3
Su nga Kaunutan di nga Pikumpungan nga Sakup
1 Naa, meseligan gupiai taluˈ kini, adin su getaw mauyaˈanen meguit tu pikumpungan nu nga sakup ni Kristu, mayak di melengas baalen. 2 Ki meguit tu pikumpungan, subay mekesuun mukaˈ sala tawan laaki sawanen. Kanaˈ sempaun, metau meguit dig delendemanen mukaˈ gempiai pigbetaden. Subay metau menembaˈ tu nga menaikan mukaˈ metau dadema mekpetuˈun. 3 Subay ndiˈ megbebulek, kanaˈ melisualen, segaga mesumayaˈ. Subay ndaˈ dademai gayaken tu selapiˈ. 4 Subay metau meguit tu gapenen, petuuden gupia nu ngag bataˈen mukaˈ pegbesaan nilan. 5 Puˈ saˈ ndiˈ metau meguit di gapenen, mekendutaˈi kaingaten tu pikumpungan nu nga sakup nu Megbebayaˈ? 6 Kanaˈ mpia saˈ begu sakup, puˈ pinenggiˈ mangyaˈ, deksuˈanen, ginukuman dun nu Megbebayaˈ, maaˈ da nu ginukuman di Palin, puˈ migangyaˈ su Palin. 7 Mukaˈ dema subay pegbesaan nu nga kanaˈ mekpetuud su mauyaˈanen meguit tu pikumpungan, adun kanaˈ mpengumpiiden, dayun daagen sia nu Palin.
Su nga Megabang tu nga Kaunutan
8 Naa ki nga megabang dadema di kaunutan kia, subay tenduˈen su gembasa, kanaˈ belusen, kanaˈ meginum melaun mukaˈ kanaˈ mayak tu selapiˈ. 9 Meksekat di gempia delendeman, subay penemalanen pektalentenay su metuud mekatag di kesalig ta pisuun dinita, 10 mukaˈ unaan pa dema peksimaˈay, dekag pa tenduˈay. Saˈ ndaˈi kulang diniin, naa metenduˈ dayun megabang. 11 Su sawanen, subay gembasa dadema, kanaˈ melibak atawaka sempaun, mukaˈ meseligan dig launan baalen. 12 Ki nga megabang di kaunutan kia, diadia subay sala tawan dai sawanen mukaˈ metau meguit tu gapenen, tu ngag bataˈen. 13 Adin su megabang tu kaunutan mukaˈ melengasi kegabangen, naa subay pegbesaan gupia, mukaˈ kanaˈ mpiid megukit Gempia Petenday mekatag di kekpetuud ta dini Isukristu.
Su Tampusan Pisuun dinita di Kekpetuud ta
14 Naa su saanan ku sumulat di sulat kini, iini pedetengen ku, sunguu mangay tu niˈa, puˈ adun mekitaˈ ita. 15 Laak dagid, saˈ melanganu, mauyaˈan ku mesuunan mu su gempia pegbetaden nu nga meksalabuuk sumakup tu Megbebayaˈ. Puˈ ita nu pikumpungan nu nga sakupen, maaˈ ita nu salapenan nu Megbebayaˈ dinig lumbang kini, kig Diwata ndaˈi gumulen. Mukaˈ megunut tu metuud mekatag di Megbebayaˈ ki salapenanen kini, maaˈ nu pasek pemagen nug balay.
16 Naa, ki pisuun dinita kini nu Megbebayaˈ mekatag di kekpetuud ta, sug daansamaˈ pigbuni, tumuˈ ndaˈig labaw pa dun.
Kini si Kristu, kuminilawan gupia,
pinitaˈ nug Balakat nu Megbebayaˈ puˈ iini mekesuun,
minitaˈ dadema nu nga sesuguˈen nu Megbebayaˈ getaw langit.
Lineep ukitay dig launan bansa,
mituudan duni getaw di tibuuk benwa,
pitaas nu Megbebayaˈ puˈ pilentu ditug langit.