¹ Kaliˈ gusay pektaluˈ si Isus, “Mendadi ki pikumpungan nu sakupu diag Efeso, puitay mu sulat su sesuguˈen nu Megbebayaˈ getaw langit megingat dun. Iini sulat mu, kinii pemuun nu megawid di pitu buuk bitun dig lintu kemeten mukaˈ megleketas di pitu buuk betangan suluˈ, lumbus bulawan. ² Naa, misuunan ku su pinggulaula niu, saˈitada sug lesayan niu mukaˈ su kektigel niu di kelegenay. Misuunan ku dadema puˈ mpauk amu gupia ditu nga melaat getaw, piksimaˈ niui gulaula nu nga getaw paingalan nilan dun sug lawas nilan peneligan ni Kristu asa kanaˈ, kaas misuunan niu belusen ilan gupia. ³ Mikektigel amu daan di nga kelegenay niu puun di kesakup niu dinaan, mukaˈ ndaˈ amu dema lukas dun. ⁴ Laak dagid duuni pegdenaˈen ku diniu. Kiin, su kepetail niu dinaan nemun, kanaˈ na maaˈ nu kepetail niu dinaan dengantu. ⁵ Kaas, pegdelendem niu gupia su kebagel nug bekna kepetail niu, mukaˈ su kelukas niu na dun. Peksikesuun amu gusay mukaˈ penggulaulaay niu su maaˈ danug bekna pinggulaula niu. Saˈ pinenggiˈ ndiˈ amu gusay meksikesuun, medituunu niu, adun uaˈen ku sug betangan niu suluˈ ditu kibetanganen. ⁶ Laak duun dademaig leliagenu dun diniu, puˈ mpauk amu gupia ditu nga gulaula nu nga sakup ni Nicolas, maaˈ danu kepauku dun dadema.

⁷ “Naa, adin sug duuni telinganen, mekineeg dema tuˈu di teluˈen kini nug Balakat nu Megbebayaˈ tu nga pikumpungan nga sakupu. Adin su nga mekegdaag di melaat, begayu dinilan mekaˈaan ilan dig bunga gayu megbegay ketubuˈ ndaˈi tamanen, su gayu pimula dia Pegimulanan nu Megbebayaˈ.

⁸ “Mendadi ki pikumpungan nu sakupu dia Smirna, puitay mu sulat su sesuguˈen nu Megbebayaˈ getaw langit megingat dun. Iini sulat mu, kinii pemuun nu pikpuunan nug launan mukaˈ katapusanen dadema, su minatay dayun mitubuˈ puliˈ. ⁹ Naa, misuunan ku su kelegenay niu mukaˈ su kepubri niu, asa medatuˈ amu gupia. Misuunan ku pa padun su nga pembaalbaal mekatag diniu nu nga megangken puˈ getaw Judea ilan, laak kanaˈ, puˈ masiˈ sakup ilan tantu ni Satanas! ¹⁰ Naa, ndiˈ amu gusay mendek ditu sungu niu mpenggulaula. Pektalentenay niu ini, duun diniui pepirisuun nu Palin, adun pengindanan amu, ki kelegenay niu gikteb sepuluˈ gebii. Subay meseligan amu pia petain amu, sabaˈ nu kesalig niu dinaan. Begayu dayun diniu su tundek gadiˈ, saˈitada su ketubuˈ ndaˈi tamanen.

¹¹ “Naa adin sug duuni telinganen, mekineeg dema tuˈu di teluˈen kini nug Balakat nu Megbebayaˈ tu nga pikumpungan sakupu. Puˈ adin su mekegdaag di melaat, ndiˈen mbianani keduaˈ kepatay, su kepatay ndaˈi tamanen.”

¹² Laung padun ni Isus, “Mendadi ki pikumpungan nu sakupu dia Pergamo, puitay mu sulat su sesuguˈen nu Megbebayaˈ getaw langit megingat dun. Iini sulat mu, kinii pemuun nu megawid di mauteng gupia sundang, duaˈig babaˈen. ¹³ Naa, misuunan ku puˈ su pegbenwanan niu, ditu keglekaunutan ni Satanas. Laak pia maˈantu, meseligan amu, ndaˈ niu teliuday ki kesalig niu dinaan, pia pa su kepatay ni Antipas kiin, ki meseligan megukit taluˈu, puˈ iin, pinatay ditug benwa pigbenwanan ni Satanas. ¹⁴ Laak dagid duuni maikaˈ pegdenaˈen ku diniu. Duun diniui munut tu pituˈun ni Balaam dengantu. Si Balaam kiin, pituˈunanen si Balak megdaang di nga getaw Israel, adun mekesalaˈ ilan, puˈ maˈaan daw nilan sug betang ginilak tug ledawan mukaˈ mesuˈat ilan daw megdusa. ¹⁵ Maˈantu dadema duun diniui santaˈ tawan duminunut ditu tituluˈan nu nga sakup ni Nicolas. ¹⁶ Kaas teliuday niu su nga salaˈ niu! Puˈ saˈ pinenggiˈ ndiˈ amu gusay meksikesuun, laawan ku amu sungu, dayun bunuˈen kui nga getaw kia sundang duaˈig babaˈen, mikseleput dig babaˈu.

