¹ Mendadi, duuni metikteg gupia taluˈ diag Balay Pengedapan tu Megbebayaˈ. Tiluˈaneni pitu tawan sesuguˈen kia nu Megbebayaˈ getaw langit, laungen, “Panaw namu. Bunag na niu ditug lumbang ki pitu buuk gaalan niu bitangan gangit nu Megbebayaˈ!”

² Naa sug bekna getaw langit kia, mipanaw dayun tuˈu, binunagen tuˈu su peguidanen gaalan dinig lumbang. Lemen laak mibunag, duun dayuni mesait gupia penleduun mituaˈ dia panit nu nga getaw misulatan ngalan nu mekendekendek menamad, su kelaun miktamuy ditug ledawanen.

³ Mendadi benaˈ mitubus, su keduaˈ getaw langiten, binunagen na pelum su gaalanen, ditunen pelum binunag dagat. Sug dagat, binaluy dayun maaˈ nug duguˈ bangkay. Dayun mimatay su kelaun metetubuˈ mukaˈ sedaˈ diag dagat.

⁴ Tubus nitu, su ketelu getaw langiten, binunagen na pelum su gaalanen, ditunen pelum binunag ngag lawas tubig mukaˈ ditu nga tebud. Binaluy dadema duguˈ su nga tubig sampay su nga kelaun tebud. ⁵ Midengegu dayun su tingeg nu getaw langit megbayaˈ tu tubig. Kaliˈ taluˈ, “Uu Diwata mikpaas ditu melaat, ditu salaˈ, su tetubuˈ nandaw mukaˈ su tetubuˈ dengantu, meglepeng gupia ki nga kengukum mu kini di nga getaw. ⁶ Su nga getaw kia, kagina pitigis ma nilan sug duguˈ nu piglegetawan mu kampuˈ nu nga megwali tu taluˈ mu, naa piˈinum mu dadema dinilan duguˈ. Iin maig bantang sugda dinilan.” ⁷ Midengegu dademai miktaluˈ dia gentudan gilak, laungen, “Uu Kaunutan Megbebayaˈ Tampusan Ginuungan, su kengukum mu, meglepeng tantu mukaˈ metuud gupia!”

⁸ Mendadi su kepaat getaw langiten, binunagen na pelum su gaalanen, ditunen binunag mata gendaw, kaas biwang dun pepesuˈen su nga getaw sabaˈ nu kainiten. ⁹ Dayun mipatiˈ tuˈu mpasuˈ su nga getaw dinig dibabaw lumbang, sabaˈ kainit nu gendaw. Tinampalaksaan nilan dayun su Megbebayaˈ, su migbayaˈ di nga kelaun pelabuˈ. Laak dagid bisan maˈantu, ndaˈ ilan gusay pegbiksuˈ di salaˈ nilan mukaˈ ndaˈ nilan gusay pegdedengegay su Megbebayaˈ.

¹⁰ Mendadi, su kelima getaw langiten, binunagen na pelum su gaalanen. Binunaganen dun su gingkudan nu mekendekendek menamad. Su keglekaunutan nu menamad kia, dumilem dayun. Pingebut tanan nu nga getaw sug dilaˈ nilan sabaˈ kektigel nilan di mesait. ¹¹ Tinampalaksaan nilan su Megbebayaˈ ditug langit, sabaˈ nu nga mesait nilan mukaˈ nu nga melaat gupia leduun nilan. Laak dagid bisan maˈantu, ndaˈ nilan gusay teliuday su melaat gulaula nilan.

¹² Mendadi, su keˈenem getaw langiten, binunagen na pelum su gaalanen. Ditunen binunag lawas nu gembagel tubig piningalan dun Eufrates. Mitian dayun su tubig, puˈ adun duunig dalan nga gadiˈ mpanaw genat ditu dapit silangan. ¹³ Minitaˈu dayun ki maˈniin palas buaya kia, mukaˈ sug bekna mekendekendek menamad, sampay su sala tawan tautau pimuunan daw nu Megbebayaˈ. Telu ilan.+\fr 16:13 \ft Ki tautau pimuunan nu Megbebayaˈ kiin, iin su keduaˈ menamaden kia, su gumiwaˈ dig lupaˈ. Duun dademai gumiwaˈ dig babaˈ nilan, telu buuk mekelemuˈlemuˈ menenulay. Ki menenulay kia, palas nilan maˈniin nu gekbak. ¹⁴ Ginuungan ilan gupia menggulaula mekesalebuˈ. Tukiden nilan laaway sug launan gadiˈ dini tibuuk lumbang, pungunen nilan, puˈ adun menlumpak ilan saˈ mateng na ki mekesalebuˈ gendaw tinduˈ nu Megbebayaˈ, su Tampusan Ginuungan.

¹⁵ Naa, midengegu miktaluˈ su Kaunutan ta, “Pektalentenay niu gupia! Mpuliˈ dau diin maaˈ nu ketuaˈ nu megdaaw, puˈ metekawan. Su pegenduk mukaˈ sug lelayun pegandam di penepetenen adun saˈ tekaw mekepanaw, kanaˈ da peglebas, ndiˈ da mpiidan di gedapan nu melaun getaw, ilan, leliagen ilan.”

¹⁶ Naa, minitaˈu dayun pinungun tuˈu nu menenulay su nga gadiˈ, ditu nilan pungunay salabuuk benwa, piningalan dun nu getaw Judea Armagedon.

¹⁷ Mendadi, su kepitu getaw langiten, binunagen na pelum su gaalanen. Ditunen binunag gawanawan. Duun dayuni minikteg mektaluˈ ditug Balay Pengedapan tu Megbebayaˈ, kaliˈ pektaluˈ, “Naa mingikteb na!” ¹⁸ Migilat dayun lamug mikpenlugung, mesasak gupia, sampay metiktegig linug. Genat pa dengantu ndaˈ pa siben bianay ki maˈnia ketiktegen. ¹⁹ Saˈ maˈantu, su migdedengeg gupia syudad kia Babilonia, mipegilas telu ilasan, mukaˈ migebaˈ tanan su ngag lunsud di nga kelaun nasud. Puˈ su Megbebayaˈ, midelendemen su syudad, kaas piˈinumen dun su penginumen bitang tu tasanen, saˈitada su gembagel gangiten. ²⁰ Mukaˈ su kelaun pinuluˈan diag dagat mukaˈ su ngag binentudan, migelaˈ dadema malep. ²¹ Dinupiˈan dayun dupiˈ batu su nga getaw dinig dibabaw lumbang. Kada salabuuk dig dupiˈ batu kia, naa lima puluˈ kiluig begaten. Tinampalaksaan dayun nu nga getaw su Megbebayaˈ, sabaˈ melaat patiˈ pelabuˈ sug dupiˈ batu kia.