Naa kini si Filemon, mabuˈ iini megdedengeg sakup ni Kristu tug lunsud Colosas begudiin, timpu pa ni nga Pablo. Si Filemon, duuni gulipenen, ngalanen si Onesimo, laak mikelaguy si Onesimo di kaulipen diniin ni nga Filemon. Naa si Onesimo kini, su saanan ni Pablo mpirisu, milabeten dayun si Pablo ditu pirisuan. Dayun pibian dini Pablo, suminakup dadema dini Kristu si Onesimo. Di sinulat kini ni Pablo, minengi si Pablo dini Filemon puˈ dedialanen puliˈ sug daansamaˈ gulipenen si Onesimo, laak dagid kanaˈ na laak gulipenen, segaga pemilangenen na samasakupen dini Kristu mimated na diniin. Su ngalan “Onesimo,” guluganen di pikebitan nilan begudiin, ‘duuni gatagen.’