10
Su Getaw Langit Peguit Maikaˈ Linulun Sinulat
1 Naa mendadi, minitaˈui sala sesuguˈen nu Megbebayaˈ getaw langit ginuungan gupia, peglusad dinig lumbang genat ditug langit. Ki getaw langit kia, milipukutan iin nu gabun mukaˈ piglidungan nug landungi gulunen. Su muluˈen, mekesulaw maˈniin nu mata gendaw, su mesekeg gupia geksuden, maˈniin dadema pasek megligaˈ. 2 Piguidaneni maikaˈ linulun sinulat biklad di kemeten. Migbelak megindeg, sug lintu geksuden piˈindegen ditug dagat, sug bibangen pelum ditug lupaˈan. 3 Miktawag dayun maaˈ nu genggel limaung, dayun simbag nu pitu buuk delalak, meketenug gupia. 4 Lemen laak mideksuˈig delalak, sulaten ku na sia. Laak dagid duuni midengegu taluˈ ditug langit, kaliˈ taluˈ, “Su tinaluˈ nu pitu buuk delalak, pegbuni mu, ndiˈ mu sulatay!”
5 Naa, minitaˈu dayun su getaw langit, ki pegindeg diag dagat mukaˈ lupaˈ, tinggalenig baingkenen dapit lintu ditug langit, 6 puˈ suminapa, peksembayanen su Megbebayaˈ su ndaˈi gumulen, su Mikleb tug langit, Miwat tug lupaˈ, Minunag tug dagat mukaˈ Minaglis tu tubig, sampay Mitang tug lumaun bitang dun. Kaliˈ sapa su getaw langit, laungen, “Ndaˈidun na dema tuˈui mekelangan dun! 7 Puˈ saˈ peteluˈen na nu kepitu getaw langiten kig bugyungen, dayun na tuˈu penuuday nu Megbebayaˈ ki pigbuni pigdelendemen di pisuunen dengantu tu nga sesuguˈenen pimuunanen.”
8 Naa mendadi, midengegu na puliˈ su tingeg kiin ditug langit. Kaliˈ taluˈ dinaan, “Diaan ka na, alap mui mibeklad sinulat kia, ki peguidan nu getaw langit pegindeg diag dagat mukaˈ lupaˈ.”
9 Kaas pisempelan ku dayun su getaw langit, adun penengiin ku diniin su maikaˈ linulun sinulat. Kaliˈ taluˈ dinaan su getaw langit, “Alap mu ini, dayun aan mu. Naa saˈ dia pa babaˈ mu, memis maaˈ teneb, laak saˈ medul mu na, tulisan ka dun.”
10 Naa saˈ maˈantu, inalapu tuˈu su maikaˈ linulun sinulat ditu kemeten dayun inaan ku. Memis tuˈu sinegay diin pa babaˈu, laung mu dun teneb. Laak benaˈ midulu na, tinulisanu tuˈu. 11 Kaliˈ pektaluˈ dinaan, “Subay pegwali mu puliˈ su taluˈ nu Megbebayaˈ mekatag di kelaun bansa mukaˈ nasud, su kelaun ginis pikebitan metaluˈ nu getaw, sampay su kelaun gadiˈ.”