¹ Naa, uu Mingumpated, su kangay nami ditu niu, misuunan niu puˈ ndaˈ pekpelilu. ² Misuunan niu puˈ su ndaˈ pami dateng dia niu, pisaitan ami nu nga getaw ditug lunsud Filipos mukaˈ piksudiˈan ami nilan dia. Pia melauni kuminuntra dinami, pipenamal ami nu Megbebayaˈ megukit diniu Gempia Petenday genat diniin. ³ Naa, tumuˈ kanaˈ sayep ki tuyuˈ nami megukit diniu. Kanaˈ dadema melaati tuyuˈ nami. Ndaˈ ami peglimbung, ⁴ segaga ukiten nami su mauyaˈan gupia nu Megbebayaˈ, puˈ mitelimaˈen ami, kaas sinaligen dinami su Gempia Petenday. Kanaˈ iini migukit ami dun puˈ peleliagen nami su nga getaw, segaga iini migukit ami dun adun leliagen dun su Megbebayaˈ, puˈ iini meksimaˈ di ginaa nami. ⁵ Misuunan da niu dema puˈ su kegukit nami diniu, ndaˈ ami pekpeˈenalenal, mukaˈ su pituˈun nami, ndaˈi ginuklip nami gayak tu selapiˈ. Miketakesiˈ dun su Megbebayaˈ. ⁶ Ndaˈ ami pa pagid pekpeˈenal tu nga getaw, pia yamu atawaka lain getaw. Kagina peneligan ami ni Kristu, ⁷ bantang daan suguˈen nami amu, laak ndaˈ, sinangkaliˈ iningat nami amu maˈniin nu ginaˈ megingat tu ngag bataˈen. ⁸ Kagina petailen nami amu gupia, inukit nami gusay diniu su Gempia Petenday nu Megbebayaˈ, pia ami matay saˈ metubuˈ, bugiˈ melelaat ami gupia diniu. ⁹ Uu Mingumpated, tegyungen ku diniu puˈ gebii gendaw minamal ami mengimbaal, adun ndiˈ nami amu medeligan, su saanan nami migukit diniu tu Gempia Petenday genat tu Megbebayaˈ.

¹⁰ Naa, yamui miketakesiˈ dun mukaˈ su Megbebayaˈ, puˈ su kegduma nami diniu nga mikpetuud na, ndaˈi melamug dun melaat. Kanaˈ dami dema medangat, segaga mekesuun ami. ¹¹ Puˈ misuunan niu gupia, piksesala tawan diniu, ibangan nami amu maˈniin nu kegabang nu gamaˈen tu ngag bataˈen. ¹² Pinguliksegan nami amu, pingamuˈ nami amu, mukaˈ pinengi nami diniu baalen niu kig leliagen dun su Megbebayaˈ, puˈ migenggat iin diniu sumakup amu di keglekaunutanen mukaˈ mpeduma amu dig dengeganen.

¹³ Naa, iin dademai mekpaladpalad ami dun tu Megbebayaˈ, puˈ su kegukit nami diniu tu taluˈen, pikineegan niu mukaˈ dinawat niu, puˈ pimilang niu su kegukit nami kanaˈ taluˈ nu getaw, segaga tantu taluˈ nu Megbebayaˈ. Iin daan tuˈu, puˈ puun di taluˈen kia, pepegenen nu Megbebayaˈ su kesalig niu nu nga mekpetuud. ¹⁴ Su nga pikumpungan nu nga suminalabuuk dini Kristu Isus ditu Judea, mipenunggilingan niu ilan, puˈ piglegetan amu nu nga samataw niu maˈniin nu kegleget dinilan nu nga samataw nilan. ¹⁵ Su nga getaw Judea, ilan su mikpatay tu Kaunutan ta si Isus mukaˈ tu nga pimuunan nu Megbebayaˈ begudiin sampay inutidan dami dema nilan dig daan benwa nami. Mimilas ilan gupia tug leliagen dun su Megbebayaˈ, mukaˈ miglekuntra ilan tu tibaˈan getaw. ¹⁶ Puˈ bilibadan ami nilan sia puˈ ndiˈ nami ukitan su nga kanaˈ getaw Judea adun megaweni nga kanaˈ getaw Judea. Maˈnia mingikteb nai salaˈ nilan. Dipetan na su nga getaw Judea nu ginukuman dinilan nu Megbebayaˈ.

¹⁷ Naa Mingumpated, su keksuay ta, pia ndaˈ ita peksuay dig delendeman, dig lawas laak, mukaˈ pia ndaˈ maiben, mibugaˈ ami gupia diniu. Mauyaˈan nami gupia mengumbelayan ami diniu puliˈ, adun mekinitaˈay ita. ¹⁸ Kagina kiaig delendeman nami, naan kini, tatapu mekpulingkas mpuliˈ ditu niu, laak bilibadan ami ni Satanas. ¹⁹ Saˈ upama kanaˈ da yamu, saˈ mateng puliˈ su Kaunutan ta si Isus, mpiid ami sia, ndaˈ siaig leliag nami. Puˈ pekpelaban nami su gendaw maitaˈ nami amu di gedapanen, ²⁰ puˈ yamu daani puunen pigbesaan ami, mukaˈ yamu dademai puunan nug leliag nami.