Begudiin, su dini pa lumbang si Isukristu, sala nu nga miktuˈun dini Isus, si Pedro. Si Pedro kini, mibaal peneligan ni Isus. Benaˈ pilentu si Isus ditug langit, iin sug duma nu nga peneligan ni Kristu megukit Gempia Petenday ditug lunsud Jerusalem mukaˈ meguit tu nga samasakup nilan dia. Iin dademaig bekna megukit di Gempia Petenday tu nga kanaˈ getaw Judea.

Naa, duuni melaun mikpetuud dini Isus begudiin mipelak di nga melayuˈ benwa sabaˈ nu kepeleget dinilan. Ki nga mikpetuud kini, iini pilegetan ilan dun, puˈ laung dun nu nga sama kilawan nilan, mikesayep mailan. Su saanan nilan dia ngag lain benwa, taang dun, pilegetan dailan dema, kaas mikpuit si Pedro dinilan sulat, adun pekemuˈenen ilan mukaˈ penguliksegenen su kesakup nilan dini Isus. Tinituluˈ ni Pedro puˈ subay leliagen ilan dun su kegleget dinilan, puˈ mikpuun tu kesakup nilan dini Isus. Piktuˈunen dinilan puˈ ndiˈ ilan mbelengan ni Kristu. Pidag pa tanan, ditug binayaˈ gebii buˈ gendaw, sugdaan ilan nu Gamaˈ nilan Megbebayaˈ, saˈ ndiˈ nilan iin teliudan. Tinituluˈen ilan puˈ subay pegbetaden nilan su melengas da. Tinituluˈen dailan dema puˈ subay meksalabuuk ilan, mekpinetailay ilan sampay mektinebangay ilan sekat tu tinawan bigay dinilan nug Balakat nu Megbebayaˈ. Subay pegliaun nilan sungkin su melaaten, saˈitada ndiˈ ilan megbanta, kanaˈ ilan mesaku, ndiˈ ilan meksudiˈ di samataw nilan mukaˈ ndiˈ ilan megdusa. Puˈ ilani pimiliˈ nu Megbebayaˈ daniin gupia sakup, binaalen ilan ngag belian mektamuy dini Kristu sampay pinaasen ilan di ngag lain getaw nga piglegetawanen gupia.

Naa, mbasa niu mekatag di ngag lain mipenggulaula ni Pedro dia nga Gempia Petenday sinulat ni Mateo, sinulat ni Marcos, sinulat ni Lucas, sinulat ni Juan sampay dia Nga Pinggulaula nu nga Peneligan ni Isukristu, mukaˈ misugat gupia dia Lucas 5.1-11; 9.18-36; Juan 21.1-19; Ki nga Pinggulaula 2.14-42 mukaˈ 10.1-48.