¹ Naa kagina miktigel si Kristu di mesait, yamu dadema, subay mengandam amu di kepesait diniu, puˈ saˈ mektigeli getaw di kelegenayen, tumiliud na di salaˈ. ² Kaas genat nandaw, subay mektetubuˈ amu dinig dibabaw lumbang puun tu mauyaˈan nu Megbebayaˈ, sabayaˈ tu gayak niu kinilawan. ³ Sanipuˈ na su minayan pigbetad niu, saˈ minggulaula pamu nga gayak nu nga ndiˈ mekpetuud tu Megbebayaˈ. Iini pigbetad niu kia, midusa amu, miayak amu di mekepiidpiid, tatap amu megbebulek, pinenatan damu dema meglekebibu, sampay miktamuy amu tug ledawan ndiˈ tanan sindapan nu Megbebayaˈ. ⁴ Kaas nemun su ngag duma niu ndiˈ mekpetuud tu Megbebayaˈ, misebuˈan nailan dun puˈ mauma ndiˈ namu megduma dinilan meglekebibu, kaas piksudiˈan amu nilan. ⁵ Laak duuni gendaw subay menembag ilan ditu gedapan nu Megbebayaˈ, su minuyaˈ na mengukum tu nga getaw tetubuˈ pa sampay su nga mimatay na. ⁶ Kaas pia su nga mimatay na, su nga mikebian na di ginukuman dinilan dengantu su saanan nilan tetubuˈ pa, iini miukitan ilan dun Gempia Petenday, adun metubuˈ dailan dema, maaˈ nu ketubuˈ nu Megbebayaˈ. Puˈ mbianan dadema nug launan getaw ki ginukuman kia.

⁷ Naa mendadi, sungu na melengkebig benwa. Kaas subay metau amu megbayaˈ di ginaa niu mukaˈ meguit tug delendeman niu, adun mekenenabi amu tu Megbebayaˈ. ⁸ Pidag pa tanan subay kanaˈ duaˈduaˈi kekpinetailay niu, puˈ ki kekpinetailay, iini mekpetuyang di metibaˈ salaˈ nu nga samataw niu. ⁹ Pektinelimaˈay amu pa pagid dia ngag balay niu, mukaˈ ndiˈ amu megdialem ginaa.

¹⁰ Naa kagina bigayan amu nu Megbebayaˈ tinawan, diadia subay gemitenen su tinawanen di gabangen tu nga samasakupen, puˈ saˈ maˈantu, gempia seligan nu Megbebayaˈ. ¹¹ Pinenggiˈ saˈ duunig bigayan tinawanen megwali, subay pegweliinen tuˈu su taluˈ nu Megbebayaˈ. Adin dema sug bigayan tinawan megabang di nga samatawen, subay megabang da di gikteb megaganen bigay dun nu Megbebayaˈ. Kaas sug lumaun baalen niu, pegbetad niu su megleep dun sug dengegan nu Megbebayaˈ puun dini Isukristu. Puˈ daniin su gempia dengegan mukaˈ ginuung di ndaˈi tamanen! Amen.

¹² Naa, yamu nga petailen ku, ndiˈ amu melibuleng di nga meliget pengindan diniu pektigelen niu nemun, puˈ kia, subay mbianan nu nga sakup ni Kristu. ¹³ Sinangkaliˈ pa tanan, subay leliagen amu di keksaliunung niu di kelegenay ni Kristu, adun mpenggangetig leliag niu ditug binayaˈ gebii buˈ gendaw saˈ medayag na nu tibaˈan getaw su kelengas nu pegbayaˈ ni Kristu. ¹⁴ Naa, saˈ iini tampalaksaan amu dun nu getaw puˈ sakup amu ni Kristu, leliagen namu, puˈ guluganen luminusad na diniu su ginuungan mukaˈ melengas Balakat nu Megbebayaˈ, mukaˈ ndiˈ na mawaˈ diniu. ¹⁵ Asa ndiˈ mpia saˈ duun diniui melegenan, iini sabaˈen puˈ mimunuˈan atawaka migdaaw atawaka mimilas tug betad atawaka menginampen tu ndaˈig labeten dun. ¹⁶ Laak saˈ melegenan amu pasiˈ puun tu kesakup niu dini Kristu, naa ndiˈ amu mpiid dun, segaga pekpeladpeladan niu su Megbebayaˈ, puˈ diin namu gengkeman ni Kristu.

¹⁷ Naa, minateng nai gendaw mekpuun na mengukum su Megbebayaˈ di tibaˈan getaw. Mukaˈ iini unaanen ukumay, ita nga suminakup diniin. Kumalenged itai unaanen ukumay, ndiˈ ba labi na meligeti mpenggulaula nu nga ndaˈ pekpetuud di Gempia Petenday genat tu Megbebayaˈ, saˈ ilan nai ukuman? ¹⁸ Maˈantu, ndaˈ ba mesulat di Misulat Taluˈ nu Megbebayaˈ,