11
Kig Duaˈ Tawan Megukit Taluˈ nu Megbebayaˈ
1 Mendadi bigayanu pektepeng maˈniin sekud, dunut duuni miktaluˈ dinaan, laungen, “Pegbuata, kig Balay Pengedapan tu Megbebayaˈ, tepeng mu, sampay su gentudan gilak, dayun bilang mu dadema su kelaun getaw memektamuy dia. 2 Laak ndiˈ mu tepengay sug lenuˈan diag liu, puˈ kia, bigay na ditu nga getaw kanaˈ getaw Judea. Ilan kiin, peglaatan nilan su syudad pinaas nu Megbebayaˈ taman paat puluˈ buˈ duaˈ bulan. 3 Pepegwaliu dademaig duaˈ tawan pekseluk suub saku, dayun pegukiten nilan su taluˈ nu Megbebayaˈ gikteb sengibu buˈ duaˈ gatus buˈ enem puluˈ endaw.”
4 Naa kig duaˈ tawan megukit kia, ilan sug duaˈ puun gayu olibo, ilan dadema sug duaˈ buuk betangan suluˈ kia bitang ditu mesunguˈan nu Kaunutan di tibuuk lumbang. 5 Saˈ duuni mekpeleget dinilan, mengguaˈ dig babaˈ nilani gapuy mekesapul dun su nga kumuntra dinilan. Maˈantu, adini mauyaˈanen mekpeleget dinilan duaˈ, mekangay ditu kepatay. 6 Mukaˈ pagid duuni pegbayaˈ nilan megbelibad dig dupiˈ saanan nilan megwali tu taluˈ nu Megbebayaˈ. Mpegbiaˈan nilan dadema su nga tebud mbaluy duguˈ, mukaˈ duun pa pagidi pegbayaˈ nilan dig benwa, pia taˈ pelebuˈay dun, pia sanu deksuˈi mauyaˈan nilan pebianen nilan dun.
7 Naa, kig duaˈ tawan megwali, saˈ metubus nilan peglegintuuday, bunuˈen ilan nu mekendekendek menamad guaˈ dig luak bianan pangay tug bayaˈ. Daagen ilan nu menamad, dayunen ilan petayay. 8 Sug bangkay nilan, mbilin laak ditug dalan nu gembagel syudad tandaˈ linansang su Kaunutan nilan di kurus.+\fr 11:8 \ft Saˈitada ki Jerusalem. Sodoma atawaka Ehiptoi sambingay ngalan nu gembagel syudad kiin. 9 Naa, duuni nga getaw dig launan bansa, di kelaun pikebitan, sakup ilan di tibaˈan benwa mukaˈ lumaun nasud, pegeklungan nilan sug bangkay nug duaˈ tawan kia taman telu endaw buˈ selapus. Mukaˈ ndiˈ nilan buangen lebengay sug bangkay nug duaˈ tawan megwali kia. 10 Penleliagen dayun su kelaun getaw dinig dibabaw lumbang ditu kepatay nilan duaˈ. Meglekebibu su nga getaw mukaˈ megbebegayay ilan, puˈ kig duaˈ tawan megwali, mekpuun dinilan su nga kelegenay nu nga kilawan. 11 Laak dagid benaˈ minayan nai telu endaw buˈ selapus, kig duaˈ tawan megwali, pitubuˈ ilan puliˈ nu Megbebayaˈ. Migbuat nailan tuˈu, kaas mipatiˈ gupia mendek su nga kelaun getaw mikaitaˈ dinilan. 12 Duun dayuni midengeg nug duaˈ tawan megwali migbeksay ditu gekbus langit, kaliˈ taluˈ, “Lentu namu dini!” Lumintu nilan duaˈ pangay tuˈu ditug langit, pigalidungan ilan nu gabun saanan pegbantay dun su nga kumuntra dinilan. 13 Iin dayuni miglinug metikteg. Naa su kesepuluˈ ilasen di gembagel syudad, migebaˈ, mimatay duni pitu ngibu tawan getaw. Su nga getaw ndaˈ patay, mimegendek, pinalan nilan gupia su Megbebayaˈ ditu gekbus langit.
14 Naa, mipapas na su keduaˈ pelabuˈen. Laak, bentayay pa daan niu, sungu mateng ki ketelunen.
Su Kepitu na Bugyungen
15 Naa mendadi, su kepitu getaw langiten mibegayan bugyung, pitaluˈen dayun kig bugyungen. Duun dayuni migdengan memeksay ditug langit, laung nilan, “Megbayaˈ na tuˈu tu tibaˈan kilawan su Kaunutan ta Megbebayaˈ mukaˈ su Tinduˈen Meglekaunutan, mukaˈ iin meglekaunutan di ndaˈi gikteben!” 16 Dayun sug duaˈ puluˈ buˈ paat tawan meglegulang kaunutan memegingkud dia nga gingkudan nu gadiˈ dia mesunguˈan nu Megbebayaˈ, mimenlaub ilan mengamuyuˈ tu Megbebayaˈ, 17 kaliˈ ilan pektaluˈ,
“Uu Kaunutan Megbebayaˈ ki Tampusan Ginuungan, su tetubuˈ nandaw buˈ dengantu!
Mekpaladpalad ami diniˈa, puˈ diin na gengkeman mu su gembagel pegbayaˈ mu,
mukaˈ mikpuun ka na tuˈu meglekaunutan.
18 Minlimuuk su ngag bansa getaw kanaˈ piglegetawan mu,
puˈ minateng na su masa nu kepelabuˈ mu dinilan,
ki masa nu kengukum mu tu nga mimatay,
mukaˈ gempia mu sugdaan di melengas su nga getaw sesuguˈen mu migwali tu taluˈ mu
sampay su nga piglegetawan mu, sug lumaun megbasa diniˈa,
saˈ su ngag datuˈ saˈ su gempusuk.
Minateng na su masa gempia mu sepulen su nga menginapul di tibuukan lumbang!”
19 Mendadi sug Balay Pengedapan ditug langit, mipukaˈ, dayun midayag diag dialemen su kaban gindan tug bekna sabut nu Megbebayaˈ. Dayun migbunsilaˈi gilat, mingeneg, migdelalak metikteg, miglinug sampay migdupiˈ batu, gempales dupiˈ.