6
1 Naa mendadi, kagina limbang ami nu Megbebayaˈ di pibaalen dinami, menengi ami diniu, ndiˈ niu begay mbulugan su tulungen diniu. 2 Ndaˈ ba mesulat di Misulat Taluˈ nu Megbebayaˈ,
“Saˈ minateng nai gendaw gempia paitaˈu diniu su kepetailu, pikineegan ku amu.
Su gendaw di keglegawen diniu, ibangan ku amu.”
Naa, pektalentenay niu su sinulat kia, puˈ kini nai gendaw gempia duaten nu nga getaw su kepetail nu Megbebayaˈ. Nandaw, gempia na mekpegawen diniin su nga getaw!
3 Naa, mpauk ami gupia saˈ mbuus duuni takesilan nu getaw dig baalen nami, kaas ndaˈig baalen nami mekegbelibad di sumakup sia tu Megbebayaˈ, bisan taˈ taway dun. 4 Segaga paitaˈ nami dig launan baalen nami puˈ meseligan ami pegwekilan nu Megbebayaˈ. Paitaˈ nami ia di kektigel nami di kegleget dinami, di kelegenay nami, sampay di simpit nami. 5 Puˈ apelai, binadas ami, pinikutan ami, miglapis ami pemesaitay melaun getaw mikesamuk, milenduˈan ami dig lasay. Taang dun kulangi ketulug nami, taang dun ndaˈi kaˈaan nami. 6 Mipaitaˈ nami pa padun di nga getaw puˈ sesuguˈen ami nu Megbebayaˈ pibian di pigbetad nami ndaˈi melamug dun melaaten, pibian di sinuunan nami tu metuud, pibian di kepedasun nami di nga mekpeleget dinami, sampay dig lelaat nami tu nga samataw nami. Mipaitaˈ nami dun dadema puˈ sabaˈ gempantek bigayan ami Balakat nu Megbebayaˈ, petailen nami gupia su nga samataw nami, 7 pigukit nami su metuud mekatag di Megbebayaˈ, sampay ibangan ami nu ginuung nu Megbebayaˈ. Mukaˈ iinig besi nami mukaˈ lasag nami, su gempia pigbetad nami puun tu kekesuun nami. 8 Kaliˈ na dun mipegbesaan ami, taang dun mipengumpiid ami sia. Miksama da, piksudiˈan ami pasiˈ nug duma mukaˈ pinalan ami nug duma pelum. Duuni mikpebalus dinami, laak pinlektes nami da teluˈay su metuud. 9 Maˈniin ndaˈi gempia dengegan nami, laak migdedengeg ami dig launan getaw. Maˈniin pektulakit dademai gumul nami, laak minitaˈ niu puˈ tetubuˈ pami gusay. Pia pitugaˈ ami gupia, ndaˈ ami petayay. 10 Pia miubaˈ ami, liliag ami lelayun. Mipemaˈniin ami nu gempusuk getaw, laak mikpedatuˈ ami di melaun getaw di ndaˈi tamanen. Mipemaˈniin ami nu getaw ndaˈi gimunen, laak maˈniin dami dema nu getaw ndaˈi taman nu pimetangen.
11 Naa Mingumpated dia Corinto, ki sinulat nami kini, pinlektes nami amu teluˈay. Petailen nami amu lelayun. 12 Kanaˈ nu kepetail namii kulang, puˈ kulang sungkini kepetail niu dinami. 13 Ki sinulatu kini, maaˈ nu sulat piwitu di tantu bataˈu. Kaas, menengiu diniu suliˈan niau petailay, pebegelen niui ginaa niu dinaan.
Pigad ni Pablo, naa su Sakup, ndiˈen Begay Maulinan dig Betad Kinilawan
14 Naa, ki keglimbang niu di nga ndaˈ pa pekpetuud dini Isukristu, ndiˈ mpia, puˈ ndiˈ amu mekeksalabuuk. Meglimbang bai mekesuun mukaˈ meglimbung? Mekesala ba megbenwa su medelag mukaˈ medelem? 15 Si Kristu mukaˈ su Palin, ndiˈ mekeksinenguˈay. Ndiˈ dadema mekegdumai mekpetuud dini Kristu mukaˈ su memilas dun. 16 Su pegbenwanan nu Megbebayaˈ, ndaˈig labeten di ngag ledawan. Puˈ pegbenwanan ita nu Megbebayaˈ ndaˈi gumulen. Puˈ ndaˈ ba mesulat di Misulat Taluˈ nu Megbebayaˈ,
“Muliˈu ditu piglegetawan ku, sumalau megbenwa dinilan.
Mbaalu pektemuyen nilan, mukaˈ mbaal ilan danaan getaw.”
17 Maaˈ laung padun nu Kaunutan,
“Kaas, subay megawaˈ amu di nga mektamuy tu nga sagya diwata,
suay amu dinilan.
Subay ndiˈ amu lumamug di nga milemuˈan.
Telimaˈen ku amu dayun.
18 Mbaal Gamaˈ niau,
mukaˈ bataˈu amu, libun laki.
Kinii tinaluˈ nu Kaunutan, su Tampusan Ginuungan Megbebayaˈ.”