¹ Naa taman taluˈu diniu, penengiin ku, ita nga suminakup na, subay penenebiin ta tu Megbebayaˈ sug launan kulang dinita. Subay penenebian ta su ngag launan getaw, mukaˈ pekpeladpeladan ta su Megbebayaˈ mekatag dig launan getaw, ² sampay su nga gadiˈ mukaˈ launan kaunutan dig benwa. Penenebian tailan, adun melinawi kegbenwa ta, mukaˈ ndaˈi sasaw dun sampay mekegbasa ita tu Megbebayaˈ mukaˈ gempiai pegbetaden ta. ³ Maˈantui gempia kenenabi leliagen dun su Megbebayaˈ su Meglegawen dinita. ⁴ Puˈ mauyaˈanen sug launan getaw megawen di ginukumanen, mukaˈ mauyaˈanen mesuunan pa nug launan getaw su metuud. ⁵ Puˈ duun laaki salabuuk Diwata mukaˈ duun dademai sala tawan peseksudenen su nga getaw tug Diwata Megbebayaˈ, si Isukristu, getaw dadema. ⁶ Iin, bigayen matayig lawasen, adun lekateneni tibaˈan getaw. Pibian dia, pinitaˈen di gendaw bantang kekpaitaˈen puˈ mauyaˈan nu Megbebayaˈ megawen su ngag launan getaw. ⁷ Iini miktenduˈ dun dinaan peneliganu niin, adun ukiten ku ia, mukaˈ mekpetuˈunu tu nga kanaˈ getaw Judea mekatag di kesalig dini Isus mukaˈ mekatag di metuud. Kanaˈ balusi pekteluˈen ku kini, puˈ metuud.

⁸ Naa, pia adini pikumpungan nu nga mekpetuud, iini mauyaˈan ku, sug lakii menenabi, su pigwakilig lawasen tu Megbebayaˈ, ndaˈig lengeten atawaka sualanen. ⁹ Su ngag libun pelum, iini mauyaˈan ku seluken nilan su sinukalay mukaˈ su mbantang di kegbasa di getaw, kanaˈ megdedelaga. Ndiˈ nilan mpia pelebian penlenuˈlenuˈay sug buuk nilan. Ndiˈ nilan mpia selukenig bulawan atawaka dyamanti atawaka pekayan bai. ¹⁰ Iini melengas paitaˈ nilan tu nga samataw nilan, sug lelaat nilan maaˈ nu pekayan, puˈ mbantang dig libun engkenenen puˈ megbasa tu Megbebayaˈ. ¹¹ Subay metamed ilan mektuˈun mukaˈ mekpetuud ilan tu mekpetuˈun dinilan. ¹² Ndiˈu begay su ngag libuni mekpetuˈun atawaka meglekaunutan di ngag laki dia pikumpungan, subay metamed ilan. ¹³ Puˈ iini miuna biwat si Adan, dayun si Ibaˈ. ¹⁴ Mukaˈ kanaˈ si Adani pigbelusan ni Satanas, sug libun laak, kaas iini mimilas sug libun. ¹⁵ Pia maˈantu, su saanan nilan megbataˈ, megawen su ngag libun saˈ pektalentenan nilan su kekpetuud nilan tu Megbebayaˈ mukaˈ sug lelaat nilan tu samataw nilan, saˈ mektalenten ilan di kekesuun sampay ndiˈ ilan mekpaitaˈitaˈ.