¹ Naa, pinluksad teluˈay nug Balakat nu Megbebayaˈ puˈ ditug binayaˈ gebii buˈ gendaw duuni nga suay di kekpetuud, puˈ ilan, pektalentenan nilan su ngag limbung mukaˈ su pekpetuˈun nu menenulay. ² Pengmetuudan ilan tu tayupiˈ nu ngag belusen, su getaw ndiˈ na metuuk dig delendemanen su melengas. ³ Tituluˈen nilan su nga getaw puˈ ndiˈ daw mpia mbelaˈi. Duun dadema dawi ndiˈ maˈaan pia laak binaal nu Megbebayaˈi gaan kia, adun medawat nu nga mekpetuud mukaˈ mekesuun tu metuud, saˈ laak mekpaladpalad ilan dun. ⁴ Puˈ melengas sug launan binaal nu Megbebayaˈ. Ndaˈiduni mpemilas dun, saˈ duaten di kekpaladpalad. ⁵ Iini ndiˈ mpemilas dun, puˈ tinaluˈ nu Megbebayaˈ mpia aanen, saˈ duaten di kenenabi.

⁶ Mendadi yaˈa, saˈ tituluˈ mu ia tu kepetedan ta, gempiaa sesuguˈen ni Kristu Isus. Megiseg dademai kesalig mu puun tu petenday pituud ta mukaˈ tu gempia tituluˈan dinunutan mu. ⁷ Laak pegliaw mui sagya gukiten ndaˈig labeten tu kekpetuud ta. Subay pepagen mu dig delendeman mu su mauyaˈan nu Megbebayaˈ. ⁸ Puˈ su kegalima dig lawas, duuni pantagen. Su kektituluˈ ta dig delendeman ta mauyaˈan nu Megbebayaˈ, labi pa, puˈ pedetengen ta mpianan ita dun nemun, mukaˈ ditug binayaˈ gebii buˈ gendaw mbianan ta ki ketubuˈ ta ndaˈ nai tamanen. ⁹ Meseligan dadema gupiai taluˈ kini mukaˈ mpia telimaˈen, ¹⁰ iini miksilasay ita dun mukaˈ miktegel ita dun baalen ta, puˈ seligan ta su tantu Megbebayaˈ, su Meglegawen di tibaˈan getaw, labi na su nga mekpetuud dun.

¹¹ Kaas, ki nga tinituluˈ kini, tituluˈ mu tu kepetedan ta.

¹² Naa saˈ sudiˈan ka puˈ begu getawa pa, ndiˈ mu penembaˈay, segaga baal mu lendasanig lawas mu tu nga mekpetuud, lendasan dig yaga mu, dig betad mu, dig lelaat mu, di meseligan ka, mukaˈ di kekesuun. ¹³ Penemalay mu besaay tu gedapan nu nga getaw su Misulat Taluˈ nu Megbebayaˈ, penemalay mu ukitay su Gempia Petenday, mukaˈ petuˈun mu sampay mekediinu. ¹⁴ Gamit mu su tinawan mu bigay diniˈa nug Balakat nu Megbebayaˈ su ketenduˈ diniˈa nu nga kaunutan mukaˈ kektaluˈ dadema nu pimuunan nu Megbebayaˈ dia saanan nug launan nilan dupen diniˈa. ¹⁵ Naa, su kebasa mu, su kaukit mu mukaˈ su petuˈun mu, penemalay mu penggulaulaay, adun medayag nug launan getaw puˈ megisegi kekpetuud mu. ¹⁶ Petubuday mu gupia su pegbetaden mu mukaˈ su pekpetuˈun mu, puˈ maˈantu megawen ka nu Megbebayaˈ, sug lawas mu sampay su nga mekineeg diniˈa.