18
Su Kegebaˈ nu Syudad Babilonia
1 Mendadi tubus nitu, duuni minitaˈu pelum sala sesuguˈen nu Megbebayaˈ getaw langit peglusad dinig lumbang genat ditug langit. Iin, metaas gupiai pegbayaˈen. Su tiagen, mitiagan dun sug liwenagan nig lumbang kini. 2 Migbeksay dayun, kaliˈ pektaluˈ, “Migebaˈ na! Ki migdedengeg syudad Babilonia, migebaˈ na tuˈu! Genat nandaw ndaˈi megbenwa dun, subay laak nga ginis menenulay sampay su kelaun ginis mekelemuˈ mukaˈ mekesalasala manukmanuk. 3 Iini migebaˈ dun, puˈ kig libun kia tebiaˈ meglaat pekesuunan gitunganen su syudad, miginum di gembisa penginumenen sug launan nasud, saˈitada di gayak nug libun dig dusa. Minlelingay dun su nga gadiˈ dig lumbang, mukaˈ duminatuˈ gupia su nga nigusyanti puun tu ketagia nu melaat gayak nug libun.”
4 Mendadi iin pa pagidi tingeg midengegu ditug langit, kaliˈ taluˈ,
“Yamu nga piglegetawan ku, pegawaˈ amu dia syudad kia! Pegliaw niuig libun kia!
Iin, ndiˈ amu pekpedelaˈig di salaˈen,
adun ndiˈ damu dema mpeduma di ginukuman pelebuˈen ku diniin!
5 Puˈ su salaˈen, tinalimpuk, misangkuˈ ma tug langit,
pingebet na nu Megbebayaˈ su melaat betaden.
6 Peglegetay niu iin sama gupia di kepeglegeten diniu.
Su pinggulaulanen diniu, suliˈay niu duaˈ piluˈ.
Su penginumen piˈinumen diniu, painumay niu pelum iin
dig duaˈ piluˈ pai kebisanen.
7 Su ketaas nu kepetaasen dig lawasen mukaˈ su kemis nu kebetangen,
pesemaay niu dun su kegleget niu diniin mukaˈ su kelegenayen.
Lelayun pekteluˈenen dig lawasen, laungen,
‘Kini dau pegingkud maaˈ nug bai,
kanaˈ dau dema balu,
kaas ndiˈu na daan tuˈu mbianan su nga kelegenay!’
8 Kagina kiaig delendemanen, megelaˈen mbianay sug launan pelabuˈ diniin dig lagaˈ sendaw laak.
Kinii pelabuˈ diniin, su meliget leduun, nga kelegenay di ginaa, mukaˈ gunus
sampay metutung di gapuy.
Puˈ kiin, su Kaunutan Megbebayaˈ mengukum diniin, tampusan metaasi ginuungen.”
9 Mendadi su nga gadiˈ dinig dibabaw lumbang mipeduma ditu melaat gayak nug libun mukaˈ ditu kegdusanen, saˈ maitaˈ nilan su gebel nu ketutung diniin, megbeksay ilan mengaduy, lamug nilan menembit. 10 Memegindeg ilan dia melayuˈ, puˈ mendek ilan mbuus mpeduma ilan ditu kelegenayen, mukaˈ mektaluˈ ilan, “Apelai! Mekelelaatlelaat! Ki syudad Babilonia kini, migdedengeg gupia mukaˈ migbayaˈ di melaun nasud, dayun di sauras laak mibiananen na su ginukuman diniin.”
