9
1 Naa mendadi, pitaluˈ na pelum nu kelima getaw langiten kig bugyungen. Duun dayuni minitaˈu bitun, salabuuk, daan na milabuˈ diag lumbang. Kaliˈu pegbentayay, kig bitun kia, bigayan gunsiˈ pekpukaˈ dig luak bianan pangay ditug bayaˈ. 2 Pinukaˈ dayun nug bitun kia sug bayaˈ. Minipuglun guaˈ diag bisuangani gebel, maˈniin gebel nu gembagel gupia gapuy. Dumilem duni gendaw mukaˈ gawanawan. 3 Duun dayuni nga gapan luminusad ditug lupaˈ genat dia gebel kia. Su nga gapan, bigayan ilan lala, mesama dig lala nu gulangulang. 4 Binandu dinilan su kepeglaat nilan sia tu sigbet, tu nga gayu sampay tu nga pimula, iin daw laaki pelegetan nilan su nga getaw ki ndaˈiduni tuˈus nu Megbebayaˈ di gangasen. 5 Ndaˈ dadema buang dinilan petain nilan su nga getaw pelegetan nilan, laak iin pasiˈi bigay dinilan, pelesain nilan di mesait su nga getaw ndaˈ tuˈusay, taman lima bulan. Su kesait nu kepetugaˈ nilan di nga getaw, maaˈ daw nu kesait saˈ segeden gulangulang. 6 Mendadi taman lima bulan kiin, enguten nu nga getaw matay sia, laak dagid ndiˈ matay. Penengaun nu nga getawig bian kepatay nilan sia, laak maˈniin ilan mpegliaw nu gumul nilan.
7 Mendadi, ki nga gapan kini, palas nilan maˈniin palas kebayuˈ minuyaˈ na sumakay dun pangay lumumpak. Dia gulu nilan duuni maaˈ nu tundek bulawan. Su muluˈ nilan, maˈniin palas muluˈ getaw. 8 Sug buuk nilan, maˈniin palas buuk libun, su ngisi nilan, maˈniin palas ngisi limaung. 9 Pinseluk nilan di gegdeb nilani penending dun maaˈ nu palas putaw, dayun saˈ megedegud su nga gekpak nilan, maˈniin deguk nu melaun prada pegleguyuden nu nga kebayuˈ saˈ menggebek pangay lumumpak. 10 Duuni gikug nilan mukaˈ seged nilan maaˈ danu gulangulang. Su gikug nilan, mekpetugaˈ di nga getaw taman lima bulan. 11 Naa, duuni gadiˈ meguit di nga gapan kiin, iin su getaw langit megbayaˈ na dig bayaˈ. Iini ngalanen saˈ pikebitan nu getaw Judea, si Abbadon, saˈ pikebitan nu getaw Grecia, si Apolyon (saˈitada maˈananen su Menginapul).
12 Mendadi sug bekna mekendekendek pelabuˈ sungu mayan dig lumbang, mitubus na. Duun paig duaˈ ginis pelum sungu mpenggulaula.
13 Naa, pitaluˈ na pelum nu keˈenem getaw langiten kig bugyungen. Midengegu dayuni tingeg ditu paat buuk sungut nu gentudan gilak kia bulawan dia gedapan nu Megbebayaˈ. 14 Ki tingeg kia, miktaluˈ dia keˈenem getaw langiten pegawid bugyung, “Naa, ki paat tawan getaw langit kia binalud ditu gembagel tubig Eufrates, beluyay mu ilan!” 15 Biluyanen tuˈu ki paat tawan kia getaw langit. Gandang nailan pingandam, pemetain nilani ketelu ilasen di nga kilawan, di gempia uras, gendaw, bulan sampay taun tinduˈ nu Megbebayaˈ. 16 Duuni nga sakup nilan sundalu peksakay kebayuˈ. Tumuˈ pisuun dinaan sug laun nu sundalu peksakay kebayuˈ kia, 200,000,000, saˈitada duaˈ laksaˈ piluˈ di selaksaˈ. 17 Iin dayun pinitaˈ dinaan su nga kebayuˈ sampay su peksakay dun, pinseluk di gegdeb nilani penending dun, putaw gempula, maˈniin ligaˈ gapuy, melunaw dadema gupia miglamug medalag. Su nga kebayuˈ pelum, gulu nilan, maaˈ da gulu limaung. Mingguaˈ dig babaˈ nilani gapuy, gebel mukaˈ asupre.+\fr 9:17 \ft Duuni ginis mekaikaˈ lupaˈ paingalan dun asupre, medalag tantu, meduˈ gupia maaˈ da gumanuk miduˈ na. 18 Dayun puun di telu pelabuˈ kiin, ki gapuy, gebel mukaˈ asupre pekpengguaˈ diag babaˈ kebayuˈ kia, mitimalan mematay su ketelu ilasen di nga kilawan. 19 Puˈ melala gupiaig babaˈ mukaˈ gikug ni nga kebayuˈ kia. Su gikug nilan, maˈniin mamak, duun masiˈi gulunen, iini memesait di nga getaw.
20 Laak pia maˈantu, su ngag duma getaw ndaˈ pematay di nga pelabuˈ kini, ndaˈ nilan gusay teliuday su pektemuyen nilan, iin da gusay piktamuy nilan su pigbaal laak nilan. Minamal ilan sungkin mektamuy ditu menenulay mukaˈ ledawan binaal bulawan, bulawan selapiˈ, bedunsi, batu sampay gayu, su nga ndiˈ mekengitaˈ, ndiˈ mekebatik, sampay ndiˈ mekepanaw. 21 Ndaˈ da nilan padun pegbiksuˈay su kembinasa nilan, su nga kenigdud nilan dig duma nilan, su kenlelingay nilan sampay su kegdaaw.