¹ Diniu nga samasakupu dini Kristu,

Naan si Simon Pedro, sesuguˈen ni Isukristu mukaˈ peneliganen. Yamu nu nga piwitan ku sulat, melagaˈi kekpetuud niu maaˈ danami, kig bigay dinita puun tu kekesuun ni Isukristu, su Megbebayaˈ Meglegawen dinita.

² Penenebiin ku megisegi tulungen mukaˈ pianan ginaa mbianan niu puun tu kesambat niu tu Megbebayaˈ mukaˈ dini Isus, su Kaunutan ta.

³ Naa kig launan begay dinita nu Megbebayaˈ adun mpeduma ita tug begu ketubuˈ mukaˈ megaga ta pegbetaday su mauyaˈanen, lumbus bigayen da dinita miksekat di ginuungen. Bigayen dinita pibian di sinuunan ta mekatag diniin, su migenggat dinita adun mpeduma daita dema tug dengeganen mukaˈ tu kekesuunen. ⁴ Maˈantu bigayen dinita su nga melengas gupia tulungen pinasaden dinita, adun mekegliaw ita di melaat gayak nu kilawan pangay di kepatay, mukaˈ adun mpeduma ita di gasal nu Megbebayaˈ pebian di tulungen kia. ⁵ Kaas, gempia niu ektakeni tegel niu, adun mpeduma di kekpetuud niu dini Isus su kekesuun. Pektegel amu namal, adun mpeduma dadema di kekesuun niu su tinawan di gempia pegbetaden. ⁶ Mukaˈ padun tegel pamu dema, adun mpeduma di tinawan niu su kegbenaˈbenaˈ di gayak niu, mukaˈ mpeduma di kegbenaˈbenaˈ niu su kektigel niu di kelegenay, sampay mpeduma di kektigel niu su kegbasa tu Megbebayaˈ. ⁷ Tigaˈwan, pektegel amu, adun mpeduma di kegbasa niu tu Megbebayaˈ su kepetail di nga samasakup niu dini Isus, mukaˈ mpeduma di kepetail niu di nga samasakup su kepetail di nga tibaˈan getaw. ⁸ Mendadi saˈ kiaig betad niu, mukaˈ menamal pamu, naa gembageli pantagen su kesambat niu di Kaunutan ta si Isukristu. ⁹ Laak dagid, saˈ duuni getaw kulang di ngag betad kia, iini maˈniin buta, puˈ ndiˈen maitaˈi gunaanen, puˈ ndiˈen mesuunan saˈ taˈ alanduni gempia pebegelen dig delendemanen, mukaˈ milingawanen puˈ pidasun nain di salaˈen.

¹⁰ Kaas, yamu nga kepetedan ku, ki tinituluˈu kini, penemalay niu pektalentenay, adun mekpalas tuˈu sug delendeman nu Megbebayaˈ su kenggaten buˈ ketenduˈen diniu. Puˈ saˈ pektalentenan niu, ndiˈ niu mbeleng su kekpetuud niu. ¹¹ Maˈantu begay tuˈu nu Megbebayaˈ diniu mekesakup amu tu Keglekaunutan nu Kaunutan ta su Meglegawen dinita si Isukristu, ditu Keglekaunutanen ndaˈi tamanen.

¹² Iini pigdelendemu dun tegyungen ku amu lelayun, mektalenten amu di tinituluˈu kini, pia misuunan niu daan mukaˈ mingganget na tantu dig delendeman niu su metuud dinawat niu. ¹³ Laung ku gempia tegyungen ku amu sinegay tetubuˈ pau. ¹⁴ Puˈ daan na pisuun dinaan nu Kaunutan ta si Isukristu, puˈ ndiˈ na maiben, meteliudan ku nai kegleketubuˈu dinig dibabaw benwa. ¹⁵ Kaas, adin su gempia penggulaulaan ku adun medelendem niu lelayuni tinituluˈu kini saˈ ndaˈ nau, gikteb di megagau, penemalan ku gulaulaay.

¹⁶ Naa, su kepesuun nami diniu puˈ metaasi ginuung nu Kaunutan ta si Isukristu mukaˈ duuni gendaw lumusad iin puliˈ, naa, ndaˈ nami peksekatay di kutian laak guksugan. Segaga inukit nami diniu su ketaas ni Kristu miduaˈ mata nami. ¹⁷ Puˈ ditu ami gupia su kepepegbasa buˈ kepenal dini Kristu nu Gamaˈen Megbebayaˈ, puˈ duuni taluˈ genat tu Tampusan Metaas Diwata ditu gekbus langit, laungen, “Kini su petailen ku Bataˈu leliagenu dun gupia.” ¹⁸ Yami daanig duma ni Kristu ditug bentud kiin pimilang na “danug Megbebayaˈ,” kaas miketakesiˈ ami buˈ mikedengeg ami tu taluˈ kiin genat tug langit.

¹⁹ Kaas su tinaluˈ nu Megbebayaˈ ditu nga pimuunanen begudiin mekatag dini Kristu, migisegi kesalig ta dun sabaˈ nu minitaˈ buˈ midengeg nami ditug bentud. Yamu dema, gempia niu pektalentenan gupiai tinaluˈ kiin misulat na, puˈ iini maaˈ nu suluˈ tuiag dia medelem, sampay subangi pemulaw di putiˈ delagay, saˈitada sampay lumusad puliˈ su Kaunutan ta, mukaˈ pedelaganen dayunig delendeman niu. ²⁰ Mukaˈ padun, pebagel niu dig delendeman niu ini, puˈ su taluˈ sinulat nu nga pimuunan nu Megbebayaˈ, kanaˈ ilani pigenatanen. ²¹ Puˈ begudiin su nga pimuunanen, miktaluˈ ilan pedaan di mpenggulaula ditug binayaˈ gebii buˈ gendaw. Naa, su pitenday nilan, kanaˈ puun dig delendeman kilawan, segaga sug Balakat nu Megbebayaˈ, mikpetaluˈ dun dinilan su taluˈ nu Megbebayaˈ.