¹ Mendadi, mibetang di sulat kini sug biwasan ni Isukristu. Kig biwasan kini, pisalig nu Megbebayaˈ dini Isukristu, adun paitaˈen dinita nga sakup nu Megbebayaˈ dinig lumbang kini. Iinig biwasanen, su sungu mpenggulaula. Kaas sinuguˈ ni Kristui sesuguˈenen getaw langit mekpetenday dinaan, sesuguˈenen dadema, ngalan ku si Juan. ² Mendadi su kelaun minitaˈu, sinulatu, su tinaluˈ nu Megbebayaˈ, su metuud inukit dadema ni Isukristu. ³ Naa, ki sinulat kini, adin su megbasa dun sampay su mekineeg di tituluˈan kini misulat pedaan di gempenggulaula lemaˈ denlag mukaˈ mekpetuud di tibaˈan misulat di sulat kini, iini leliagen gupia. Puˈ sungu na mpenggulaulaig launanen kini.

⁴ Naa, naan si Juan, piwitan ku amu sulat, yamu nga pitu pikumpungan nu nga sakup ni Kristu diag benwa Asia. Penenebiin ku mbianan amu tulung mukaˈ pianan ginaa. Megbegay dun su Megbebayaˈ, su tetubuˈ nandaw, su tetubuˈ dengantu sampay su metuaˈ pa. Megbegay dun dadema su pitu tawan sesuguˈen nu Megbebayaˈ megabang diniin dia gedapan nu melengas gingkudanen. ⁵ Megbegay dun pa pagid si Isukristu, su meseligan megukit, su penganay Bataˈ nu Megbebayaˈ pitubuˈ puliˈ, su meglekaunutan di nga gadiˈ dinig dibabaw lumbang.

Kini si Isukristu, pitail ita niin, mukaˈ miksekat di kepatayen, ginawen ita niin di ginukuman dinita puun tu salaˈ ta. ⁶ Pinungun ita niin di Keglekaunutanen mukaˈ tinduˈ ita niin belian, adun mektamuy ita tu Megbebayaˈ, su Gamaˈen. Subay pegbesaan si Isukristu mukaˈ meglekaunutan dadema iin di ndaˈi gikteben! Amen.^a

⁷ Pektalentenay niu ini! Si Isukristu, metuaˈ pa, peglidungan nu nga gabun. Mekaitaˈ dun sug launan getaw, sampay su migilek diniin. Melegenan gupia su nga getaw dig lumaun bansa mekatag dini Isukristu. Amen!

⁸ Kaliˈ pektaluˈ su Kaunutan Megbebayaˈ, su Tampusan Ginuungan, “Naa naan, su ndaˈidun pai mibaal, daan nau. Mukaˈ saˈ megelaˈ na mpapas sug launanen, kini pau gusay.” Puˈ iini tetubuˈ nandaw, tetubuˈ dengantu, sampay metuaˈ pa.

⁹ Naan kini si Juan, su mimated diniu, mukaˈ duma niu di kelegenay mbianan nu nga miksalabuuk dini Isukristu. Samasakup dau dema niu di Keglekaunutanen. Puun tu keksalabuuk ta dini Isukristu, mekektigel ita di mbianan ta. Naa naan, inutidanu ditug daan benwau mukaˈ miatedu dini puluˈ ngalanen Patmos, sabaˈ nu kegukitu taluˈ nu Megbebayaˈ mukaˈ su metuud ginukit ni Isukristu. ¹⁰ Mendadi duuni gendaw, mitaang tu gendaw pegbasa tu Kaunutan, mingapuˈ dinaan sug Balakat nu Megbebayaˈ. Midengegu dayun dia teliudan kui mesekeg taluˈ metenug maˈniin nug bugyung. ¹¹ Kaliˈ pektaluˈ, “Kini mpaitaˈ diniˈa, sulat mu, dayun mu puitay dun su pitu buuk pikumpungan nu nga sakupu ditug Efeso, ditu Smirna, ditu Pergamo, ditu Tiatira, ditu Sardis, ditu Filadelfia sampay ditug Laodicea.”

¹² Kaliˈu luminingay, adun guguden ku saˈ taˈ taway duni pekabit dinaan. Masiˈ iini minitaˈu, pitu buuk betangan suluˈ, lumbus bulawan. ¹³ Duun dademai pegindeg dia titengaˈ nu ngag betangan suluˈ maˈniin palas kilawan, silukeni suub midepet di pelapanen, mukaˈ bikesani gegdeben bakes bulawan. ¹⁴ Gemputiˈig buuken, maˈniin nu gemputiˈ gupia penepeten atawaka maˈniin nug dupiˈ batu. Ki matanen pagid, maaˈ ligaˈ gapuy. ¹⁵ Ki geksuden, maˈniin nug bedunsi iknasan sampay metinggas gupia, puˈ tinitiˈ di gapuy. Ki tingegen, maˈniin tubig megdeguk, saˈ metaas gupia baga. ¹⁶ Piguidaneni pitu buuk bitun dig lintu kemeten, mukaˈ dig babaˈen mikseleputi sundang duaˈig babaˈen. Su muluˈen, mekesulaw, maˈniin nu mata gendaw saˈ taasendaw. ¹⁷ Saˈ minitaˈu iin, mikeglaubu dia mesunguˈanen, maˈniinu daan na minatay. Laak dagid dipenanu niin dig lintu kemeten, kaliˈ pektaluˈ, “Ndiˈa mendek. Naan ki pikpuunan nug launan. Naan su katapusanen dadema. ¹⁸ Naan pa pagidi tetubuˈ. Minayan nau matay tuˈu, laak bentayay mu pa daan, tetubuˈ dau mukaˈ ndiˈ nau puliˈ matay! Megbayaˈu di gumul getaw mukaˈ ditug bayaˈ, su pegbenwanan nu nga mimatay. ¹⁹ Naa, ki kelaun maitaˈ mu kini, ki mpenggulaula nemun mukaˈ su sungu mpenggulaula, sulat mu. ²⁰ Buasan ku na diniˈa sug daansamaˈ pigbuni. Kinii gulugan nu pitu buuk bitun minitaˈ mu dig lintu kemetu mukaˈ su pitu buuk betangan suluˈ bulawan. Su pitu buuk bitun, iin su nga sesuguˈen nu Megbebayaˈ getaw langit megingat tu pitu buuk pikumpungan nu nga sakupu. Su pitu buuk betangan suluˈ, iin su pitu buuk pikumpungan nga sakupu.”