11 Naa, su nga nigusyanti kia, mengelaw dailan dema mukaˈ melegenan ilan, puˈ sabaˈ ndaˈidun nai menaluy ditu ngag degangan nilan. 12 Ndaˈ nai menaluy bulawan, bulawan selapiˈ, bagabaga sampay perlas. Ndaˈ nai getaw menaluy penepeten, pia kendutaˈ pai kelengasen sug budabudanen, saˈ gemputiˈ, saˈ gempula, saˈ pekayan gupia. Ndaˈidun dademai menaluy melengas gayu mukaˈ pimetang binaal gayu, tangu, mukaˈ nga ginis putaw mukaˈ tisaˈ. 13 Ndaˈ na pagidi menaluy gelingag, nga pagemut, pelinan, penginumen saˈ lana, garina, trigo, baka saˈ karniru, kebayuˈ mukaˈ sekayan duunig ligiden, sampay getaw, saˈitada nga gulipen. 14 Pekteluˈen pa pagid nu nga nigusyanti ditug libun gitunganen su syudad, laungen, “Su kelaun gayak mu gimu, mialep na. Su tibaˈan gaˈus mu sampay su kelengas nug lawas mu, migelaˈ na mbeleng. Ndiˈ mu na maitaˈ puliˈ!” 15 Laak memegindeg dia melayuˈ su nga duminatuˈ puun tu kendagang nilan dia syudad kia, puˈ mipatiˈ ilan mendek mbuus mpeduma ilan di kelegenay nu syudad. Melegenan ilan mukaˈ mengelaw ilan. 16 Kaliˈ ilan taluˈ, “Apelai! Mekelelaatlelaati syudad Babilonia kini, asa migdedengeg gupia sia! Kitegaman nu sakupen, mekseluk ilan melengas gupia penepeten, gemputiˈ saˈ gempula, sampay megimakay ilan bitekel, baklaw mukaˈ singkil bulawan, bagabaga mukaˈ perlas. 17 Dayun lagaˈ sauras, migelaˈ gupia mbeleng dun su nga kelaun gimu nilan.”
Naa, su ngag launan meguit pelum bangkaˈ, su nga sumakay dun, su kelaun mengimbaal diag bangkaˈ sampay sug launan megleketubuˈ dig dagat, mimegindeg ilan dia melayuˈ di syudad, 18 mukaˈ migbeksay, saanan nilan megbantay tu gebel nu ketutung diniin, kaliˈ taluˈ, “Genat pa dengantu ndaˈidun naig lain syudad mesama puliˈ di migdedengeg kini syudad!” 19 Igbudan nilan dayun gabu lupaˈ su gulu nilan mukaˈ miktenlis ilan mengaduy, lamug nilan menembit, laung nilan, “Apelai! Mekelelaatlelaati migdedengeg syudad kini! Su ngag launan duunig bangkaˈen, duminatuˈ puun tu gaˈusen. Dayun lagaˈ sauras migelaˈ mbeleng diniin su gikteb gaˈusen.”
20 Naa taluˈu diniu, yamu nga getaw langit, penleliagen namu, puˈ ki syudad kini, migebaˈ na! Yamu nga piglegetawan nu Megbebayaˈ dinig lumbang, sampay yamu nga peneliganen mukaˈ pimuunanen, penleliagen namu! Puˈ su pinggulaula diniu nu syudad Babilonia, inukuman na nu Megbebayaˈ.
21 Mendadi, duun pelumi sesuguˈen nu Megbebayaˈ getaw langit ginuungan gupia, minimud batu maˈniin bagel galingan, dayunen lebuˈay ditug dagat. Kaliˈ taluˈ, “Ki migdedengeg syudad Babilonia, maˈniniˈi kegebaˈen tekaw. Dayun ndiˈ na maitaˈ puliˈ. 22 Ndiˈ na medengeg puliˈ dia syudad su tingeg arpa, bebat getaw, taluˈ lantuyan atawaka bugyung! Ndaˈidun demai panday mengimbaal dia, pia taˈ tinawanay dun! Ndiˈ na puliˈ medengeg dia sug deguk galingan! 23 Ndiˈ na puliˈ maitaˈ diaig lamag nu suluˈ, ndiˈ na padun medengeg dia su kabit nug beliˈiin. Kiin, asa su nga mengnigusyu dia, daansamaˈ miglekaunutan ilan di tibuuk benwa. Piglimbungan nilan su kelaun getaw dini tibuuk lumbang pibian di sagya pengemaw nilan.”
24 Naa, ki syudad Babilonia kini, iini inukuman dun, puˈ minitaˈ diaig duguˈ nu nga pimuunan nu Megbebayaˈ sampay su nga piglegetawanen, kampuˈ nug duguˈ nu ngag launan pinatay diag dibabaw lumbang.