¹ Mendadi kaliˈu pegenleng, minitaˈu su Nati Karniru pegindeg ditug bentud Sion. Duun dademai megatus buˈ paat puluˈ buˈ paat ngibu tawan getawig duma nu Nati Karniru. Ki nga melaun getaw kini, misulat di gangas nilan su ngalan nu Nati Karniru mukaˈ su ngalan nu Gamaˈen. ² Duun pa pagidi midengegu taluˈ ditug langit maˈniin deguk nu tubig dia metaas baga, maˈniin dadema metikteg delalak. Su tingeg midengegu, mekauyuk arpa pegayep nu nga getaw.+\fr 14:2 \ft Sug arpa, ginis gayepan duuni kurdasen sugiten nu megayep dun. ³ Naa ki nga megatus buˈ paat puluˈ buˈ paat ngibu tawan getaw kini, memegindeg ilan dia mesunguˈan nu melengas gingkudan gadiˈ, di gedapan dadema nu paat buuk tetubuˈ biwat sampay nu nga meglegulang kaunutan. Pemegbebaten nilanig begu bebat. Ndaˈig lain getaw mekesuun dun, ilan laak su nga milekat dini tibuuk lumbang. ⁴ Ilan dademai nga getaw, saˈ beniˈ dagid melinggas ilan, puˈ ndaˈ ilan pegdusa. Genat pa di kaikaˈay nilan ndaˈi kelemuˈay nilan. Megdedunut ilan gusay ditu Nati Karniru, pia tandaˈ iin pangay. Likat ilan nu Karniru di kelaunan kilawan, kaas ilani mibaal bekna begay ditu Megbebayaˈ mukaˈ ditu Nati Karniru. ⁵ Puˈ ndaˈiduni medengeg taluˈ nilan balus mukaˈ kanaˈ ilan medangat.

⁶ Naa mendadi, minitaˈu pa paduni sala sesuguˈen nu Megbebayaˈ getaw langit peglayug ditu gawanawan. Ki getaw langit kini, peguitenen su Gempia Petenday ndiˈ mpapas, adun mpelaktag di nga getaw dinig dibabaw lumbang, di tibaˈan bansa, dig lumaun benwa, pia taˈ pikebitanay dun, sampay ditu nga getaw di kelaun nasud. ⁷ Miktegas dayun mektaluˈi getaw langit, laungen, “Ki Megbebayaˈ, pegbesaay niu iin dunut mendek amu dun, mukaˈ penalan niu! Puˈ mitektak na tuˈu su sesaˈ, ukumenen na tuˈu su tibaˈan kilawan. Pektamuy niu gusay su Mikleb dig langit, su Miwat dig lupaˈ, su Minunag dig dagat sampay di nga kelaun tebud!”

⁸ Duun dayuni keduaˈ sesuguˈen nu Megbebayaˈ getaw langit suminukli ditug bekna getaw langit. Kaliˈ pektaluˈ su keduaˈ getaw langiten, “Migebaˈ! Ki migdedengeg gupia syudad kiin, Babilonia, migebaˈ na tuˈu! Iini pilebuˈan dun, puˈ piˈinumen na di tibaˈan getaw su gembisa penginumenen, ki penginumen, iin su gayaken gupia tu kegdusa.”

