15
Pengendamen su Katapusan Pelabuˈ
1 Naa mendadi, duun na pelumi sala mekesalebuˈ gupia tuˈus minitaˈu ditug langit. Duuni pitu tawan sesuguˈen nu Megbebayaˈ getaw langit, peguiten nilani pitu ginis pelabuˈ mayan dinig benwa. Iin na su katapusan pelabuˈ nu Megbebayaˈ, megelaˈ na tuˈu mekpalas dun su gangiten.
2 Mukaˈ pagid, duun dademai minitaˈu dagat, maˈniin palas pagalungan milemugan gapuy. Minitaˈu pa pagid su nga getaw mikegdaag ditug bekna mekendekendek menamad, sug duunig ledawanen mukaˈ sug lumiru ledawan nu ngalanen. Ki nga getaw kini, memegindeg ilan ditu geksid nug dagat kia maˈniin palas pagalungan, peguidan nilani ngag arpa bigay dinilan nu Megbebayaˈ. 3 Pegbebaten nilan sug bebat ni Moises, su sesuguˈen nu Megbebayaˈ dengantu, iin dademaig bebat nu Nati Karniru. Kaliˈ ilan pegbebat,
“Uu Kaunutan Megbebayaˈ, Tampusan Ginuungan,
Su gulaula mu, migleep gupiaig dengegan nu kelengasen.
Kig baalen mu, mekesalebuˈ tanan!
Ndaˈiduni nasud, saˈ kanaˈ yaˈai meglekaunutan dun.
Kig betad mu, meglepeng tandeng mukaˈ metuud gupia.
4 Ndaˈidun bai getaw ndiˈ megbasa diniˈa, uu Kaunutan?
Adin ba saani mpauk mangken puˈ melengasi pegbayaˈ mu?
Puˈ ndaˈidunig lain mikpaas ditu melaat, ditu salaˈ, yaˈa laak.
Mekpesempel diniˈa su nga ginsekupan nu tibaˈan nasud,
adun mengamuyuˈ ilan diniˈa.
Puˈ medayag nu kelaun getaw su mekesuun gulaula mu.”
5 Mendadi tubus nitu, minitaˈu sug Balay Pengedapan tu Megbebayaˈ ditu gekbus langit kampuˈ nug lepintaw dia pegbenwanan nu Megbebayaˈ, mipukaˈ. 6 Gumiwaˈ diai pitu tawan sesuguˈen nu Megbebayaˈ getaw langit, peguiten nilan su pitu ginis katapusan pelabuˈ pebianen dinig dibabaw benwa. Mengelinggat tanani suub nu nga getaw langit kia sabaˈ keputiˈen, sabaˈ dadema kelenuˈen. Duun dadema di gegdeb nilani misulagdat dun bulawan. 7 Mendadi salabuuk di nga paat buuk tetubuˈ biwat kia, duuni pitu buuk yaˈung bigayen tu nga pitu tawan getaw langit kia. Ki pitu buuk yaˈung kini, gaalan bulawan, mipenuˈ nu gangit nu Megbebayaˈ, su ndaˈi gumulen. 8 Naa sug Balay Pengedapan tu Megbebayaˈ, mileep gebel puun tu tiag nu Megbebayaˈ mukaˈ ginuungen. Kaas ndaˈiduni mekeseled dig balay kia, subay mpapas pai pitu ginis pelabuˈ kia iwit nu pitu tawan sesuguˈen nu Megbebayaˈ getaw langit.