¹ Naa Mingumpated, mauya'an ku tegyungen ku diniu su Gempia Petenday daansama' ginukitu diniu, pu' iinig dinawat niu muka' iin su keligenan pa pagid di kesalig niu tu Megbebaya'. ² Ki Gempia Petenday kini, iin su ginukitu diniu mekatag dini Kristu. Sa' penemalan niu pektalentenay, iin dayunig bian kegawen diniu nu Megbebaya'. Sa' kana' ma'antu, milasay amu mekpetuud dun.

³ Naa, iini Gempia Petenday, su mitelima'u dayun piglitun ku diniu muka' iin dademai tampusan na gembagel pantagen dinita. Iin, si Kristu kini, minatay saba' nu nga sala' ta mekatag dig daansama' sinulat ditu Misulat Talu' nu Megbebaya'. ⁴ Bena' minatay, dayun lebengay, muka' su ketelu endawen, pitubu' puli', mekatag di sinulat dadema ditu Misulat Talu' nu Megbebaya'. ⁵ Bena' pitubu' na puli', mitua' dayun dini Pedro, muka' mitua' tu nga sepulu' bu' dua' tawan sakupen. ⁶ Mitua' dayun tu nga melaun sakupen, labi lima gatus tawan migdengan. Melaun dinilani tetubu' pa nemun, laak duun dademai minatay na. ⁷ Bena' mitua' dini Santiago pelum, muka' mitua' tu ngag launan peneliganen.

⁸ Dayun katapusanen gupia, mitua' si Kristu dinaan dadema, bisan ma'niinu mekesalebu' kegigetaw, pu' mitekawu mekpesakup. ⁹ Danaan, kagina daansama' piglegetan ku su nga sakup nu Megbebaya' dia pikumpungan nilan, kana'u mbantang gelalen peneliganen. Kaas tampusan gembaba'u di ngag launan peneliganen. ¹⁰ Laak dagid peneligan mau pebian di tulung dinaan nu Megbebaya', kaas kini dau kebetangu nemun. Gembageli pantagen su tulungen dinaan, pu' miksituges pau dun di nga samau peneliganen mektamuy diniin. Laak pia ma'antu, kana' tantu danaan binaal, pu' miksekat gupia tu tulung nu Megbebaya' dinaan. ¹¹ Mendadi, ki Gempia Petenday mekatag dini Kristu, sa' inukit nu ngag lain peneliganen, sa' genat da dinaan, iin da tanani pegukiten nami, kini su pituud niu.

¹² Naa, kagina iini pegukiten ta pu' pitubu' puli' si Kristu, kana' mpia duun diniui mektalu' pu' su minatay na, ndi' daw petubu'en puli' nu Megbebaya'. ¹³ Pu' sa' upama metuud ndi' mekpetubu' su Megbebaya' tu minatay na, naa nda'en dadema mpetubu' puli' si Kristu, ndi' ba? ¹⁴ Naa, sa' upama nda' dadema mpetubu' puli' si Kristu, nda'i pantagen su gukiten nami, muka' nda'i pantagen su kesalig niu. ¹⁵ Muka' sa' upama metuud nda'iduni minatay na petubu'en puli' nu Megbebaya', muka' nda'en dadema sia petubu'ay puli' si Kristu, naa mipantek dayun pu' mikegbalus ita sia mekatag di Megbebaya', saba' mitalu' ta pu' pitubu'en puli' si Kristu. ¹⁶ Pu' sa' upama ndi' mpetubu' puli' su minatay, nda' dadema sia metubu' puli' si Kristu. ¹⁷ Dayun sa' nda' sia metubu' puli' si Kristu, nda'i pantagen su kesalig niu diniin, muka' ndi' amu sia mpedasun di nga sala' niu. ¹⁸ Muka' padun sa' upama ma'antu, su nga suminalabuuk na dini Kristu laak miguna dinita matay, iin pai ginukuman dinilan, matay di nda'i tamanen. ¹⁹ Su pedetengen ta dini Kristu, sa' upama duun dai pantagen su saanan ta megleketubu' dinig dibabaw lumbang, itai mekelelaatlelaat di nga tiba'an getaw.

