¹ Naa, su nga samasakup ta duma niu ditu, pektegyung mu ilan gupia puˈ subay petuuden nilan gusay su nga kaunutan meguit dig benwa, mukaˈ adin su gempia baalen, subay mauyaˈ nailan menggulaula dun. ² Tituluˈay mu ilan pagid puˈ subay ndiˈ nilan peksudiˈan su ngag duma, pia taˈ taway dun. Subay metau ilan mekpepia ginaa nug duma nilan, mukaˈ melilelaaten ilan, sampay mesumayaˈ ilan di tibaˈan getaw. ³ Puˈ ndiˈ ba metuud, begudiin pia ita, metegas gupiai gulu ta, mimilas ita mukaˈ piglimbungan ita nug duma? Maˈniin ita gulipen nu melaat gayak ta, kaas ndaˈi gikteb nu gininisan melaat gulaula ta, ndiˈ ba? Gebii gendaw sempaun ita mukaˈ mingimbegu ita, binanta ita nug duma, migbanta daita dema dinilan. ⁴ Laak pia maˈantu, ki Megbebayaˈ su Meglegawen dinita, duuni gendaw pinitaˈen dinita sug lelaaten mukaˈ petailanen dinita, ⁵ puˈ ginawen ita niin di salaˈ ta. Ginawen ita niin sabaˈ nug lelaaten, kanaˈ nu gempia gulaula ta. Ginawen ita niin pibian di kepawaˈ nug Balakat nu Megbebayaˈ tu kelemuˈay dig delendeman ta, mukaˈ pibian dadema di kebegay dinita nug Balakat nu Megbebayaˈ begu ketubuˈ. ⁶ Puˈ bigayen dinita tantu sug Balakat nu Megbebayaˈ pibian dini Isukristu, su Meglegawen dinita. ⁷ Kaas pimilang ita niin mekesuun puun tu tulungen, sampay mpeduunan ita ketubuˈ ndaˈi tamanen, su ketubuˈ pedetengen ta. ⁸ Meseligan tuˈui sinulatu kini.

Naa, ki tituluˈan ku kini, mauyaˈan ku tituluˈ mu gupia tu nga mikpetuud na ditu Megbebayaˈ, puˈ adun pektalentenan nilan baalay lelayun su gempia, su melengas mukaˈ su gembagel dademai pantagen dig launan getaw. ⁹ Laak pegliaw mu sug lantugiˈ, su metaas yaga mekatag di gesalan, su sualan mukaˈ samuk mekatag di Palinta nu Megbebayaˈ tu nga getaw Judea. Kia, ndaˈiduni gatagen. ¹⁰ Naa ki mikesabaˈ di kekpesuay di nga samasakup, pegaday mu. Saˈ puliˈanen pa dinilan mainsan, pegaday mu pa mainsan peluman. Genat nitu saˈ ndiˈ mesikpaˈ, utiday mu iin di pikumpungan niu. ¹¹ Puˈ mesuunan niu, mipenulay main, mpalas diniin su salaˈen.

¹² Naa si Artemas, suguˈen ku iin meditu niˈa. Saˈ kanaˈ ni Artemas, si Tiquico. Saˈ mateng dia niˈa, pegdedaliˈa panaw, puˈ dia ita peksungkak lunsud Nicopolis, puˈ pigdelendemu megbebenwau ditu selian metegdawig benwa. ¹³ Si Senas su gabugadu mukaˈ si Apolos, saˈ mpanaw ilan, ebangay mu ilan gikteb nu megaga mu meksangkap dig launan penguiten nilan, adun ndaˈi kulang dinilan. ¹⁴ Su nga samasakup ta ditu niu, subay meglegintau ilan meksituges menggulaula di gempia, adun mpegebangan nilan sug duma melauni kulangen. Saˈ maˈantu, duun nai pantag nilan.

¹⁵ Kig launan dumau dini, sinambaya nilan. Sambay mu dami dema di nga sambat nami miksalabuuk dinita di kekpetuud ta.

Penenebiin ku, mbianan nug launan niu su tulung nu Megbebayaˈ.

Daal daitu. Pablo