¹ Laak yaˈa, subay petuˈun mu su medunut di melegdeng tituluˈan. ² Naa maˈantu, su nga megulang laki, tituluˈ mu ilan diadia puˈ subay mekesuun, gembasa, mukaˈ metau meguit tug delendemanen. Teluˈay mu dadema penggengetenen gupia su kesaligen dini Kristu, su kepetailen tug duma, sampay su kektigelen di kelegenayen. ³ Maˈantu dadema su nga megulang libun pelum, tituluˈ mu ilan puˈ subay pegbetaden nilan sug leliagen dun su Megbebayaˈ. Ndiˈ ilan mpia menlibak, mukaˈ ndiˈ ilan mpia penenatan meginum. Subay tituluˈen nilan di gempia su ngag libun begu getaw pa, ⁴ adun meglegintau dailan dema mekpetail diadia tu sawanen mukaˈ tu ngag bataˈen. ⁵ Tituluˈen nilan su ngag libun begu getaw pa, adun meglegintau dailan pagid, diadia megbayaˈ tug delendemanen, megliaw gupia di melaat gulaula, mekesuun, mektagikul tug baalenen diag balay, sampay petuudenen su sawanen, adun pia taway dun, ndaˈi getaw mekesudiˈ di Gempia Petenday pimuun dinita nu Megbebayaˈ.

⁶ Naa, su ngag laki pelum begu getaw pa, tituluˈ mu ilan puˈ subay metau dailan dema megbayaˈ tug delendeman nilan. ⁷ Mukaˈ yaˈa Tito, baal mu gusay gempia lendasanig lawas mu dig launan gempia pegbetaden. Selian mu mektituluˈ, subay pektinantua mektituluˈ mukaˈ gembasaa. ⁸ Pektituluˈ mu su melegdeng adun ndaˈi meketaluˈ puˈ kanaˈ daw melegdeng, adun mpiid su kuminuntra diniˈa, puˈ ndaˈiduni metaluˈen melaat mekatag dinita.

⁹ Naa su nga gulipen, tituluˈ mu ilan puˈ subay petuuden nilan su gegalen nilan mukaˈ peleliagen nilan dig lumaun pibaal dinilan. Subay ndiˈ nilan sungalen su gegalen nilan, ¹⁰ mukaˈ ndiˈ nilan pegleksapen elapay sug danu gegalen nilan. Segaga penemalan nilan petuuday su gegalen nilan, adun mpaitaˈ nilan puˈ meseligan ilan gusay mukaˈ mekesuun. Ki tibaˈanen kia, puˈ adun mesuunan nu nga getaw puˈ melengasi tituluˈan ta mekatag di Megbebayaˈ, su Meglegawen dinita.

¹¹ Maˈantu, tituluˈ mu su nga samasakup mu, puˈ su tulung nu Megbebayaˈ, biwasanen na adun mesuˈat na megawen su kelaun kilawan. ¹² Pebian di tulungen, miktituluˈ dinita su Megbebayaˈ puˈ belengen tai pigbetad ta mpauk dun su Megbebayaˈ mukaˈ ndiˈ ta na pekpelasen su melaat gayak ta puun tu kekilawan ta, segaga meglegintau ita meksikesuun mukaˈ meguit ita delendeman ta, sampay pegbetaden ta sug leliagen dun su Megbebayaˈ saanan ta sumala megleketubuˈ di nga kilawan nemun. ¹³ Meglegintau ita dun saanan ta mekpelab di gendaw pedetengen ta medayag na tuˈu su kelengas nu pegbayaˈ nu tampusan Megbebayaˈ pektemuyen ta, si Isukristu su Meglegawen dinita. Leliagen ita gupia di gendaw kia puˈ mateng main. ¹⁴ Si Isukristu kini, bigayenig lawasen matay gumantiˈ di salaˈ ta, adun lekaten ita dig launan limbung ta, mukaˈ adun baalen ita niin gegulingen piglegetawanen, mekesuun ita mukaˈ mauyaˈan ta gupia penggulaulaan su gempia.

¹⁵ Kaas ki ngag launan tinituluˈu kini, tituluˈay mu dun su nga mikpetuud sampay pemaag mu su nga memilas tu metuud, gikteb nu pegbayaˈ mu. Ndiˈ mu begay petuyangen ka nu nga mikedengeg diniˈa, pia taˈ taway dun.