¹ Mendadi benaˈ ndaˈ maiben, duuni minitaˈu ki mekendekendek menamad guminawen diag dagat. Ki menamad kia, sepuluˈ buuki sungagen, pitu buuki gulunen, miktukid tundeki nga sungagen. Su nga gulunen, miktukid dadema sulatay ngalan meksudiˈ ditu Megbebayaˈ. ² Iini palas nu menamad minitaˈu, maˈniin gembagel malig kuting. Su geksuden, maaˈ danu gembagel gituˈ telunan. Sug babaˈen, maˈniin babaˈ limaung. Mendadi, su metetubuˈ maˈniin palas buaya, bigayen dayun ditu menamad su ginuungen mukaˈ su keglekaunutanen sampay su metaas pegbayaˈen. ³ Naa, ki menamad guminawen ditug dagat, salabuuk di nga gulunen, mipatiˈ mengelay, palas gangelen mekepatay. Laak dagid su gangelen, mikpaliˈ na. Misebuˈan dun dayun sug launan getaw, benaˈ suminakup ilan diniin, ⁴ mukaˈ piktamuy nilan dadema su metetubuˈ maˈniin palas buaya, puˈ sabaˈ bigayen tu menamad kia su metaas pegbayaˈen. Mukaˈ piktamuy pa padun nu nga getaw su menamad. Kaliˈ ilan taluˈ, “Ki menamad kini, ndaˈidunig lepengen. Ndaˈiduni mekengatu megbunuˈ dun!”

⁵ Naa, ki mekendekendek menamad kiin, mibuang diniin menakabul sampay meksudiˈ gupia tu Megbebayaˈ, mukaˈ bigayan pegbayaˈ gikteb laak paat puluˈ buˈ duaˈ bulan. ⁶ Piksudiˈanen su Megbebayaˈ, su ngalan nu Megbebayaˈ, mukaˈ su pegbenwananen, sampay su ngag launan megbenwa ditug langit. ⁷ Biwang dadema di menamad lumpakanen su nga piglegetawan nu Megbebayaˈ dinig lumbang, mukaˈ daagenen ilan, sampay bigayan dadema pegbayaˈen meglekaunutan di kelaun bansa, di tibaˈan benwa, dig launan getaw pia taˈ pikebitanay dun, sampay dig lumaun nasud. ⁸ Maˈantu mektamuy tuˈu diniin sug launan kilawan megbenwa dinig dibabaw lumbang, saˈitada su nga getaw ndaˈ mesulati ngalan nilan tug linulun sinulat nu pinatay Nati Karniru. Puˈ su ndaˈ pa mbaali gekleb langit buˈ lupaˈ, linista na dig linulun sinulat kiin su ngalan nu nga getaw mpeduma di ketubuˈ ndaˈi tamanen.

⁹ Kaas adin sug duuni telinganen, mekineeg dema tuˈu! ¹⁰ Adini getaw singuˈanen daapen, iini daapen tuˈu. Adin pelumi getaw singuˈanen kepetayanen sundang, sundangi pekpatay dun tuˈu. Kaas ita nga piglegetawan nu Megbebayaˈ, subay menamal ita mektigel di kelegenay ta, mukaˈ sumalig ita gusay diniin.

¹¹ Mendadi duun pa pagidi minitaˈu sala mekendekendek menamad gumiwaˈ dig lupaˈ. Ki menamad kia gumiwaˈ dig lupaˈ, duaˈ buuki sungagen maaˈ sungag nati karniru, laak su taluˈen, maaˈ danug buaya. ¹² Iin, pipegbiaˈan nug bekna mekendekendek menamad, adun sumugut dun. Tigelen su tibuuk lumbang mektamuy ditug bekna mekendekendek menamad, su mipatiˈ gangel laak mikpaliˈ na. ¹³ Naa, ki keduaˈ mekendekendek menamaden, pinggulaulaneni nga mekesalebuˈ ginuung, pilebuˈanen gapuy kig lumbang kini genat ditug langit di pegitaˈen nug launan getaw. ¹⁴ Piglimbunganen su kelaun getaw dinig dibabaw lumbang pibian di mekesalebuˈ tuˈus biwang diniin penggulaulanen di gedapan nug bekna mekendekendek menamad. Sinuguˈen dayun su kelaun getaw dinig lumbang megbaal ilan ledawan, palas nug bekna mekendekendek menamad, adun pegbasa diniin, su miangel sundang laak ndaˈ mpatay dun. ¹⁵ Biwang dayun tu keduaˈ mekendekendek menamaden begayanen ginaa sug ledawan nug bekna mekendekendek menamad, adun mekektaluˈ sug ledawan mukaˈ mekepatay tu nga ndiˈ mektamuy diniin. ¹⁶ Tigelen dayun sug launan getaw, sug duuni gelalen saˈ su ndaˈidun, sug datuˈ saˈ su gempusuk, su gulipen saˈ su kanaˈ gulipen, betangan tuˈus sug lintu kemet nilan mukaˈ su gangas nilan. ¹⁷ Ndaˈiduni mekesaluy mukaˈ mekeksesaluy, bisan taˈ taway dun, subay su laak mibaalan tuˈus. Ki tuˈus kia, su ngalan nug bekna mekendekendek menamad, atawaka sug lumiru gantiˈ tu ngalanen.

¹⁸ Naa subay melisebuten amu. Adin su metaasi tinawanen, iini mekaulug dig lumiru kini nu menamad, puˈ kig lumiru, guminantiˈ di ngalan nu getaw. Ki genem gatus buˈ enem puluˈ buˈ enem (666), iin sug lumiru nug bekna mekendekendek menamad.