¹ Naa, Mingumpated, ki kelusad puliˈ nu Kaunutan ta si Isukristu mukaˈ ki kekpungun ta diniin, penengiin nami diniu, ² ndiˈ megduaˈduaˈig delendeman niu dun. Ndiˈ damu dema melibuleng puˈ minateng na daw ki gendaw kia. Mabuˈ laung dun nu getaw puˈ naan dawi miktaluˈ dun saanan ku migwali taluˈ nu Megbebayaˈ, saˈ migukitu, saˈ daw sinulatu. ³ Pia taˈi mektaluˈ dun, ndiˈ amu pekpelimbung. Puˈ ndiˈ pa mateng ki gendaw kia subay mauna memilas gupia tu Megbebayaˈ su nga getaw, mukaˈ metuaˈ dadema su pinulay, su ginandam pengain ditug linaw gapuy. ⁴ Ki pinulay kini, iin su kumuntra tug launan pemilangen nu getaw diwata mukaˈ tug launan pektemuyen nu getaw. Mekpelabaw dig launan nilan sampay mangay diag Balay Pengedapan tu Megbebayaˈ, megingkud dia, engkenenen iini Megbebayaˈ.

⁵ Ndaˈ ba niu medelendem puˈ su saanan ku dia niu, iini tinaluˈu diniu? ⁶ Daan na niu misuunan puˈ nemun duuni megbelabag di kuleg nu pinulay sampay mateng nai gempia timpu. Ki pinulay, metuaˈ dayun, ⁷ puˈ kuminulegkuleg na su gandang pigbuni betad nga getaw mekesesalaˈ, laak mibebelebagan pa sampay mawaˈ na su migbebelabag dun. ⁸ Mbuasan dayun su pinulay, mukaˈ petain nu Kaunutan ta si Isus pebian di giup, binesaan di tiag nu ketuaˈ nu Kaunutan. ⁹ Benaˈ metuaˈ su pinulay, puun tu pegbayaˈ ni Satanas. Penggulaulaneni mekesalebuˈ tuˈus mukaˈ ginuung, adun mpegbelusanen su nga getaw. ¹⁰ Peglimbunganen di gininisan melaat su nga getaw gasal nilan mpeditug linaw gapuy, puˈ ndaˈ nilan telimaˈay su metuud mukaˈ ndaˈ nilan mauyaˈay, tekaw buus megawen ilan sia. ¹¹ Maˈantu buangen ilan gupia nu Megbebayaˈ mpeglimbungan, kaas metuudan ilan dun sug balus. ¹² Deksuˈanen, ukuman ilan nu Megbebayaˈ mukaˈ pelebuˈanen dadema sug launan ndiˈ mekpetuud tu tantu metuud mukaˈ sug leliagen dun sug dupangan.

¹³ Naa yamu pelum, uu Mingumpated petailen nu Kaunutan ta, subay mekpaladpalad ami lelayun tu Megbebayaˈ mekatag diniu. Puˈ su ndaˈ pa mbaali gekleb langit buˈ lupaˈ, tinduˈ amu niin megawen pibian di ginuung nug Balakaten. Megawen amu daan, puˈ binaal amu niin piglegetawanen pibian dadema dig Balakat nu Megbebayaˈ mukaˈ miksekat tu kekpetuud niu tu metuud. ¹⁴ Inggat amu nu Megbebayaˈ megawen pibian di Gempia Petenday inukit nami diniu, adun mpeduma amu dig dengegan nu Kaunutan ta si Isukristu mukaˈ tu kegbasa diniin. ¹⁵ Kaas, ndiˈ megduaˈduaˈig delendeman niu di tituluˈan nami diniu, ndiˈ niu selingaway, pia di ginukit nami, saˈ su sinulat nami.

^16-17 Naa, penenebiin nami tu Kaunutan ta si Isukristu mukaˈ tu Gamaˈ ta Megbebayaˈ, penguliksegan amu niin mukaˈ pepentekenenig delendeman niu mekatag dig launan gempia penggulaulaan niu mukaˈ pekteluˈen niu, puˈ petailen ita niin mukaˈ tulungen ita niin, kaas mengulikseg ita di ndaˈi tamanen, mukaˈ bigayan ita niin gempagen pedetengen.