpia mekpaulipen amu tu samataw niu. ²⁴ Kaas, uu Mingumpated, pia kenduni kebetang niu su kedawat niu di kegenggat diniu nu Megbebaya', subay iin gusayi kebetang niu, sa' sumalabuuk amu tu Megbebaya'.

²⁵ Naa su nga nda' pa pegawid duayan, nda'i pinalinta nu Kaunutan mekatag dinilan. Laak sulatu diniu sug delendeman ku, pu' puun tug lelaat dinaan nu Kaunutan, meseligan mau. ²⁶ Kagina mikpuun na nemuni gembagel kelegenay nu nga mekpetuud, delendeman ku, pia kenduni kebetang nu getaw, tumu' ndi'en na gusay pelinen. ²⁷ Sa'itada, diin ka na ma gengkeman nu sawa mu? Ndi'a megbeleng dun. Nda'a pa ma pegawid duayan? Ndi'a pegangut megawid dun. ²⁸ Laak sa' menginsawaig begutaw, kana' sala', muka' sa' penginsuaanig delaga, kana' dadema sala'. Laak iini mitalu'u dun diniu pu' tumu' ndi' megawid duayan, pu' mauya'an ku ndi' niu mbianan ki kelegenay nu nga migawid duayan nemun, ki kelegenay kilawan.

²⁹ Uu Mingumpated, iini mauya'an ku, mesuunan niu gupia pu' kana' na maibeni nga gendaw begay dinita. Kagina ma'antu, talu'u diniu, genat nandaw, sa' su minginsawa na, subay penemalanen baalay su pibaal diniin nu Kaunutan maa' nu pigbetad nu nga getaw nda'i sawanen. ³⁰ Ma'antu dadema su nga getaw minlalek, subay penunggilingan nilan su nga getaw kana' milegenan. Su nga meketawa na, subay mengma'niin ilan nu nga kana' pegleliagen. Su nga menaluy, subay mengma'niin ilan nu nga nda'i gimunen. ³¹ Su nga megamit pimetang di kinilawan dig lumbang kini, subay kana' gembagel di ginaa nilan su pimetang nilan. Pu' pekpakus paig lumbang kini.

³² Mendadi, mauya'an ku, nda'iduni kelibuleng niu. Naa sug laki nda' pegawid duayan, lelayun tagikulenen su Kaunutan ta adun leliagen dun su Kaunutan. ³³ Su minginsawa pasi', tagikulenen lelayun su kegleketubu' dinig lumbang kini, pu' mauya'anen baalenen sug leliagen dun su sawanen. ³⁴ Kaas migbelintenga'ig delendemanen. Ma'antu dadema sug libun nda'i sawanen atawaka sug delaga, mauya'anen baalenen sug leliagen dun su Kaunutan, adun pegwakilen tu Megbebaya' su sekegen sampay sug delendemanen. Sug libun pinginsawa na pasi', metegelan megdelendem tu kinilawan pelum, adun baalenen sug leliagen dun su sawanen.

³⁵ Kana' iini tinalu'u dun, adun duuni belibadu diniu. Segaga tinalu'u adun ebangan ku amu. Mauya'an ku penggulaulaan niu su gempia. Mauya'an ku dadema penemalan niu baalay su pibaal dinita nu Kaunutan di nda'i galangalang niu.

³⁶ Naa su mimbeng na, laak miksinengu'ay ilan dua' nug bimbengen ndi' pailan meksenlangan, sa' laung nu mimbeng dun ndi'en mpegbesaanig bimbengen, dayun sa' ndi'en megaga su gayaken, kaas laungen subay beli'iin ilan, buangen niu diniin penggulaulaanen su mauya'anen. Mesu'at dailan beli'iin, kana' sala'. ³⁷ Laak dagid, adin su getaw megbuklusig delendemanen pu' ndi'en penginsuaan sug bimbengen, muka' nda' dadema tegelay nug duma getaw, muka' metau megbaya' di gayaken, gempia ndi' menginsawa. ³⁸ Kaas adin su menginsawa bimbengen, gempia daig baalenen. Muka' adin su ndi' menginsawa, tumu' pai penggulaulaanen.

³⁹ Naa sug libun pinginsawa na, diin pa gengkeman nu sawanen, sinegay tetubu' pai sawanen. Dagid sa' matay nai sawanen, mesu'at na penginsuaan nu mauya'anen na pelum, laak subay samasakup tu Kaunutan ta. ⁴⁰ Laak delendeman ku, leliagen paig libun, sa' ndi' penginsuaan na puli'. Muka' batiku dun dadema, iini mikpesuun dun dinaan sug Balakat nu Megbebaya'.