4
Su Kektamuy ditug Langit
1 Naa tubus nitu, duun na pelumi pinitaˈ dinaan. Iini minitaˈui gulu gegdan ditug langit, mipukaˈ. Mukaˈ ki tingeg maaˈ nug bugyung midengegu kamun mektaluˈ dinaan, kaliˈ pektaluˈ, “Diniin ka ditaas, adun paitaˈu diniˈa saˈ taˈ alanduni mpenggulaula ditug binayaˈ gebii buˈ gendaw.” 2 Seduˈunduˈun mingapuˈ na dinaan sug Balakat nu Megbebayaˈ. Minitaˈu dayun diag langiti melengas gingkudan gadiˈ, duuni pegingkud dia. 3 Ki pegingkud dia, tumiagi muluˈen maˈniin palas nu metinggas batu piningalan dun haspe mukaˈ kornalina. Milibed di gingkudan kiai melunaw landung maˈniin palas nu sala metinggas batu piningalan dun esmeralda. 4 Duun paig duaˈ puluˈ buˈ paat buuk gingkudan gadiˈ miktabuˈ di melengas gingkudan gadiˈ kia. Pemegingkud diaig duaˈ puluˈ buˈ paat tawan meglegulang kaunutan piselukan gemputiˈ suub, miktukid ilan tundek bulawan. 5 Naa, ki gingkudan kia dia titengaˈ, migilat lamug mikpenlugung. Duun pa padun dia mesunguˈaneni pitu buuk tilaw peglamag. Ki pitu buuk tilaw kia, iin su pitu tawan sesuguˈen nu Megbebayaˈ megabang lelayun diniin. 6 Duun pa pagid dia mesunguˈan nu gingkudan kiai maˈniin palas dagat, maˈniin nu pagalungan sabaˈ ketinawen.
Naa, milibut di melengas gingkudan nu gadiˈ ki paat buuk tetubuˈ biwat. Ki ngag biwat kia, diadia mileep dig lawaseni mata, dia gatubanganen sampay dig lekuden. 7 Naa, su palas nug bekna biwat, maaˈ nug limaung. Su keduaˈ biwaten pelum, maaˈ nu turu baka, dayun su ketelunen, maaˈ nug lakii muluˈen, sampay su kepaaten, maaˈ nu tipuli peglayug. 8 Diadia duun dademai genem buuk gekpaken. Mileep pa pagid di gekpakeni mata, di dapit dibabawen sampay di dapit silungen. Gebii gendaw ndiˈ nilan sikpaˈan bebatay ini, laung nilan,
“Ki Kaunutan Megbebayaˈ, su Tampusan Ginuungan, iin, ndaˈig lamug dun melaat, pia maikaˈ.
Iin su tetubuˈ dengantu, tetubuˈ pa nandaw sampay metuaˈ pa.”
9 Ki paat buuk tetubuˈ biwat, pekpenalan nilan dig bebat ki megingkud dia titengaˈ gingkudan, iin su ndaˈiduni gumulen. Pegbesaan nilan iin sampay pekpeladpeladan nilan. 10 Saˈ megbebat ilan, sug duaˈ puluˈ buˈ paat tawan meglegulang kaunutan, menginlulud ilan dia gedapan nu megingkud kia dia titengaˈ gingkudan, pegbesaan nilan su ndaˈi gumulen. Tikpuˈen nilan su nga tundek nilan dia gedapan nu gingkudanen. Kaliˈ ilan pektaluˈ,
11 “Yaˈa, Kaunutan nami Megbebayaˈ, pektemuyen nami yaˈa, gembantanga penalan nu ngag launan biwat mu,
gembantanga dadema pegbesaan nilan sampay gembantanga meglekaunutan dinilan gelaˈ.
Puˈ yaˈai miwat di tibaˈan maitaˈ sampay su ndiˈ maitaˈ,
adin sug biwat mu, su gikteb bigayan ketubuˈ, ndaˈig lain puunanen, su laak mauyaˈan mu!”