¹ Mendadi su ndaˈ na nami metigelig bugaˈan nami diniu, delendeman nami mbilin pami diag lunsud Atenas mukaˈ ² sumuguˈ ami dini Timoteo mangay ditu niu. Puˈ si Timoteo, iin su mimated dinita sesuguˈen nu Megbebayaˈ, limbang nami dadema megukit tu Gempia Petenday mekatag dini Kristu. Sinuguˈ nami iin meditu niu pementekeneni kesalig niu, ³ adun ndaˈidun diniui metalin sabaˈ nu kegleget diniu nu nga samataw niu. Yamu, misuunan niu puˈ subay mbianan ta su nga kelegenay, puˈ kia su pigdelendem nu Megbebayaˈ. ⁴ Puˈ su saanan pa nami ditu niu, daansamaˈ tinaluˈ nami diniu puˈ peglegetan ita, mukaˈ misuunan niu gupia mipenggulaula na. ⁵ Iini sinuguˈu dun si Timoteo meditu niu, puˈ ndiˈu metigeli kelibulengu. Sinuguˈu iin, adun metukawan ku su kesalig niu. Milibulengu dun pingindanan namu sia nu Palin, melasay laak siai pinggulaula nami ditu niu.

⁶ Naa, nandaw masiˈ, misuunan na nami kanaˈ maˈantui mipenggulaula. Puˈ su kedateng puliˈ ni Timoteo, inukiten dinamii gempia puˈ suminalig pamu gupia ditu Megbebayaˈ. Mukaˈ metau amu melelaat tu samataw niu. Inukiten dema dinami puˈ gempia lelayuni ginaa niu dinami, mukaˈ mibugaˈ amu dinami maaˈ nug bugaˈan nami diniu. ⁷ Mendadi, Mingumpated, pia milegenan ami dini mukaˈ piglegetan ami, kaliˈ nami medengeg mekatag di kesalig niu, miulikseg ami. ⁸ Maˈantu, mekeginaginaa ami saˈ gempageni keksalabuuk niu ditu Kaunutan ta si Isus. ⁹ Kaas mekekpaladpalad ami gupia tu Megbebayaˈ mekatag diniu. Mekpaladpalad ami diniin puun tug leliag nami su sinaanan nami menenabi, ¹⁰ puˈ gebii gendaw pekpenenabi ami gupia, mekinitaˈay ita, adun tituluˈan nami amu taman kulang di sinuunan niu tu kekpetuud ta.

¹¹ Naa, penenebiin nami, endamen nu Gamaˈ ta Megbebayaˈ mukaˈ nu Kaunutan ta si Isus sug bianan nami pangay ditu niu. ¹² Mukaˈ yamu, penenebian nami amu peksemeten nu Kaunutan ta sug lelaat niu saladuaˈ dig duma niu mukaˈ di nga kelaunan getaw, sampay melepeng tug lelaat nami diniu. ¹³ Maˈantu pementekeneni ginaa niu, adun menggangeti kekesuun niu, mukaˈ metelimaˈ amu nu Gamaˈ ta Megbebayaˈ, saˈ mateng puliˈ su Kaunutan ta si Isus ilan nu ngag launan sakupen.