¹ Naa uu Mingumpated petailen ku, kini nai keduaˈ sulaten piwitu diniu. Iini piwitu dun sug duaˈ, puˈ adun pedelendemu diniu sug daan na niu misuunan di ndiˈ megduaˈduaˈig delendeman niu dun, kaas pektegyungen ku gusay diniu. ² Mauyaˈan ku medelendem niu su Taluˈ nu Megbebayaˈ pisulaten di nga pimuunanen pimiliˈen dengantu, sampay su pinalinta nu Kaunutan su Meglegawen, pitenday diniu nu nga peneliganen dia niu.

³ Bekna, subay mesuunan niu puˈ saˈ sungu melengkebig benwa, duuni nga getaw metuaˈ, megbayaˈ dig delendeman nilan su da melaat gayak nilan. Peksudawan nilan gupia su kekpedateng niu di kepuliˈ dini nu Kaunutan, ⁴ puˈ saaken nilan, “Kitu, ndaˈen ba pasad mpuliˈ dini? Naa, adin ma saan itu? Ndiˈ lai mpuliˈ, puˈ sikna na minatay su nga ginepuˈay nami, ndaˈidun pai mpalin. Pidag pa tanan, sikna biwat nu Megbebayaˈ su gekleb langit buˈ lupaˈ, ndaˈidun pai mpalin.” ⁵ Naa maˈantu, ki meksudaw diniu kia, pituyang nilan puˈ dengantu lemen laak miktaluˈ su Megbebayaˈ, mituaˈ dayun su gekleb langit buˈ lupaˈ. Su pigenatan nug lumbang, tubig, mukaˈ tubig dademaig bian nu Megbebayaˈ maal dun. ⁶ Pibian pa pagid di tubig, saˈitada sug bagyu lampap, pilebuˈan tanan nu Megbebayaˈ su tibuuk lumbang dengantu. ⁷ Naa nandaw, kini pai gekleb langit buˈ lupaˈ, mukaˈ pegingaten pa gusay nu taluˈ nug Diwata Megbebayaˈ sampay di gendaw pengukuman nu Megbebayaˈ su nga getaw mpauk megbasa diniin. Pelebuˈanen ilan dayun, puˈ tutungen gelaˈ su gekleb langit buˈ lupaˈ.

⁸ Laak, yamu nga petailen ku, ndiˈ niu selingaway puˈ su sendaw mukaˈ su sengibu taun, pemilangen nu Kaunutan mesama da. ⁹ Kaas ndiˈ niu delendemay puˈ melangani Kaunutan ta mekpenuud di pinasaden, pia laung dun nu getaw puˈ melangan iin. Segaga pektigel diniu su Kaunutan, puˈ mpauk saˈ duuni simawiˈ mbeleng. Mauyaˈanen gupia megbiksuˈ su tibaˈan getaw mukaˈ teliudan nilan su nga salaˈ nilan.

¹⁰ Laak su Kaunutan, mpuliˈ tuˈu. Mateng maaˈ nu ketuaˈ nu megdaaw. Mukaˈ di gendaw kiin, su ngag langit, malep, medunutan deguk. Su ngag lumbang buˈ bitun dig langit, metutung gelaˈ, meglaat tantu, sampay kig lumbang ta kini mukaˈ sug lumaun bitang dun, megelaˈ malep. ¹¹ Mendadi, kagina megelaˈ malep su ngag launan bitang lumibut dinita, taˈ mai gempia niu pegbetaden? Naa, subay meksikesuun amu mukaˈ pegwakil niuig lawas niu tu Megbebayaˈ, ¹² segay niu megelat tu gendaw lumusad puliˈ su Kaunutan ta mukaˈ mengukum su Megbebayaˈ. Gelaˈ niui tegel niu di pibaal dinita nu Megbebayaˈ adun mateng ganam ki gendaw kia. Saˈ mateng na ki gendaw kia, metutung su ngag langit mukaˈ mpupus, puˈ malep su ngag lumbang buˈ ngag bitun diag langit sabaˈ kainiten. ¹³ Pia maˈantu, pedetengen ta duunig begu langit buˈ lupaˈ, puˈ kiai pinasad nu Megbebayaˈ, kiai pegbenwanan laak nu nga mekesuun.

¹⁴ Kaas, yamu nga Mingumpated petailen ku, sinegay niu megelat di gendaw kiin, ektak niu gupiai tegel niu, adun pemilang amu nu Megbebayaˈ ndaˈi melaat melamug di pegbetaden niu, mukaˈ adun kanaˈ amu medangat, puˈ miksalabuuk namu diniin. ¹⁵ Pemilang niui kektigel diniu nu Kaunutan sikaw niu bigayen diniu, adun megawen amu. Maˈnia dademaig bitang ditu sulat piwit diniu nu petailen mimated dinita si Pablo, puun di tinawan bigay nu Megbebayaˈ diniin. ¹⁶ Naa iin, bitangen dig launan sulaten ki gempia pegbetaden kia. Metuud daan, sug duma sulaten, melegen mesabut, pingmaˈanan nu nga ndaˈi sabuten buˈ nga mengaan gukiten, balus. Pimaˈantu nilan dadema su ngag duma sinulat di Misulat Taluˈ nu Megbebayaˈ. Saˈ maˈantu, pegegaken nilani ginaa nilan tu ketipuan nilan.

¹⁷ Kaas, yamu nga Mingumpated petailen ku, kagina daan na niu misuunan ia, ingat niu namalig delendeman niu, adun ndiˈ amu mpegdaangan nu nga medupang getaw pebian di nga gembagel sayep nilan di metuud, mukaˈ adun ndiˈ megduaˈduaˈig delendeman niu tu metuud tituluˈan dunutan na niu. ¹⁸ Sinangkaliˈ pa tanan, subay mbianan niu namal su tulung nu Kaunutan ta Meglegawen dinita, si Isukristu. Subay megiseg dademai kesambat niu diniin. Subay penalan iin nu ngag launan bitang nandaw mukaˈ di ndaˈi tamanen! Amen.

Daal daitu. Pedro