¹ Naa mendadi, sala tawan di nga pitu tawan sesuguˈen nu Megbebayaˈ getaw langit pegawid pitu gaalan, mikpesempel dinaan. Kaliˈ pektaluˈ, “Dunuta dinaan, puˈ ki migdedengeg libun kiin tebiaˈ meglaat pekesuunan, paitaˈu diniˈa saˈ endutaˈen ku dun pelebuˈay. Guluganen su gembagel syudad dia mibetang tandaˈ nu timualag. ² Su nga gadiˈ dinig lumbang kini, tebiaˈ miksumbang tu migdedengeg laat libun kia. Maˈniin mibulek di penginumen su kelaun getaw sabaˈ nu kainum nilan dig dusanen.”

³ Naa mendadi, pingepuˈanu nug Balakat nu Megbebayaˈ mukaˈ iwitu nu getaw langit ditug limawaˈ. Benaˈ ditu nau, duuni minitaˈu libun peksakay di gempula menamad. Su sikayanen menamad, mekendekendek, mileep sulatay nga ngalan meksudiˈ tu Megbebayaˈ, pitu buuki gulunen sampay sepuluˈ buuki sungagen. ⁴ Naa, kig libun kini, piselukan suub, metinggasi kepulanen. Miputus dadema pekayan bulawan, ngag bagabaga mukaˈ nga perlas.+\fr 17:4 \ft Ki perlas, ginis pekayan batu, gemputiˈ, maitaˈ diag dialem belelungan ginis budenay diag dagat. Pegawid pa pagid tasa bulawan mipenuˈ penginumen, saˈitada su nga mekepiidpiid gulaula kampuˈ nu kelaun melaat gulaula, sengkuˈ nu kesumbangen. ⁵ Misulat dadema di gangaseni ngalan, laak igludi guluganen. Iini misulat, “Kig Babilonia, migdedengeg syudad, su ginaˈ nu nga kelaun libun tebiaˈ meglaat pekesuunan sampay su nga menggulaula gininisan mekepiidpiid dinig dibabaw lumbang kini.” ⁶ Mukaˈ minitaˈu kig libun kia, mibulek dig duguˈ nu nga piglegetawan nu Megbebayaˈ, sug duguˈ nu nga getaw pipatayen sabaˈ nu kesakup nilan dini Isus.

Kaliˈu maitaˈ sug libun, misebuˈanu dun gupia. ⁷ Laak su sesuguˈen nu Megbebayaˈ getaw langit, kaliˈ saak dinaan, “Taˈ mai misebuˈan ka dun? Kig libun kia, pesuun ku pa diniˈa su giglud guluganen sampay su gulugan nu sekayanen mekendekendek menamad, ki pitu buuki gulunen mukaˈ sepuluˈi sungagen. ⁸ Ki menamad kia minitaˈ mu, gandang tetubuˈ, laak nemun, minatay na. Laak sungu na guaˈ pelum ditug bayaˈ, adun mekangay ditu pektipuan dun tantu. Misebuˈan duni nga getaw megbenwa dinig dibabaw lumbang ndaˈ mesulati ngalan nilan dig linulun sinulat tandaˈ milista su ngalan nu getaw mpeduma di ketubuˈ ndaˈi tamanen, ki gandang na misulat su ndaˈ pa mbaali gekleb langit buˈ lupaˈ. Puˈ su menamad, gandang tetubuˈ, laak minatay na mukaˈ metuaˈ pa puliˈ.”

⁹ Laung padun nu getaw langit, “Naa, subay metelisebuten su getaw, subay duuni kekesuunen, adun maulugen ini. Su pitu buuk gulu nu mekendekendek menamad, iin su pitu dungusan pegingkudan nug libun kia. Sala guluganen, pitu tawan gadiˈ. ¹⁰ Naa, su pitu tawan gadiˈ kia, lima tawan dinilan, ndaˈ na. Su sala tawan dinilan, peglekaunutan pa nemun. Su sala pa, ndaˈ pa metuaˈ. Laak saˈ mateng nain, ndiˈ dadema maibeni keglekaunutanen. ¹¹ Ki mekendekendek menamad kiin, gandang tetubuˈ dayun minatay, iini kewalu adiˈen, duma nu nga pitu tawan gadiˈ. Iin, peksungu ditu kepatayen ndaˈi gikteben.

¹² “Su minitaˈ mu kia sepuluˈ buuk sungag nu menamad, iini sepuluˈ tawan gadiˈ pelum, laak ilan, ndaˈ pailan pekpuun meglekaunutan. Begayan pailan pegbayaˈ megduma ilan di mekendekendek menamad meglegadiˈ taman laak sauras. ¹³ Salabuuk daig delendeman nu sepuluˈ tawan gadiˈ. Su ginuung nilan sampay su pegbayaˈ nilan, begay nilan ditu mekendekendek menamad. ¹⁴ Megbunuˈ pailan ditu Nati Karniru, laak dagid daagen ilan nu Nati Karniru mukaˈ nu nga sakupen, su nga pingenggaten, tinduˈen mukaˈ mibaal meseligan sakupen. Puˈ ki Nati Karniru kini, iin su Meglekaunutan di nga kaunutan mukaˈ Meglegadiˈ di nga gadiˈ.”

¹⁵ Laung padun dinaan nu getaw langit pegawid gaalanen, “Naa, ki minitaˈ mu lawas tubig kia miktimualag ditu tandaˈ pegingkud sug libun tebiaˈ meglaat pekesuunan, iini getaw di melaun bansa, di metibaˈ benwa, sampay di gininisan nasud mukaˈ pikebitan. ¹⁶ Naa su pelum minitaˈ mu sepuluˈ buuk sungag nu menamad, saˈitada su sepuluˈ tawan gadiˈ kampuˈ nu mekendekendek menamad, mesengay nilan gusay kig libun kia. Penguiˈen nilan sug launan gimunen benaˈ melebasan laak iin. Aanen pa nilan padun su guneden dayun nilan tutungay su samaˈ dig libun kia. ¹⁷ Puˈ pidelendem nu Megbebayaˈ dinilan pekpelasen nilan su mauyaˈanen. Sug bian dun, meksalabuuk ilan sampay megbegay ilan pegbayaˈ nilan meglekaunutan ditu mekendekendek menamad. Mekpetuud ilan ditu menamad, sampay megelaˈ na menuud su tinaluˈ nu Megbebayaˈ.”

¹⁸ Diksuˈ nu getaw langit su tinaluˈen dinaan, laungen, “Naa ki minitaˈ mu kia libun tebiaˈ meglaat pekesuunan, iin daan su migdedengeg syudad migbayaˈ di nga kelaun gadiˈ dinig lumbang nemun.”