¹ Naa, nemun duuni metuaˈ dia niu, ki nga mekpetuˈun dig balus sinuguˈ daw nu Megbebayaˈ, maaˈ nu ketuaˈ nu tautau pimuunan nu Megbebayaˈ dengantu. Saˈ metuaˈ na ki nga mekpetuˈun kini, petuˈun nilanig balus, ki tituluˈan mekepebeleng di kesalig nu nga petuˈunan. Teliudan nilan padun su Kaunutan meglekat dinilan, kaas metekawan ilan pelebuˈay. ² Pia maˈantu, duun pai melaun menunggiling di kegdusa nu nga mekpetuˈun dig balus, kaas peksudiˈan nu getaw su metuud bianan. ³ Kagina mesaku ma su nga mekpetuˈun kia, peglimbungan amu nilan, adun menelapiˈ ilan pebian di gukiten diniu pembaalbaalen nilan. Asa miniben na daan inandam nu Megbebayaˈ su ginukumanen dinilan, kaas miuyaˈ nailan pelebuˈay.

⁴ Naa, ndiˈ ba metuud, su nga sesuguˈen nu Megbebayaˈ getaw langit, saˈ mikesalaˈ ilan, ndaˈ ilan lelaatay nu Megbebayaˈ? Sinangkaliˈ, linabuˈen ilan ditug linaw gapuy, tandaˈ ilan pemikutay ditu medelem sampay matengi gendaw pengukumenen ilan. ⁵ Su nga miuna kilawan kanugdiin pelum, ndaˈ dailan dema lelaatay nu Megbebayaˈ, sinangkaliˈ pibegyuanen sug lumbang sabaˈ melaati gulaula nu nga getaw kia mpauk megbasa tu Megbebayaˈ. Iin laaki ginawenen si nga Noe, su migwali tu kekesuun, mukaˈ duun pai pitu tawan dumanen. ⁶ Su nga getaw dig lunsud Sodoma buˈ lunsud Gomora, inukuman dailan dema nu Megbebayaˈ, saˈitada pilebuˈanen ilan gapuy sampay migelaˈ ilan mpangus. Maˈantu mibaal ilan lendasan di mpenggulaula nu nga getaw mpauk megbasa tu Megbebayaˈ. ⁷ Si Lot laaki ginawenen tu gapuy kitu, iini mekesuun getaw, milibuleng gusay ditu kegdusa nu nga melaat getaw ditu. ⁸ Kagina miksalabuuk dinilan megbenwa si Lot ditug lunsud kiin, milegenan patiˈ gebii gendaw, benaˈ minitaˈen mukaˈ midengegen su melaat gulaula nilan puun tu kemilas nilan tu Megbebayaˈ. ⁹ Naa mendadi, kumalenged maˈantui pinggulaula nu Kaunutan ta, metau gumawen di nga mekesuun getaw tu nga kektilis dinilan, mukaˈ pempikutanen pa silutay su nga melaat getaw, sampay matengi Gendaw nu Kengukumen. ¹⁰ Labi na su nga getaw bigay nilan su nga gayak nilan kinilawani meguit dinilan mukaˈ mekpetuyang ilan di pegbayaˈ nu Megbebayaˈ, pemaˈantuunen dailan dema.

