¹ Naa saˈ maˈantu, yamu nu nga kaunutan di nga pikumpungan suminakup, duun nai penengiin ku diniu, puˈ danaan, kaunutan dau dema maˈniin diniu. Puˈ miketakesiˈu di kekpeleget dini Kristu, mukaˈ mailasan mau dig dengeganen buˈ kegbasa diniin saˈ mbuasan na nu Megbebayaˈ. Kaas, iini penengiin ku diniu nu nga kaunutan, ² ki nga samasakup niu, tagikul niu ilan gupia, puˈ pisalig ilan diniu nu Megbebayaˈ, maaˈ ilan nu nga karniru nu Megbebayaˈ. Kaas, ingat niu ilan gupia meksekat di mauyaˈan niu megabang dinilan, kanaˈ puun di kekpetegel diniu, kanaˈ dadema puun di tindan diniu, puˈ kiai mauyaˈan nu Megbebayaˈ. ³ Ndiˈ niu petegasayi keguit niu di nga pisalig diniu, segaga pegbetad niu lelayun su mbaal gempia lendasan nilan. ⁴ Dayun saˈ metuaˈ su Tampusan Megingat, sugdaan amu niin di kelengasen mukaˈ dengeganen ndiˈ megengkan.

⁵ Yamu pelum nu ngag begu getaw, maˈantu damu dema, subay mekpetuud amu tu nga megulang pa dun diniu. Sampay launan niu, diadia subay pebebaˈenenig lawasen tu ngag dumanen, adun mektinebangay amu gupia, puˈ ndaˈ ba mesulat di Misulat Taluˈ nu Megbebayaˈ, “Su mekpelabawlabaw getaw, teliudan nu Megbebayaˈ, laak begayanen tulungen su nga mekpebabaˈ di ginaa nilan.” ⁶ Kaas subay mekpebabaˈ amu gusay tu Megbebayaˈ, su tampusan ginuungan, adun petaasen amu niin di gendaw pinasaden. ⁷ Pegwakil niu diniin su kelaun kelibuleng niu, puˈ iin, mektagikul diniu.

⁸ Naa, guut niuig delendeman niu, peglengilam damu dema, puˈ duuni kuntra niu, su Palin. Peglibedlibed iin pekpenengaw mpeteliuden tu Megbebayaˈ maaˈ nug limaung pekpemunggaul pekpenengaw depaˈenen. ⁹ Naa, pepagen niui kesalig niu mukaˈ pengetuay niu su Palin, puˈ misuunan niu puˈ su nga samasakup ta dini tibuukan lumbang, mbianan pa nilan kelegenay maaˈ nug daniu. ¹⁰ Dayun su Megbebayaˈ, saˈ mbianan niui kelegenay ndiˈ maiben, petindegenen su kekpetuud niu, pepegenenen su kesalig niu, sampay pepentekenen su sinuunan niu mekatag di metuud, puˈ iini metau megbegay launan tulung tu nga sakupen. Iin dademai migenggat diniu mpeduma tu kelengasen mukaˈ tu kegdedengegen ndaˈi tamanen, miksekat di keksalabuuk niu dini Kristu. ¹¹ Subay penalan iin, puˈ daniin su ginuung di ndaˈi tamanen! Amen.

¹² Naa dini gempelek sulat kini, mikpaingabangu dun dini Silas. Iin, pimilangu meseligan mimated dinita. Piwitu diniu ki sulat kini, adun uliksegen ku amu sumalig gusay ditu Megbebayaˈ, mukaˈ adun pesuun ku dadema diniu puˈ ki tituluˈan ku diniu kini, iin su tantu tulung nu Megbebayaˈ. Kaas subay pepenggengeten niu dig delendeman niu.

¹³ Naa, sinambay amu nug duma niu mekumpung dini syudad Babilonia, su nga pimiliˈ dadema nu Megbebayaˈ mbaal sakupen. Sinambay damu dema ni Marcos, kig lepeng bataˈu. ¹⁴ Adun paitaˈ niu su kekpinetailay niu, peglekumustaay amu mbantang tu nga pinaas nu Megbebayaˈ daniin getaw.

Penenebiin ku, ki pianan ginaa, ndiˈ suay diniu, saladuaˈ, yamu nu nga sakup ni Kristu.

Daal daitu. Pedro