Mendadi, kini si Tito, sala di ngag limbang ni Pablo begudiin. Su kekpetuud ni Tito, begu getaw pain, laak ndaˈ maiben, mibaal kaunutan nu nga samasakupen. Binilin ni Pablo ditu puluˈ Creta, adun megabang di nga pikumpungan nu nga sakup ni Kristu dia. Piwitan ni Pablo sinulat kini, puˈ adun tituluˈ ni Pablo saˈ taˈ alanduni gempia pegbetaden nu nga pemiliˈen kaunutan di nga pikumpungan nu nga sakup, mukaˈ tituluˈen diniin dadema su gempia pegbetaden nu nga sakup sampay gempia kepemaag di nga memilas.