Naa, ki nga mekpetuˈun kini dig balus, ndaˈig betad nilan. Mekpelabawlabaw ilan, ndiˈ nilan pegbesaan su nga melengas gupia getaw langit, sinangkaliˈ peksudiˈan nilan. ¹¹ Su nga sesuguˈen nu Megbebayaˈ getaw langit, metaas pai pegbayaˈ nilan di pegbayaˈ nu nga mekpetuˈun dig balus. Laak pia ilan, ndiˈ nilan makuˈ peksudiˈan mukaˈ dengaten dia gedapan nu Kaunutan su nga metaas samataw nilan. ¹² Laak ki nga mekpetuˈun dig balus, petanggiˈu ilan di nga malig metetubuˈ ndiˈ mekegdelendem, mukaˈ megigetaw puˈ adun laak maukus dayun titiˈay. Puˈ adin su ndiˈ nilan mesabut, peksudiˈan nilan. Deksuˈanen ia, petain ilan maaˈ dadema nu kepatay di malig metetubuˈ. ¹³ Pelegetan pailan, sugda tu kekpeleget nilan tu nga samataw nilan. Leliagen ilan dun adin su ndiˈ meketemel di gayak nug lawas nilan, pia gembagel gendaw. Maˈantu, binuung nilan sug bansa niu, sumalu ilan diniu meglumpuk maan, saˈitada, leliagen ilan dun su ngag limbung nilan. ¹⁴ Ndaˈidunig lain penengaun nilan, su da laak ngag libun tebiaˈ meglaat pekesuunan, puˈ ndiˈ ilan penlukasen di ngag laat gulaula nilan. Pegekalan nilan su mekelukaˈig delendemanen, adun mpeduma dinilan. Mitagam di kesaku sug delendeman nilan. Kaas daan nailan inukuman nu Megbebayaˈ lagaˈ na ginaa nilan. ¹⁵ Puˈ tuminalin ilan tu melegdeng bianan, kaas migdalaˈdalaˈi pigbetad nilan, iini sama nilan si Balaam begudiin, su tautau pimuunan nu Megbebayaˈ. Si Balaam kiin, bataˈ ni Bosor, miayak gupia tu selapiˈ tindan sia dig limbungen. ¹⁶ Laak iin, pipemaag nu Megbebayaˈ di taluˈ nug asno sikayanen pibian di tingeg getaw, pia ndiˈ metau mektaluˈig asno. Bilibadan nu sikayanen asno tug limbung sia nu pimuunan nu Megbebayaˈ kiin.+\fr 2:16 \ft Ki sektaang taluˈ kini asno, ginis petubuˈen nu getaw maaˈ danu kebayuˈ.

¹⁷ Naa, ki nga mekpetuˈun dig balus, pitanggiˈu ilan pa pagid di nga tebud mitian. Maaˈ dailan dema nu nga megdelem mpalid salindapak, puˈ ndiˈ mekpalas su pedetengen nu getaw dinilan. Kaas inandam na nu Megbebayaˈ su pegbenwanan nilan ditu medalem medelem. ¹⁸ Pegdaangan nilan pa pagid su ngag begu miketeliud di nga menggulaula melaat, pebian di takabul nilan mukaˈ di kegdusa nilan, puˈ gempia laung su gayak nug lawas getaw. ¹⁹ Teluˈen nilan puˈ su nga getaw pegdaangan nilan, mekenggulaula ilan melaat di ndaˈi sugda dun, saˈitada mekeliu ilan di ginukuman dun. Laak dagid ki nga mekpetuˈun dig balus mektaluˈ dun, ndiˈ ilan mekeliu di gasal nilan mekenggulaula melaat pangay di kepatay. Gulipen mailan nu melaat betad nilan. Puˈ adini getaw miulakan nug duma, mbaal gulipen nu mikaulak dun. ²⁰ Naa, ki nga mekpetuˈun dig balus, saˈ mikegliaw ilan pasiˈ di kegdaang kinilawan meksekat di sinuunan nilan mekatag di Kaunutan ta mukaˈ Meglegawen dinita si Isukristu, saˈ pegdaangan nailan puliˈ sampay maulakan ilan tantu, naa melaat gupiai kebetang nilan. Minget melaat pai kebetang nilan batul nu kebetang nilan su ndaˈ pailan sakup. ²¹ Tumuˈ pa ndaˈ nilan sia mesuunay sug bianan di kekesuun, sabayaˈ di misuunan na nilan, dayun teliudan nilan su pinalinta dinilan nu Megbebayaˈ. ²² Puun di mipenggulaula nilan, gempantek su peneluˈen puˈ su gituˈ, aanenen su gutaˈen, mukaˈ su sala pa peneluˈen, sug babuy, mitubus na peliguˈay, lubug pa puliˈ dig basak.