¹ Naa mendadi, mituaˈ ditug langit ki mekesalebuˈ gupia tuˈus. Duunig libun, su gendawi suuben, sug bulan, gindeganen, mukaˈ mipenundek diniini sepuluˈ buˈ duaˈ buuk bitun. ² Kig libun kini, sungu megbataˈ. Sabaˈ kesait nu kegbatik tianen, mengagedi tanan mengaduy.

³ Naa, duun pa pelumi sala mekesalebuˈ tuˈus midayag ditug langit. Gembagel gupia metetubuˈ, gempula, maˈniin palas mamak atawaka buaya, pitu buuki gulunen, sepuluˈi sungagen. Miktukid dadema tundeki nga gulunen. ⁴ Mendadi impun nu maˈniin buaya di gikugen su ketelu ilasen di ngag bitun diag langit, piniglaken dayun dinig lumbang. Pegindeg iin dayun dia mesunguˈan nig libun kini, adun depaˈenen su gembataˈ saˈ megigetaw na. ⁵ Dayun megaanay kig libun kia. Kaliˈ pegigetaw su gembataˈ, bataˈlaki, iin su meglekaunutan di nga kelaun nasud mukaˈ bansa lemaˈ denlag. Metegasi keguiten dinilan, puˈ peguit dinilan su sekuden putaw. Laak dagid duuni suminakmit tu gembataˈ, dayun iwit ditu Megbebayaˈ, ditu melengas gingkudan gadiˈ. ⁶ Mikeglaguy dayun sug libun ditug limawaˈ daan na pingandam nu Megbebayaˈ pegbebenwananen. Piˈingat dayun nu Megbebayaˈ dia sug libun, taman sengibu buˈ duaˈ gatus buˈ enem puluˈ endaw.

⁷ Mendadi benaˈ mitektak na su sengibu buˈ duaˈ gatus buˈ enem puluˈ endaw, iin dayuni pikpuunan nu gubat ditug langit. Si Miguel, sala tawan di nga sesuguˈen nu Megbebayaˈ getaw langit, mukaˈ su nga sakupen sama sesuguˈenen, mingatu ilan ditu maˈniin buaya kia. Ki maˈniin buaya kia mukaˈ su nga sakupen sama sesuguˈenen, mingatu dailan dema megbunuˈ. ⁸ Laak dagid, dinaag gupia su maˈniin buaya mukaˈ su nga sesuguˈenen kia. Pingutidan ilan dayun diag langit, subay ndiˈ nailan puliˈ megbenwa dia. ⁹ Mendadi ki gembagel metetubuˈ maˈniin palas buaya, linabuˈ na tuˈu dini silung. Iinen su mamak dengantu, ngalanen su Palin mukaˈ si Satanas, su miglimbung di tibaˈan kilawan. Sampay su nga sama sesuguˈenen getaw langit, linabuˈ dailan dema gelaˈ dinig lumbang.

¹⁰ Mendadi, benaˈ milabuˈ ilan, duun dayuni midengegu beksay ditug langit, laungen, “Ki keglegawen nu Megbebayaˈ di nga kilawan, minuud na tuˈu nandaw! Su pegbayaˈ nu Megbebayaˈ, biwasanen na gupia, puˈ iini tantu Gadiˈ. Ki Tinduˈ nu Megbebayaˈ Meglekaunutan pa pagid, biwasan na dema sug daniin pegbayaˈ! Puˈ ki migindeg ditu gedapan nu Megbebayaˈ adun dengatenen gebii gendaw su nga mimated dinita, iin, piawaˈ na dinig langit. ¹¹ Su nga mimated dinita, mikedaag nailan ditug dumangat dinilan kia, pibian dig duguˈ nu Nati Karniru, puun dadema tu taluˈ nu Megbebayaˈ piglegintuud nilan. Puˈ ndaˈ dig delendeman nilan su gumul nilan, kaas lagaˈ na tuˈu nu kesakup nilan su gumul nilan. ¹² Kaas yamu nga tibaˈan megbenwa dinig langit, gempia penleliagen amu! Laak dagid, yamu nga megbenwa diag lupaˈ mukaˈ diag dagat, mekelelaatlelaat amu gupia! Puˈ su Palin, luminusad na diniu. Iin, mipatiˈ gupia mangit, puˈ sabaˈ misuunanen sungu na mengikteb su sikawanen menggulaula melaat.”

¹³ Naa, ki maˈniin palas buaya, kaliˈen mesuunay puˈ linabuˈ dinig lumbang, pingeteden dayun sug libun kia migbataˈ bataˈlaki. ¹⁴ Laak dagid sug libun, bigayan duaˈ buuk gekpak gembagel tipuli, adun mekelayug meglaguy ditug limawaˈ, ditu tandaˈ paingaten iin taman telu taun buˈ ginengaˈ, adun ndiˈ medepilan nu maˈniin buaya. ¹⁵ Dagid, ki maaˈ nug buaya, sinumpitanen dayun sug libun tubig, laung mu dun maˈniin nu guluan baaˈ, adun sia manud ditu selegan sug libun. ¹⁶ Laak dagid, ibangan pasiˈ nug lupaˈ sug libun, puˈ miganga sug lupaˈ, dayunen igupay su tubig sinumpit dun sia nug buaya. ¹⁷ Iin, mitutung dayun gangiten ditug libun, kaas pigbunuˈen su kelaun lain bataˈ nug libun, saˈitada su ngag lumaun mikpetuud ditu pinalinta nu Megbebayaˈ, ki dumunut tu metuud ginukit ni Isus. ¹⁸ Dayun ki maˈniin palas buaya kia, megindeg dia geksid dagat.