¹ Talentenay niu ini. Milelaat gupia dinita su Gamaˈ ta puˈ iningelanan ita niin bataˈen, puˈ bataˈ ita niin tuˈu. Kaas su nga getaw sakup dig betad kinilawan, ndaˈ nilan mesabut sug betad ta. Puˈ ndaˈ da nilan dema mesabut sug betad nu Megbebayaˈ. ² Laak iini teluˈen ku diniu nga sambatu petailen ku, bataˈ naita nu Megbebayaˈ, laak ndiˈ ta mesuunan su kepalinen pa dinita dig binayaˈ gebii buˈ gendaw. Laak dagid misuunan ta, saˈ metuaˈ puliˈ si Kristu, maitaˈ ta tuˈu iin, dayun sug delendeman ta, mpalin, maaˈ na nug delendeman ni Kristu. ³ Kaas adin su getaw mekpedateng di ketuaˈ puliˈ ni Kristu, mektalenten tug betaden, adun mekesuun, maaˈ nu kekesuun ni Kristu.

⁴ Laak dagid adin su getaw mekesalaˈ, mimilas tu Megbebayaˈ, puˈ kig betad mekesalaˈ, iin su kemilas tu pinalinta nu Megbebayaˈ. ⁵ Laak misuunan niu puˈ si Kristu, iini mituaˈ dun dinig lumbang, puˈ adun uaˈenen su salaˈ nu nga getaw. Puˈ iin, kanaˈ mekesalaˈ, pia maikaˈ. ⁶ Kaas adin su getaw suminalabuuk na dini Kristu, ndiˈ na gusay mekesalaˈ. Dagid su getaw menamal megbaal salaˈen, ndaˈen mesabut sug betad ni Kristu, mukaˈ ndaˈ dadema sambat diniin.

⁷ Yamu nu ngag lepeng bataˈu, ndiˈ amu pekpetuud dig balus! Iini petuud niu su mekesuun getaw. Mailala niu su mekesuun getaw, puˈ su penggulaulanen, melengas maaˈ nug betad ni Kristu. ⁸ Laak su getaw menamal megbaal salaˈen, iini sakup nu Palin, puˈ su Palin, genat tu pikpuunan, ndaˈig lain baalenen, mekesalaˈ. Kaas iini midini dun lumbang sug Bataˈ nu Megbebayaˈ, puˈ adun uaˈenen sug launan baalen nu Palin.

⁹ Maˈantu su ngag bataˈ nu Megbebayaˈ, ndiˈ ilan menamal mekesalaˈ, puˈ su gasal nilan, maˈniin dadema nu gasal nu Megbebayaˈ. Kagina su Megbebayaˈi Gamaˈ nilan, ndiˈ ilan gusay mekesalaˈ. ¹⁰ Mailala ta su ngag bataˈ nu Megbebayaˈ mukaˈ sug bataˈ nu Palin. Puˈ saˈ duuni getaw kanaˈ mekesuun puˈ ndiˈen petailenig dumanen, iin, kanaˈ bataˈ nu Megbebayaˈ.

¹¹ Mendadi iini pitenday diniu kanugdiin sampay nandaw, ita, subay mekpinetailay ita. ¹² Ndiˈ ta penunggilingan si Cain kanugdiin, kig bataˈ ni Adan kiin. Puˈ iin, suminakup tu Palin, kaas binunuˈen su ngudanen, si Abel, kanaˈ malangalang putulpuseden gupia. Saˈ saaken ta, “Mauma binunuˈen?” iini binunuˈen dun, puˈ su ngudanen, melengasig betaden, batul daniin. Puˈ si Cain, melaati gulaulanen.

¹³ Yamu nga kepetedan ku, saˈ maˈantu, ndiˈ amu mesebuˈan dun, saˈ mesengay amu nu nga getaw sakup dig betad kinilawan. ¹⁴ Puˈ misuunan niu puˈ ita, ndiˈ ta na mbianan su kepatay ndaˈi tamanen, puˈ suminakup naita tu ketubuˈ ndaˈi tamanen. Iini tuˈus ta dun, petailen ta su nga samasakup ta. Adin su getaw ndiˈen petailen sug dumanen, iin, suminakup pa tu kepatay. ¹⁵ Mukaˈ saˈ duuni getaw mesengayen sug dumanen, lepeng binunuˈen sug dumanen, mukaˈ misuunan niu puˈ su getaw memunuˈan, ndiˈen mbianan su ketubuˈ ndaˈi tamanen. ¹⁶ Laak su petail, mesabut ta. Iini kesabut ta dun, puˈ si Kristu, ginantiˈen su kepatay ta. Kaas penunggilingan ta, subay petailen ta sug duma ta, pia petayan ta su gabang ta dun. ¹⁷ Laak saˈ duuni getaw melauni sukaten, mukaˈ maitaˈen puˈ duuni kulang nug dumanen, dagid ndiˈen lelaaten, iin, ndaˈen petailay su Megbebayaˈ. ¹⁸ Yamu nu ngag lepeng bataˈu! Su kekpinetailay ta, ndiˈ pia saˈ diin laak babaˈ ta. Subay maitaˈ pagid dia penggulaulaan ta, puˈ kiai tantu kekpinetailay.

¹⁹ Saˈ maˈantui kekpinetailay ta, kiai tuˈus ta puˈ ita, suminakup ita tu metuud. Kaas kanaˈ naita mpiid madap tu Megbebayaˈ. ²⁰ Pia duuni medelendem ta mpiid ita dun, iini metau mekamuˈ dun tu ginaa ta, su Megbebayaˈ. Puˈ iin, metaas pa di ginaa ta, mukaˈ misuunanen sug launanen. ²¹ Yamu nu nga sambatu petailen ku, saˈ maˈnia puˈ mawaˈ na su piid ta, ndiˈ naita mendek madap tu Megbebayaˈ. ²² Mukaˈ adin su penenebiin ta diniin, begayen dinita, puˈ ita dema, petuuden tai palintanen mukaˈ su mauyaˈanen. ²³ Puˈ iini pinalintanen dinita, petuuden ta sug Bataˈen si Isukristu mukaˈ mekpinetailay ita, maaˈ dadema nu pinalinta ni Kristu dinita. ²⁴ Adin su mekpetuud tu pinalinta nu Megbebayaˈ, iini sumalabuuk gusay tu Megbebayaˈ, mukaˈ su Megbebayaˈ, sumalabuuk dadema gusay diniin di ginaa. Iini tuˈus ta puˈ suminalabuuk dinita, puˈ bigayen dinita sug Balakaten.