¹ Naa, uu Mingumpated, duun pai teluˈen ku diniu. Su dia pami niu, pituˈunan nami amu di kepia pegbetaden niu, adun leliagen dun su Megbebayaˈ. Dinunutan niu dayun. Nandaw ia, penengiin nami dadema diniu, pektalentenan niu gusay, puˈ pigwekilan ami nu Kaunutan ta si Isus. ² Mukaˈ misuunan da niu su tinituluˈ nami diniu puun tu pegbayaˈ nu Kaunutan ta si Isus. ³ Kaas pegwakil niuig lawas niu tu Megbebayaˈ, adun mekesuun amu. Pegliaw niu dademaig dusa, puˈ iini mauyaˈan nu Megbebayaˈ. ⁴ Puˈ su ngag laki, diadia saˈ suay, subay pebian di kegwakilen kia mukaˈ di gungayaˈ, ⁵ kanaˈ didaliˈ maaˈ nug betad nu getaw ndiˈ megbasa tu Megbebayaˈ. ⁶ Subay ndaˈidun diniui mekpelaat tu samasakupen, ndaˈidun dademai meglimbung, puˈ pigad nami daan diniu sampay pipeglengilam nami diniu puˈ adin su menggulaula dun, pelebuˈan gupia nu Kaunutan ta. ⁷ Maˈantu, ndaˈ ita enggatay nu Megbebayaˈ megdusa ita, segaga pegwakil taig lawas ta diniin. ⁸ Mendadi adin su memilas di tinituluˈu kini, kanaˈ getawi pemilasenen, su da laak Megbebayaˈ, puˈ iini megbegay diniu mekesuun Balakaten.

⁹ Naa ki pektinebangay pelum, ndiˈ na nami kambat sulaten diniu, puˈ pituˈunan namu nu Megbebayaˈ meglinelaatay amu. ¹⁰ Melelaat amu laung tu ngag launan samasakup ta di tibuuk benwa Macedonia. Kaas penengiin nami diniu, megdugangi kektalenten niu dun. ¹¹ Melengas ndiˈ amu meksasaw di kegbebenwa niu, ndiˈ niu penginempenay su ndaˈig labet niu dun, mukaˈ ndiˈ damu dema megdalig dig lain getaw megleketubuˈ, ¹² adun pegbesaan amu nu nga getaw ndaˈ pa pekpetuud, mukaˈ ndiˈ na niu medalig tug lain getaw su kulang diniu.

¹³ Naa Mingumpated, ki samasakup ta su ndaˈ na, mauyaˈan nami gupia mesuunan niu su mpenggulaula dinilan, adun ndiˈ amu melegenan maaˈ nu nga getaw ndaˈi pedetengenen. ¹⁴ Kagina mituudan ita dun minatay si Isus dayun mitubuˈ puliˈ, mukaˈ mpuliˈ dini, naa, mituudan daita dema dun puˈ adin su minatay suminakup dini Isus, petubuˈen puliˈ nu Megbebayaˈ mukaˈ petendugen dini Isus. ¹⁵ Puˈ ukit nami diniu su mialap nami ditu tinaluˈ nu Kaunutan ta. Ita su nga tetubuˈ pa mbilin dini sampay lumusad puliˈ su Kaunutan ta si Isus, ndiˈ ita mauna ditu nga ndaˈ na. ¹⁶ Maˈniin ma. Saˈ lumusad su Kaunutan ta si Isus, duuni medengeg ta mektawag diag langit mukaˈ ki tingeg nu tampusan sesuguˈen nu Megbebayaˈ getaw langit mukaˈ tingeg da dema nug bugyung nu Megbebayaˈ. Iin dayuni mpenggulaula. Bekna, metubuˈ puliˈ su nga mikpetuud dini Kristu minatay na. ¹⁷ Dayun ita, su nga tetubuˈ pa mbilin dini, metekaw ita pelentuun metendug dinilan sumungkak di Kaunutan ta si Isus dia gawanawan. Maˈantu, meksalabuuk ita dayun megbenwa diniin di ndaˈi tamanen. ¹⁸ Kaas, saladuaˈ, pegeguliksegay amu di pigwali nami kini.