¹ Naa tubus nitu, duuni minitaˈu paat tawan pelum sesuguˈen nu Megbebayaˈ getaw langit. Ki nga sesuguˈen kia nu Megbebayaˈ, diadia pegindeg ditu sala di nga paat sungut nig lumbang kini. Inapag nilan su paat buuk genus dumuluk sia dinig lupaˈ, dig dagat, mukaˈ di nga gayu. ² Minitaˈu dademai sala getaw langit, peglentu genat ditu dapit silangan. Iin, peguitenen su pektuˈus nu pektetubuˈ Diwata. Biksayanen su paat tawan getaw langit kia, kig daan na bigayan nu Megbebayaˈ pegbayaˈ gebaˈen nilan sug benwa mukaˈ peglaatan nilan sug dagat. ³ Kaliˈ pektaluˈ su sala tawan getaw langit kia, “Ndiˈ pa niu peglaatay sug lupaˈ, sug dagat sampay su nga gayu, subay unaan pa nami tuˈusay su gangas nu nga sakup nu Megbebayaˈ pektemuyen ta, su nga sesuguˈenen getaw lumbang.” ⁴ Kaliˈu medengeg su kelaun nu pentuˈusan di tuˈus nu Megbebayaˈ di gangas nilan, iini segatus buˈ paat puluˈ buˈ paat ngibu tawan getaw metenday di nga sepuluˈ buˈ duaˈ gesalan getaw Israel. ⁵ Naa pemiliˈan maˈniniˈ, duuni selaksaˈ buˈ duaˈ ngibu tawan sapuˈ ni Apuˈ Juda, duun dademai selaksaˈ buˈ duaˈ ngibu tawan sapuˈ ni Apuˈ Ruben, selaksaˈ buˈ duaˈ ngibu tawani sapuˈ ni Apuˈ Gad, ⁶ mukaˈ maˈantu dademai kelaun nu sapuˈ ni nga Apuˈ Aser, ni Apuˈ Neftali, ni Apuˈ Manases, ⁷ ni Apuˈ Simeon, ni Apuˈ Levi, ni Apuˈ Isacar, ⁸ ni Apuˈ Zabulon, ni Apuˈ Jose sampay ni Apuˈ Benjamin, piksepuluˈ buˈ duaˈ ngibu ki tinuˈusan.

⁹ Tubus nitu, kaliˈu pegenleng, naa melaun gupia getaw, ndaˈiduni mekebilang dun. Sakup ilan di tibaˈan nasud, dig launan bansa, dig lumaun benwa sampay dig lumaun pikebitan. Mimegindeg ilan di gedapan nu melengas gingkudan nu gadiˈ, di mesunguˈan dadema nu Nati Karniru, lumbus ilan pemekseluk gemputiˈ mekelambung suub, peguidan nilani nga paka pisa. ¹⁰ Mimeksay ilan, laung nilan, “Penalan ta su Megbebayaˈ, su pektemuyen ta mukaˈ su pegingkud dini melengas gingkudan nu gadiˈ mukaˈ penalan ta pa pagid ki Nati Karniru, puˈ mikpuun dinilan duaˈ su kegawen dinita.” ¹¹ Naa, su kelaun sesuguˈen nu Megbebayaˈ getaw langit, migalidung ilan pemegindeg dia melengas gingkudan kia, mukaˈ di peglidungan dadema nu nga meglegulang kaunutan sampay di paat buuk tetubuˈ biwat. Mimenlaub di gedapan nu gingkudan su nga getaw langit kia, pinginluˈudan nilan su Megbebayaˈ. ¹² Kaliˈ ilan taluˈ, “Amen! Ki Megbebayaˈ kini, di ndaˈi gikteben gembantang dadema tuˈu penalan, megdedengeg mukaˈ pemilangen metelisebuten. Di ndaˈi tamanen gempia pekpeladpeladan, pegbesaan sampay pemilangen ginuungan. Mukaˈ megbayaˈ di ndaˈi tamanen! Amen!”

¹³ Naa mendadi, sala tawan di nga meglegulang kaunutan, sinaaken dinaan saˈ ki nga getaw kia mimekseluk gemputiˈ mekelambung suub, taˈ taway dun mukaˈ saˈ tandaˈ ilan genat.

¹⁴ Kaliˈu peksembag, “Uu Sir, ndaˈu ma mesuunay. Mabuˈ yaˈai mekesuun dun.”

Kaliˈ taluˈ, “Ilan kini su mikebian di mekendekendek gupia kelegenay. Ikdakan na nilan su nga suub nilan dig duguˈ nu Nati Karniru, adun mekeputiˈ na tanan. ¹⁵ Kaas mekaindeg ilan di gedapan nu melengas gingkudan nu Megbebayaˈ, mukaˈ meketamuy ilan diniin gebii gendaw dinig Balay Pengedapan diniin. Penendingan ilan nu pegingkud di melengas gingkudan nu gadiˈ, adun ndaˈi mpenggulaula nilan. ¹⁶ Kaas ndiˈ nailan mainsan puliˈ gutemen mukaˈ kuaun, ndiˈ na nilan metigeli mesait pedes atawaka taˈ alanduni gininisan mainit. ¹⁷ Puˈ megingat dinilan lelayun ki Nati Karniru pegindeg dia titengaˈ nu melengas gingkudan. Pengegaken ilan niin ditu tebud nu tubig mekegbegay ketubuˈ ndaˈi tamanen, mukaˈ penguaˈen dinilan nu Megbebayaˈ sug launan mekpaubaˈ di ginaa nilan.”