¹ Laung padun ni Isus, “Mendadi ki pikumpungan nu sakupu dia Sardis, puitay mu sulat su sesuguˈen nu Megbebayaˈ getaw langit megingat dun. Iini sulat mu, kinii pemuun nu megawid di pitu tawan sesuguˈen nu Megbebayaˈ megabang lelayun diniin mukaˈ su pitu buuk bitun. Naa misuunan ku su pinggulaula niu. Misuunan ku dadema puˈ megdedengeg amu mipeduunan amu begu ketubuˈ asa maˈniin minatay amu tuˈu! ² Kaas tanud amu, ektak niui kesalig niu dinaan, adun ndiˈ niu melengaˈan, puˈ kaitaˈu dun di pegitaˈen nug Diwata pektemuyen ku, ndaˈ pa pengganget su pinggulaula niu. ³ Naa, su tituluˈan pituˈun na diniu, pegdelendem niu gupia kampuˈ nu midengeg niu. Pekpetuud amu dun, teliuday niu su kelaun salaˈ niu. Saˈ ndiˈ amu meksikesuun, medituunu niu maˈniin nu megdaaw, ndiˈ niu mesuunan saˈ nanutaˈu dateng. ⁴ Laak dagid duun diniu nga getaw dia Sardis ndaˈ niu begay melemuˈay, pia laak su penepeten niu. Tundug amu dinaan pekseluk amu gemputiˈ penepeten, puˈ mbantang amu dun. ⁵ Adin su mekegdaag, maˈantu dadema peselukan nu gemputiˈ penepeten, mukaˈ ndiˈu eknasen su ngalanen bitang na dig linulun sinulat tandaˈ milista su ngalan nu kelaun getaw mpeduma di ketubuˈ ndaˈi tamanen. Peglegintuuden ku di gedapan nu Gamaˈu mukaˈ di gedapan nu nga sesuguˈenen getaw langit puˈ sakupu iin.

⁶ “Naa adin sug duuni telinganen, mekineeg dema tuˈu di teluˈen kini nug Balakat nu Megbebayaˈ di nga pikumpungan nga sakupu.

⁷ “Mendadi ki pikumpungan nu sakupu dia Filadelfia, puitay mu sulat su sesuguˈen nu Megbebayaˈ getaw langit megingat dun. Iini sulat mu, kinii pemuun nu meseligan pinaas nu Megbebayaˈ, sug bigayan pegbayaˈ meglekaunutan maaˈ nu bigay ditu ni David dengantu, iin su mekpukaˈ di gulu gegdan ndaˈiduni meketakep dun. Iin pa pagidi mektakep dun, ndaˈiduni mekepukaˈ dun. ⁸ Misuunan ku su penggulaula niu. Misuunan ku dadema puˈ pia maikaˈi megaga niu, pituud niu gelaˈ su tituluˈan ku. Meseligan damu dema dinaan. Bigayu na diniui sikawan niu mbaal niu su pibaalu diniu, sikawan ndaˈiduni getaw mekebelabag dun. ⁹ Pekineegay niu! Ki nga getaw laung nilan puˈ getaw Judea ilan asa kanaˈ, belusen ilan sungkin, puˈ sakup ilan ni Satanas. Pesempelen ku ilan diniu, mukaˈ pepengemuˈen ku ilan diniu. Mesuunan nilan dayun gelaˈ puˈ petailen ku amu. ¹⁰ Kagina piktalentenan niu su suguˈan ku diniu puˈ miktigel amu di kelegenay niu, penendingan ku amu di kelegenay sungu mateng di nga kilawan, adun mpengindanan ku sug launan getaw dinig dibabaw lumbang. ¹¹ Naa sungu nau metuaˈ. Subay engkemen niu gusay su misuunan niu na, adun ndaˈiduni mekagaw dun su melengas sugda tu kegdaag niu. ¹² Adin su getaw mekegdaag, baalen ku iin gempagen pasek ditug Balay Pengedapan tu Gamaˈu, sug Diwata pektemuyen ku, dayun ndiˈ nain mawaˈ dia. Sulatan ku dayun su getaw mekegdaag kia di ngalan nug Diwata pektemuyen ku, mukaˈ su ngalan nu syudad pegbenwanan nug Diwata pektemuyen ku, sug begu syudad Jerusalem lumusad genat ditug langit, genat ditug Diwata pektemuyen ku. Sulatan ku su mekegdaag kia dig begu ngalan ku.

¹³ “Naa adin sug duuni telinganen, mekineeg dema tuˈu di teluˈen kini nug Balakat nu Megbebayaˈ tu nga pikumpungan nga sakupu.”

¹⁴ Laung padun ni Isus, “Mendadi ki pikumpungan nu sakupu diag Laodicea, puitay mu sulat su sesuguˈen nu Megbebayaˈ getaw langit megingat dun. Iini sulat mu, kinii pemuun nu gilal Amen, saˈitada su meseligan megukit, puˈ teluˈenen su metuud. Iini teluˈen nu puun nu kelaun binaal nu Megbebayaˈ. ¹⁵ Naa, misuunan ku su pinggulaula niu. Maˈniin amu nu tubig, kanaˈ amu metegdaw, kanaˈ damu dema mainit, saˈitada, mikagelagel pai kesalig niu. Mauyaˈan ku mainit amu sungkin atawaka metegdaw. ¹⁶ Laak dagid, kagina maˈniin amu nu melebab tubig, luaˈen ku amu, belengen ku amu. ¹⁷ Laung niu dun medatuˈ amu, memis dademai kebetang niu sampay ndaˈi kulang niu. Laak dagid ndaˈ niu mesuunay puˈ mekelelaatlelaat amu gupia. Gempusuk amu, buta damu dema sampay milebasan amu! ¹⁸ Kaas tituluˈen ku amu, saluy amu dini naan tantu bulawan, adun amu dumatuˈ. Saluy damu dema gemputiˈ penepeten, seluken niu, adun metebunan su mekepiidpiid keglebas niu. Saluy amu pa pagid bulung ugid niu di mata niu, adun mekengitaˈ amu. ¹⁹ Adin su petailen ku, pemaagen ku mukaˈ tituluˈen ku, kaas pektinantu amu mukaˈ teliuday niu su kelaun salaˈ niu. ²⁰ Bentayay pa daan niu, megindegu di gulu gegdan mukaˈ meksabiu. Saˈ duuni mekedengeg di tingegu mukaˈ pukaˈanen su gulu gegdan, suledu dayun diag balayen dayun ami meksalu maan. ²¹ Naa, adin su mekegdaag, begayu diniini pegbayaˈ megabang dinaan meglekaunutan, maaˈ nu kebegay dinaan nu Gamaˈu megabang diniin meglekaunutan, puˈ naan, mikegdaag dau.

²² “Naa adin sug duuni telinganen, mekineeg dema tuˈu di teluˈen kini nug Balakat nu Megbebayaˈ di nga pikumpungan nga sakupu.”