⁹ Mendadi duun na pelumi ketelu getaw langiten suminukli ditug duaˈ tawan kia miuna. Iin, miktegas dayun mektaluˈ, “Adin su getaw mektamuy ditug bekna mekendekendek menamad mukaˈ ditug ledawanen, sampay begayen mesulatani gangasen atawaka kemeten tuˈus nu menamad kia, ¹⁰ iin, mainumen pa su penginumen nu Megbebayaˈ. Ndaˈ belekwitay su penginumenen pia maikaˈ, aalen ditu tasa nu gangiten, saˈitada su kekpelabuˈ nu Megbebayaˈ dig lumaun mikesalaˈ! Su kelaun kilawan mektamuy ditu mekendekendek menamad, pelegetan ilan di gapuy ndaˈi kepalengen mukaˈ di pegligaˈ asupre.+\fr 14:10 \ft Duuni ginis mekaikaˈ lupaˈ paingalan dun asupre, medalag tantu, meduˈ gupia maaˈ nu gumanuk miduˈ na. Kiin, mbianan nilan di pegitaˈen nu nga pinaas sesuguˈen nu Megbebayaˈ getaw langit, sampay di gedapan nu Nati Karniru. ¹¹ Su gebel nu gapuy kia mekpeleget dinilan, peglintuk di ndaˈi gikteben. Ki tibaˈan kilawan mektamuy tu menamad mukaˈ ditug ledawanen, bisan taˈ taway dun misulatan ngalan nu menamadi gangasen, saˈ su kemeten, gebii gendaw subay mektigel di keleget ndaˈi kesikpaˈen.” ¹² Kaas, ita pasiˈ nga piglegetawan nu Megbebayaˈ, su nga mekpetuud di pinalintanen mukaˈ sumalig gusay ditu Kaunutan ta si Isus, subay menamal ita mektigel di kelegenay ta.

¹³ Naa mendadi, duun dayuni midengegu tingeg ditug langit, kaliˈ taluˈ, “Kini pelum sulat mu. Genat nandaw leliagen gusay su nga mematay puun tu keksalabuuk nilan ditu Kaunutan!”

Kaliˈ sumpat sug Balakat nu Megbebayaˈ, “Metuud lai daan, mekelali nailan tuˈu dig lasay nilan, puˈ saˈ muliˈ nailan dini, muit na dema nilan su sengkuˈ nug lesayan nilan.”

¹⁴ Mendadi tubus nitu, kaliˈu pegbantay, minitaˈui gemputiˈ gabun, duuni pegingkud dia gabun maˈniin nu kilawan. Ki pegingkud dia, duuni tundeken bulawan dia gulunen. Pegawid mauteng garab. ¹⁵ Dayun duuni sala getaw langit gumiwaˈ diag Balay Pengedapan tu Megbebayaˈ, mukaˈ minekeg mektaluˈ ditu pegingkud dia gabun, “Peglabay mu su garab mu, peglegania na, puˈ minateng na tuˈu kig basa meglegani. Mainug na pakayaw su geniin dinig lumbang!” ¹⁶ Piglabay dayun tuˈu nu pegingkud dia gabun su garaben. Kaas sug lumbang, mitebas na.

¹⁷ Naa, duun pa pagidi minitaˈu sala getaw langit gumiwaˈ ditug Balay Pengedapan tu Megbebayaˈ ditu gekbus langit. Iin, peguit dadema mauteng garab.

¹⁸ Mendadi, duun pelumi getaw langit gumiwaˈ ditu gentudan gilak. Iini megbayaˈ ditu gapuy. Tiwaganen su getaw langit kia, su peguit dadema garab, kaliˈ taluˈ, “Peglabay mu su garab mu, adun lugdas mu na su kelaun bunga gubas dia pigimulanan dun dig lumbang, puˈ migelaˈ na mainug su ngag bunganen!” ¹⁹ Maˈantu piglabay tuˈu nu getaw langit su garaben mukaˈ linugdasen dayun su kelaun bunga nu gubas kia. Benaˈ mitubus, dayunen pengempunay, linabuˈen dayun ditug luak tandaˈ peesen nu Megbebayaˈ su gubas adun baalenen penginumen. Ki kekpeesen kiin, iin su gangit nu Megbebayaˈ. ²⁰ Laak pinees su nga gubas diag liu syudad. Benaˈ pinees, migbaaˈ dayuni pineesan dun. Kig baaˈ, duguˈ, telu gatus kilumitruig yebaˈan nug duguˈ, sedepai kedalemen.