¹ Mendadi ki Nati Karniru, minitaˈu dayun iin, peksekatenen sug bekna kumpelig lunay pideket dig linulun kia, mukaˈ midengegu su tingeg nu salabuuk tetubuˈ biwat, maaˈ nug delalak. Duuni pikteluˈanen, laungen, “Panawa!” ² Kaliˈu pegbentayay, minitaˈui kebayuˈ, gemputiˈ kebayuˈ. Ki peksakay dun, peguidaneni panaˈ mukaˈ bigayan dadema tundek. Iin, mipanaw na tuˈu memendaag, ndaˈiduni dumaag dun.

³ Naa, sikat na pelum nu Nati Karniru su keduaˈ pideketen lunay mukaˈ midengegu dadema su keduaˈ tetubuˈ biwaten. Duun dademai pikteluˈanen, laungen, “Panawa!” ⁴ Duun dayuni keduaˈ kebayuˈen gumiwaˈ, gempula kebayuˈ. Ki peksakay dun, bigayan pegbayaˈ mekpegubat di tibuukan lumbang, adun mekpinetayay su nga getaw. Tinulunan dadema iin gembagel sundang.

⁵ Naa sikat na pelum nu Nati Karniru su ketelu pideketen lunay, dayun midengegu su ketelu tetubuˈ biwaten. Duun pa pagidi pikteluˈanen, laungen, “Panawa!” Kaliˈu pegbentayay, duuni minitaˈu maitem kebayuˈ. Ki peksakay dun, miguit timbangan. ⁶ Mukaˈ duuni midengegu maˈniin tingeg nu getaw genat dia paat buuk tetubuˈ biwat kia. Kaliˈ taluˈ, “Sendaw mengimbaal, tindanen sala kaltik laak trigo. Saˈ su sebadai tindan, telu kaltik. Laak sug lana nu gayu olibo mukaˈ su pegimulanan gubas, ndiˈ dadema salibaˈen.”

⁷ Naa, sikat na pelum nu Nati Karniru su kepaat pideketen lunay, midengegu dayun su kepaat tetubuˈ biwaten miktaluˈ. Duuni pikteluˈanen, laungen, “Panawa!” ⁸ Dayun duuni minitaˈu kebayuˈ mimansiˈ. Ki peksakay dun, paingalan dun si Kepatay, dumanen peksakay si Bayaˈ. Ki peksakay kia, bigayan ilan pegbayaˈ di kepaat ilasen di nga kilawan, adun pemetain nilani nga getaw pibian di gubat, gunus, leduun sampay ditu mekalig metetubuˈ.

⁹ Mendadi, sikat na pelum nu Nati Karniru su kelima pideketen lunay. Minitaˈu dayuni gentudan gilak, mukaˈ dia silungen duuni nga gimuud nu nga pinatay sabaˈ nilan megukit tu taluˈ nu Megbebayaˈ mukaˈ sabaˈ nu keglegintuud nilan tu ginukit ni Isukristu. ¹⁰ Ki nga gimuud kia, mimeksay ilan, laung nilan, “Yaˈai ginuungan Diwata! Pinaasa ditu melaat mukaˈ meseligan ka gupia! Saaken nami diniˈa saˈ maiben mu pa ukumay su nga getaw diag dibabaw lumbang mukaˈ pelebuˈay, sugda tu kepatay nilan dinami.” ¹¹ Dayun diadia bigayan mekelambak suub, gemputiˈ, mukaˈ pilali deliˈ sampay mematayi kelaun sama sesuguˈenen mukaˈ mimated diniin maaˈ nu kibiananen.

¹² Naa, miksekat ki Nati Karniru tu keˈenem pideketen lunay. Miglinug dayun metikteg, minitemi mata gendaw maaˈ nu maitem penepeten binaal saku, mipulaig bulan maˈniin palas duguˈ, ¹³ mimeglabuˈ su ngag bitun maˈniin bunga igera mipudu saˈ dulukan metikteg genus, pia mailaw pa. ¹⁴ Dayun malep su tibuuk langit, maaˈ laak nu papil linulun na. Su ngag bentud mukaˈ su nga pinuluˈan, piawaˈ ilan dig daan kibetanganen. ¹⁵ Dayun su kelaun getaw dig lumbang, su nga gadiˈ, su nga kaunutan getaw, su nga kaunutan dadema sundalu, su nga medatuˈ mukaˈ su nga megbayaˈ dig duma getaw, sampay su gulipen, saˈ su kanaˈ gulipen, migelaˈ ilan memegeglud ditu ngag langeb sampay ditu silung nu nga genduk diag binentudan. ¹⁶ Pigbeksayan nilan dayun su ngag batu mukaˈ binentudan, laung nilan, “Yamu ngag batu mukaˈ bentud, silabuˈ amu dini nami, tebunay niu ami, adun ndiˈ ami maitaˈ nu pegingkud tu melengas gingkudan kia nu gadiˈ, mukaˈ adun ndiˈ ami medekdakan nug lenget nu Nati Karniru. ¹⁷ Puˈ minateng na su mekesalebuˈ gendaw pengukuman nilan. Taˈ taway dun bai mekegaga dun ini?”