¹ Naa, penengiin ku diniˈa maˈniin ita pegindeg di gedapan nu Megbebayaˈ mukaˈ ni Kristu Isus, su mukum pa di tibaˈan getaw tetubuˈ mukaˈ minatay, mukaˈ su mpuliˈ dinig lumbang adun meglekaunutan. ² Penengiin ku diniˈa, ukit mu su Gempia Petenday mekatag dini Kristu Isus. Lelayun mu ukitay, saˈ kineegan saˈ ndiˈ, pemeek mu su nga misayep, pengmetuuday mu ilan sampay penguliksegan ilan menggulaula melengas. Pengmiaˈmiaˈay mu ilan tituluˈay. Saanan mu mektituluˈ dun, subay kanaˈa sempaun. ³ Pemaˈniinen mu, puˈ duuni gendaw mateng, mpauk su nga getaw mekineeg tu gempia tituluˈan. Mauyaˈan nilan, pungunen nilani nga memintuluˈ adun mekpetuˈun dinilan, pia taˈ alanduni mauyaˈan nilan petuˈunay. ⁴ Teliudan nilan dadema su kekineeg nilan tu metuud. Metalin pailan, puˈ mekineeg ilan tu sagya gukiten laak. ⁵ Laak yaˈa pelum, guut muig delendeman mu pia taˈ alanduni kebetang mu. Pektigela di kelegenay mu. Peksitugesa megukit Gempia Petenday. Mukaˈ pekpelasen mu su pibaal diniˈa nu Megbebayaˈ.

⁶ Naa naan pasiˈ, sungu matengi gumulu, puˈ mbaalu maaˈ nu guliden gilak tu Megbebayaˈ, kanaˈ na maiben muliˈu tu niin. ⁷ Miksitugesu menggulaula tug launan pibaal dinaan, maˈniin gilaˈu gebekay sug lumbaˈ. Iningatu gupia su kekpetuud ta pisalig dinaan. ⁸ Mukaˈ nemun duun pai ginandam sugda tu kekesuun pigbetad. Megbegay dun dinaan su Kaunutan ta, puˈ saˈ iini mukum, ndiˈ meksulamig. Su gendaw mateng dini puliˈ, sugdaanu niin. Mukaˈ kanaˈ naan laak, sug launan mekpedateng diniin saˈ mpuliˈ.

⁹ Naa saˈ mesuˈat, ki kedini mu, ndiˈa peglanganlangan. ¹⁰ Puˈ si Demas, pisuayanu niin, puˈ mauyaˈanen tantu sug betad kinilawan. Miditu Tesalonica. Si Crescente, miditu Galacia, mukaˈ si Tito tug Dalmacia. ¹¹ Si Lucas laaki mibilin dinaan kini. Si Marcos, angay mu, uit mu dini, puˈ mekegabang gupia dinaan. ¹² Si Tiquico, sinuguˈu mangay ditug Efeso. ¹³ Naa yaˈa, saˈ mediniin ka, uit mu dinaan su melambung suubu mibilin diag balay ni Carpo ditu Troas, su nga sinulat dadema, labi na su nga sinulat di panit karniru.

¹⁴ Naa, si Alejandro su menensal putaw, piglegetanu niin gupia. Laak metau su Kaunutan ta si Kristu Isus di gembantang tu pinggulaula ni Alejandro dinaan. ¹⁵ Peglengilamay mu, puˈ pinemalanen kuntraay su ginukit ta mekatag dini Kristu Isus.

¹⁶ Naa, ki kasuu kini, sug bekna kedangat dinaan, ndaˈig dumau di gupidu, bilenganu nug launan dumau. Laak penenebiin ku, pedesunen ilan dun nu Megbebayaˈ. ¹⁷ Pia pisuayanu nilan, ibanganu gupia nu Kaunutan ta si Kristu Isus. Pisekegu niin, adun gelaˈen ku ukitay su Gempia Petenday, adun medengeg pelum nu nga kanaˈ getaw Judea. Iini ginawenu dun nu Kaunutan ta di ketipuayu. ¹⁸ Suunan ku gumawen dinaan dig launan melaat gulaula mukaˈ uitenu niin ditu Keglekaunutanen tug langit. Kaas, subay pegdedengegen iin di ndaˈi tamanen. Amen.

¹⁹ Si Priscila mukaˈ si Aquila kiin, simbayan ku ilan sampay su nga gapen ni Onesiforo. ²⁰ Si Erasto, mibilin ditu Corinto. Si Trofimo, binilin ku iin ditug lunsud Mileto puˈ migladu ma.

²¹ Saˈ mesuˈat, pededaliˈa medini sinegay ndiˈ pa matengi timpu metegdaw. Si Eubulo, si Prudente, si Lino mukaˈ si Claudia, mipenambaya nilan, sampay su ngag launan mimated di kekpetuud ta dini.

²² Penenebiin ku megduma di ginaa mu su Kaunutan ta. Penenebiin ku dadema mbianan nug launan niu su tulung nu Megbebayaˈ.

Daal daitu. Pablo