¹ Naa, iini ndiˈ ita lumukas dun su pibaal dinita, puˈ sug bebelayan pegbenwanan ta dinig dibabaw lumbang, saˈitada sug lawas ta, misuunan ta saˈ gebaˈen, naa, duun pai sala balay pegbenwanan ta ditu gekbus langit, pingandam na nu Megbebayaˈ. Kig balay kia, kanaˈ binaal nu getaw, puˈ migbaal dun su Megbebayaˈ, mukaˈ ndaˈi gikteben. ² Nandaw melayuˈi ginaa ta, sabaˈ mauyaˈan ta gupia maˈniin seluken taig begu balay ta binaal tug langit. ³ Saˈ seluken ta na, kanaˈ ita lebas, kanaˈ ita laak gimuud ndaˈig lawasen. ⁴ Puˈ selian ta megbenwa dig bebelayan ta kini dinig lumbang, megdegu ita, sabaˈ nu nga kelegenay ta. Kanaˈ ta mauyaˈan belengenig lawas ta kilawan, segaya mauyaˈan ta seluken ta tumuˈig lawas ta gasalen ndiˈ matay, adun daagen nu ketubuˈ su gumul. ⁵ Su Megbebayaˈi minaal dinita adun pelinen ita niin maˈnia, mukaˈ bigayen dinita sug Balakaten, piuna dig launan pingandamen begay pa dinita.

⁶ Naa maˈantu, sumalig ita lelayun ditu Kaunutan. Laak misuunan ta puˈ su saanan ta megbebenwa pa dig lawas ta, melayuˈ ita pelum ditu Kaunutan. ⁷ Puˈ su pegbetaden ta dinig lumbang, subay pebianen ta di kesalig ta ditu Kaunutan, puˈ ndiˈ tain maitaˈ. ⁸ Suminalig ita gupia diniin, sampay mauyaˈan ta pa guaˈ dig lawas ta dinig lumbang, adun mekauliˈ ita ditu Kaunutan. ⁹ Kaas, iin tumuˈi mauyaˈan ta gupia, penggulaulaan ta sug leliagen dun su Kaunutan, pia dini paita, saˈ ditu na. ¹⁰ Puˈ launan ta, saladuaˈ subay mengadap ditu ni Kristu, adun ukumenen. Suliˈan dayun ita saladuaˈ bantang diniin, lepeng tu pinggulaulanen dinig dibabaw lumbang, saˈ gempia, saˈ melaaten.

¹¹ Naa mendadi, kumalenged misuunan nami mekendekendeki kaukum nu Kaunutan di getaw, penemalan nami pengmetuudayi nga getaw adun sumalig ilan diniin. Misuunan gupia nu Megbebayaˈig delendeman ku. Seligan ku puˈ misuunan dau dema niu gupia. ¹² Ndiˈu puliˈan petelimaˈay diniuig lawasu, segaga pesikaun ku amu leliagen dinami, adun mesembag niu su nga getaw mengangyaˈ di palasen sabayaˈ di gasalen, kaas pigdenaˈu nilan. ¹³ Naa, buˈang mau daw? Petuyangen na, basta laak petuuden ku su pibaal dinaan nu Megbebayaˈ. Melegdeng maig delendeman ku daw? Iini melegdeng dun, puˈ adun mebangan ku amu. ¹⁴ Iini megbayaˈ di ginaa nami su kepetail ni Kristu dinita, puˈ misuunan nami minatay su sala tawan guminantiˈ dig launan getaw. Kumalenged ginantiˈ nu sala tawan sug launan, meksaliunung dadema sug launan getaw di kepatayen. ¹⁵ Minatay si Kristu guminantiˈ di tibaˈan getaw, adun ita nu nga tetubuˈ, ndiˈ naita metubuˈ adun mekpesibaˈ dig lawas ta. Segaga iin nai metubuˈ ita dun, sug leliagen dun si Kristu su minatay dayun pitubuˈ puliˈ gumawen dinita.

¹⁶ Naa yami, sikna mikpetuud ami dini Isukristu, ndiˈ na nami pemilangeni getaw mekatag dig betad kinilawan, saˈ melengas ba, saˈ melaati pigbetaden. Pia begudiin pimilang nami si Kristu mekatag dig betad kinilawan, kanaˈ na maˈniai kemilang nami dun. ¹⁷ Saˈ duuni getaw miksalabuuk na dini Kristu, begu bitang nain. Miawaˈ na sug daan pigbetaden. Naa bentayay pa daan, mikpuun na sug begu! ¹⁸ Sug launan mipenggulaulanen, pinggulaula nu Megbebayaˈ. Su Megbebayaˈ, pia daansamaˈ kuntranen ita, nandaw binaal naita niin sambaten pibian dini Kristu. Mukaˈ pigwakilen dinami su kegukit di Gempia Petenday mekatag di kepesambat nu Megbebayaˈ dinita nga mikesalaˈ. ¹⁹ Iini gukiten nami, pesambaten diniin su tibaˈan getaw pebian dini Kristu, ndiˈen na pengebeten su nga melaat gulaula nu nga getaw. Mukaˈ pigwakilen dinami su gukiten nami di nga getaw betad sumambat dailan dema diniin.

²⁰ Naa saˈ maˈantu, kini dami pigwekilan ni Kristu, kaas saˈ menengi ami diniu, lepeng menengi su Megbebayaˈ diniu pebian dinami, adun sumambat amu diniin. Menengi dami dema tuˈu diniu, mekpesambat amu tu Megbebayaˈ, adun kanaˈ na yamui kuntranen. ²¹ Si Kristu, ndaˈi salaˈen. Laak pia maˈantu, pisalabuuk iin nu Megbebayaˈ di salaˈ ta, adun ita pelum, pesalabuuk ita nu Megbebayaˈ di kekesuunen sekat di keksalabuuk ta dini Kristu.