²⁰ Laak dagid, iini metuud, si Kristu kini, pitubu' puli' tu'u nu Megbebaya', kaas gempantek pu' sug launan minatay mikpetuud dini Kristu, petubu'en dadema puli' nu Megbebaya'. Pu' si Kristui piunanen. ²¹ Pu' kinana' mileep na di tiba'an getaw ki gasalen matay, saba' nu kemilas nu sala tawan begudiin, naa duun dademai sikawan nu nga getaw petubu'en puli' nu Megbebaya', saba' dadema nu kekpetuud nu sala tawan pelum nemun, sa'itada si Kristu. ²² Naa, su gasal nug launan getaw, matay, saba' nu keksalabuuk ta di kemilas nug bekna ginepu'ay ta si Adan. Ma'antu dadema, sug launaneni petubu'en puli', saba' nu keksalabuuk ta pelum dini Kristu. ²³ Laak su tiba'an minatay, duunig basanen mbantang petubu'en puli', ma'nini'. Miuna si Kristu di ngag launanen, dayun sa' mateng puli' si Kristu, petubu'en puli' nu Megbebaya' sug launan tudalis piglegetawanen. ²⁴ Naa mengikteb dayun su nga gendaw, pu' daagen ni Kristu su ngag launan kuntranen, sa'itada su nga meglekaunutan muka' su nga megbaya' sampay su nga tibuukan ginuungan di gekleb langit bu' lupa'. Mendadi, begay na ni Kristu su keglekaunutanen tu Megbebaya', su Gama'en. ²⁵ Pu' subay meglekaunutan si Kristu sampay pedaagen nu Megbebaya' ditug launan kuntranen, muka' maindeganen ilan, sa'itada si Kristu, iin na su meguit dinilan. ²⁶ Dayun su tampusan binaya', daagenen su kepatay nu nga kilawan. ²⁷ Pu' nda' ba mesulat di Misulat Talu' nu Megbebaya', “Kig launan binaal mu, pegbaya' mu diniin.” Gempantek gupia pu' sa' miktalu', “launan,” ndi' mpeduma su Megbebaya', pu' iini mikpelabaw dun tug launanen. ²⁸ Laak dagid, sa' pebaya' na sug launanen ditug Bata' nu Megbebaya', iin, pepegbaya'en sug lawasen ditu Megbebaya', su megbegay diniin pegbaya'en tug launanen, adun meguit gupia tug launan su Megbebaya'.

²⁹ Naa, su nga getaw mekpebunag tubig gumanti' di kekpebunag sia nu nga minatay na, ta' mai mekepebunag ilan dun tubig, sa' kana' daw metuud pu' metubu' puli'i nga minatay? ³⁰ Yami dema, ta' bai mesimpitan ami dun lelayun, sa' ndi' daw metubu' puli'i nga minatay? Pu' mbianan nami lelayun su nga kelegenay saba' nu kegukit nami Gempia Petenday. ³¹ Mingumpated, gendawgendaw pektulakiti gumulu. Laak bisan ma'antu, liliagu dun saba' nu kesalig niu sekat tug begu ketubu' ta puun tu keksalabuuk ta ditu Kaunutan ta si Kristu Isus. ³² Maa' nu nga malig metetubu' su nga getaw kuminuntra dinaan dini Efeso, pu' mauya'an nilan, petainu. Naa, sa' ndi' daw metubu' puli'i nga getaw, ta' mai piktigelu dun su kegleget dinaan nu nga kuminuntra dinaan saanan ku mekpetu'un dini? Sa'itada, nda' dayuni gatagen sa' puun tu kekinilawan ku laaki baalen ku dini. Pu' sa' ndi' daw metubu' puli'i nga minatay, mpia dunutan ta su penelu'en, “Tumu' maan ita muka' meginum ita, pu' lema', matay daita.” ³³ Ndi' niu peglimbungayi ginaa niu. Sa' megduma amu di nga mekesala', pegdaangan amu. ³⁴ Subay meksikesuun amu, ndi' damu dega pekpesala', pu' duun diniui nda' pekesabut tu Megbebaya'. Kaas ma'niin ku amu mipengumpiid dini ketalu'u dun, adun megbiksu' amu.

³⁵ Naa, pinenggi' duuni sumaak dinaan ma'nini', “Kenduta' mai kepetubu' dun puli' su nga minatay na? Ta' gesalay dunig lawas nilan kiin?” ³⁶ Su sumaak sia ma'nia, bengu'bengu'en. Pu' pinenggi' pemulaan taig beni', subay mauna melupu', dekag pa pentubu', ndi' ba? ³⁷ Beni' dai pemulaan ta, sa' sebalui trigo, sa' sug lain, kana' pai tibuuk pimula tumulin. ³⁸ Begayan nu Megbebaya' sug beni' kiin lawasen lepeng tu mauya'anen, pu' betad, kada seginis beni', begayan nu Megbebaya' lawasen mbantang tu gininisanen.