¹⁷ “Naa adin sug duuni telinganen, mekineeg dema tuˈu di teluˈen kini nug Balakat nu Megbebayaˈ di nga pikumpungan sakupu. Adin su mekegdaag di melaat, begayu dun su gaan giglud ditug langit, piningalan dun manna. Begayan ku padun diadia gemputiˈ batu sinulatan begu ngalan, ki ndaˈiduni mekebasa dun, subay su laak mekedawat dun gupia.

¹⁸ “Mendadi ki pikumpungan nu sakupu dia Tiatira, puitay mu sulat su sesuguˈen nu Megbebayaˈ getaw langit megingat dun. Iini sulat mu, kinii pemuun nug Bataˈ nu Megbebayaˈ, maaˈ nu pegligaˈ gapuy su matanen mukaˈ maaˈ danu metilak bedunsi su pelapanen. ¹⁹ Naa, misuunan ku su kelaun penggulaula niu. Misuunan ku dadema su kepetail niu mukaˈ su kesalig niu dinaan, su gabang niu di nga samasakup niu mukaˈ su kektigel niu di kegleget diniu. Misuunan ku pa padun puˈ melengas pa dun su penggulaula niu nandaw ditu pinggulaula niu dengantu. ²⁰ Laak dagid duun dademai pegdenaˈen ku diniu, puˈ ndaˈ niu pemaagayig libun kiin si Jezabel. Iin, paingalanen dunig lawasen pimuunan nu Megbebayaˈ, laak piktuˈunanen su nga sakupu sampay duuni pegdaanganen, adun megdusa ilan mukaˈ maan ilan dig betang ginilak di ngag ledawan nu sagya diwata. ²¹ Naa, miniben ku na pegelatay su kegbiksuˈ sia nug libun kia di salaˈen, laak mpauk gusay megbiksuˈ di kenlelingayen. ²² Kaas pegduksaken ku iin ditug belilidanen sampay sug dumanen minlelingay, saˈitada, pepegleduun ku ilan patiˈ, melegenan ilan dun gupia. Saˈ ndiˈ ilan gusay megbiksuˈ di melaat gulaula nilan, penggulaulaan ku ini ganam. ²³ Tigaˈwan, petain ku dadema su nga sakup ni Jezabel. Saˈ maˈantu, mesuunan dayun nu kelaun pikumpungan nga sakupu puˈ naani mekesuun di ginaa mukaˈ dig delendeman nug launan getaw. Kaas, sugdaan ku amu saladuaˈ mbantang tu pinggulaula niu.

²⁴ Laak yamu ngag duma sakupu dia Tiatira ndaˈ mpeduma di melaat tituluˈan kia, yamu nu nga ndaˈ dadema petuˈunay di medalem laung tituluˈan ni Satanas, naa taman taluˈu diniu, ndiˈu da puit diniu su melegenan amu dun. ²⁵ Iin laak, subay engkemen niu gusay su misuunan na niu sampay matengu puliˈ. ²⁶ Naa, adin pasiˈ su mekegdaag di melaat mukaˈ penggulaulaanen gusay su mauyaˈan ku sampay matengi gumulen, begayan ku iin pegbayaˈ di kelaun nasud, maaˈ danu pegbayaˈ dun mialapu genat tu Gamaˈu. ²⁷ Metegas dayuni keguiten dinilan, mukaˈ gebaˈenen su nga nasud, maaˈ danu melaat gulen buungen nu migbaal dun. ²⁸ Duun dademai begayu di nga mekegdaag, paingalan dun sug bitun pemulaw.

²⁹ “Naa, adin sug duuni telinganen, mekineeg dema tuˈu di teluˈen kini nug Balakat nu Megbebayaˈ di nga pikumpungan nga sakupu.”