¹ Naa mendadi, su kepitu pideketen lunay nug linulun sinulat, benaˈ sikat nu Nati Karniru, mingamed dayun ditug langit taman ginengaˈ uras. ² Benaˈ mitektaki ginengaˈ uras, minitaˈu su pitu tawan sesuguˈen nu Megbebayaˈ getaw langit pegindeg ditu gedapan nu Megbebayaˈ. Miktukid ilan bugyung.

³ Naa, duun paduni sala getaw langit mituaˈ pegindeg dia mesunguˈan nu gentudan gilak. Piguidan nu getaw langit kiaig yaˈung bulawan, betangan pelinan. Bigay dayun diniin melaun pelinan, adun pedumanen ditu kenenabi nu nga piglegetawan nu Megbebayaˈ, dayunen ilakay dia gentudan di mesunguˈan nu melengas gingkudan kia. ⁴ Su gebel nu tinutung pelinan mipeduma di kenenabi nu nga piglegetawan nu Megbebayaˈ, luminintuk diag ditaas, genat tug yaˈung piguidan nu getaw langit pegindeg dia gedapan nu Megbebayaˈ. ⁵ Pipenuˈ dayun nu getaw langit gapuy sug yaˈung bulawan bitangan pelinan pileket diag dibabaw gentudan gilak, mukaˈ libuˈanen dun sug lumbang. Migdelalak metikteg, duuni mesasak gupia, migbunsilaˈi gilat, miglinug pa padun.

⁶ Maˈantu, su pitu tawan sesuguˈen nu Megbebayaˈ getaw langit bigayan bugyung, miuyaˈ nailan megiup dun.

⁷ Mendadi, sug bekna getaw langit, pitaluˈen kig bugyungen. Dinupiˈan dayun sug lumbang, dupiˈ batu mukaˈ gapuy lamug duguˈ. Mitutung dayun su ketelu ilasen dig dibabaw lumbang, mukaˈ su ketelu ilasen di nga gayu sampay su nga kelaun mailaw sigbet.

⁸ Naa, su keduaˈ getaw langiten, pitaluˈen pelum kig bugyungen. Duun dayuni milabuˈ ditug dagat maˈniin palas gembagel dungus megligaˈ. Su ketelu ilasen ditug dagat, binaluy na dema duguˈ. ⁹ Mukaˈ pa pagid migelaˈ matay su ketelu ilasen nu metetubuˈ mukaˈ sedaˈ diag dagat. Migelaˈ pa padun meglaat su ketelu ilasen di ngag bangkaˈ ditu.

¹⁰ Naa su ketelu getaw langiten, pitaluˈen pelum kig bugyungen. Lemen laak miktaluˈ sug bugyung, duuni gembagel bitun megligaˈ maaˈ nu tilaw, milabuˈ, mitenaˈ ditu ketelu ilasen di tinubigan sampay nga tebud. ¹¹ Ngalan nug bitun kia, Gempait. Benaˈ mitenaˈ, binaluy gempait su ketelu ilasen di tubig, kaas melaun getaw minatay sabaˈ nilan minum di tubig mibaluy gempait.

¹² Mendadi pitaluˈ na pelum nu getaw langit kig bugyungen, kia su kepaaten na. Misugat dayun su ketelu ilasen di gendaw, su ketelu ilasen dig bulan sampay su ketelu ilasen di ngag bitun. Kaas su ketelu ilasen di kedelag nilan, ndiˈ na mbaluy. Kaas dumilem dema su ketelu ilasen nu gendaw mukaˈ nu gebii.

¹³ Kaliˈu pengenleng puliˈ, minitaˈui maaˈ nu tipuli peglayug diag ditaas, lamugen memeksay, “Ay! Mekelelaatlelaat! Mekelelaatlelaat tuˈu! Saˈ peteluˈen nu telu tawan pa getaw langit sug bugyung nilan, mekelelaatlelaat gupia su kelaun pektetubuˈ dinig dibabaw lumbang!”