³⁹ Ki nga ginis lawas, kana' maig lumbus mesama. Salaig lawas nu getaw, sala paig lawas nu metetubu', sala dademaig lawas nu manukmanuk, sala pa pagidig danu seda'.

⁴⁰ Duun pa pagidi ngag bitang ditug langit, muka' dinig lumbang. Salai kelengas nu ngag bitang ditug langit, salai kelengas nu ngag bitang dinig lumbang. ⁴¹ Su mata gendaw, duuni kelengas nu tiagen, sug bulan, sala dademai kelengasen, sampay su ngag bitun, salaig danilan. Migbida' pa pagidi kelengas nu ngag bitun.

⁴² Ma'nia dadema su ketubu' puli' nu nga minatay na. Pu' kig lawas nu getaw, sa' lebengen, meglaat. Sa' petubu'en puli', ndi' na pelum matay. ⁴³ Sa' lebengen, meselain nai palasen muka' nda' nai sekegen. Sa' pelum petubu'en puli', melengas na gupia muka' ginuungan. ⁴⁴ Sa' lebengen, kinilawan tantui gasalen megbenwa dinig lumbang. Dayun sa' petubu'en na puli', diniwata na pelum su gasalen megbenwa ditu na langit. Pu' kinana' duun tu'uig lawas kinilawan, duun dademaig lawas diniwata. ⁴⁵ Pu' nda' ba mesulat di Misulat Talu' nu Megbebaya', “Sug bekna getaw, si Adan, binaal nu Megbebaya' kilawan mitubu'.” Laak si Kristu kini, maa' nu katapusan Adan, laak iinig Diwata megbegay ketubu'an, ketubu' nda' nai tamanen. ⁴⁶ Naa sug lawas nu kilawani mauna mbaal, kana' nu gasalen diniwata begay nu Megbebaya'. ⁴⁷ Sug bekna getaw si Adan, binaal lupa', muka' pigenatanen sug lumbang. Su kedua' Adanen, si Kristu, pigenatanen su gekbus langit. ⁴⁸ Su gasal nu getaw binaal lupa', iini gasal nu nga getaw pegbenwanan nilanig lumbang. Ma'antu dadema su gasal nu Getaw pigenatanen sug langit, iin nai gasal ta, su nga suminakup diniin, pu' megbenwa daita dema tug langit. ⁴⁹ Nemun, palas tai palas nu getaw kiin binaal lupa'. Ditug binaya' gebii bu' gendaw, palas ta palas na pelum nu Getaw genat tug langit.

⁵⁰ Naa Mingumpated, iini ma'ananen, ki ngag lawas ta kini, guned muka' dugu', ndi' mpeduma di keglekaunutan nu Megbebaya'. Pu' adin su gasalen melapuk, ndi' mpeduunan ketubu' nda'i tamanen.

⁵¹ Naa pektalentenay niu ini, buasan ku diniu sug daansama' pigbuni nu Megbebaya' pu' ndi' ita megela' matay. Segaga ditug binaya' gebii bu' gendaw, megela' ita tekaw mpalin di selingka, ⁵² maa' nu kemela' nu mata, pu' tumingeg na su katapusan bugyung, muka' petubu'en puli' nu Megbebaya' su nga mimatay na. Megela' dayun mpalin su ngag lawas ta, kaas nda' na dayuni gumulenig launan suminakup. ⁵³ Pu' su gasal ta matay, subay mbelesan di gasal ta nda'i gumul ta. Adin su matay, mbaluy na ndi' matay. ⁵⁴ Kaas sa' mpenggulaula na, iin pa dayun penuud su sinulat ditu Misulat Talu' nu Megbebaya', pu' nda' ba mesulat dia, “Mibeleng na su gumul nu nga getaw, duminaag na tantu su Megbebaya'.”

⁵⁸ Kaas uu Mingumpated petailen ku gupia, pepagen niu su kesalig niu ditu Megbebaya', adun ndi' gusay mpalin. Situgesay niu lelayun penggulaulaay su pibaal diniu nu Kaunutan ta. Pu' misuunan niu pu' su pibaal diniu nu Kaunutan ta, nda'idun tanani mbulugan niu baalay.