¹ Mendadi tubus nitu, duuni midengegu maˈniin nu gelang nu melaun gupia getaw mektaluˈ ditug langit. Kaliˈ ilan taluˈ, “Su Megbebayaˈ, penalan ta! Mikpuun diniin su kegawen dinita, mukaˈ iini megdedengeg gupia sampay ginuungan tandeng! ² Metuud daan sug lumbus kengukumen, meglepeng gupia! Puˈ inukumanen su migdedengeg kia libun tebiaˈ meglaat pekesuunan, saˈitada su gembagel syudad Babilonia, puˈ pegdaangan nug libun kia su tibuuk lumbang puun tug dusanen. Sinilaˈ iin nu Megbebayaˈ, puˈ sabaˈ pimatay nug libun su nga sesuguˈenen kilawan.” ³ Dayun mimeksay puliˈ su melaun getaw ditug langit, laung nilan, “Penalan ta gusay su Megbebayaˈ! Su gebel nu mitutung syudad kia, ndiˈ gusay mpugyaw.” ⁴ Dayun kig duaˈ puluˈ buˈ paat tawan kia meglegulang kaunutan mukaˈ su paat buuk tetubuˈ biwat, minginlulud ilan dia gedapan nu Megbebayaˈ, su pegingkud dia melengas gingkudan gadiˈ, mukaˈ pigbesaan nilan iin dadema. Laung nilan, “Maˈantu daan! Penalan ta su Megbebayaˈ!”

⁵ Naa, duun dayuni midengegu miktaluˈ ditu melengas gingkudan gadiˈ kia. Kaliˈ taluˈ, “Yamu nga sesuguˈenen mukaˈ yamu nga kilawan, medatuˈ gempusuk, adin su megbasa ditu niin, penalan ta su Megbebayaˈ, su pektemuyen ta!” ⁶ Benaˈ midengegu su tingeg nu melaun gupia getaw, maˈniin deguk nu gembagel baga atawaka metenug gupia delalak. Kaliˈ ilan pektaluˈ, “Penalan ta su Megbebayaˈ! Puˈ su Kaunutan ta, su Tampusan ginuungan Megbebayaˈ, mikpuun na tuˈu Meglegadiˈ!” ⁷ Subay penleliagen ita dun gusay, penalan ta su ginuungan Diwata. Puˈ minateng na su gendaw beliˈiin su Nati Karniru. Su penginsuaanen, minuyaˈ na. ⁸ Puˈ bigayan na su penginsuaanen peselukan gemputiˈ penepetenen, mengelinggat sabaˈ kelenuˈen.” (Iini gulugan nu penepeten kia, su gempia gulaula nu piglegetawan nu Megbebayaˈ.)

⁹ Mendadi su sala tawan kia sesuguˈen nu Megbebayaˈ getaw langit, miktaluˈ pelum dinaan, “Sulat mu ini. Yamu nga ginggat sumaup dig belaˈi nu Nati Karniru kini, leliagen namu.” Kaliˈ dugang dun, laungen, “Kini gupia su metuud tinaluˈ nu Megbebayaˈ!”

¹⁰ Dayunu miglaub di gedapan nu getaw langit kia, adun pegbesaan ku iin sia, dagid miktaluˈ dinaan, “Paa, ndiˈa pa deliˈ. Sama sesuguˈen mau mukaˈ sama sesuguˈen dau dema nu nga mimated diniˈa, sampay su kelaun dumunut tu metuud ginukit ni Isus. Pegbesaay mu sungkin su Megbebayaˈ.”

Puˈ su metuud biwasan ni Isus, iin da tanan su pitaluˈ nu Megbebayaˈ tu nga pimuunanen.

¹¹ Mendadi minitaˈu sug langit mipukaˈ puliˈ, mukaˈ duuni gemputiˈ kebayuˈ dia. Ki peksakay dun, ngalanen si Meseligan, mukaˈ si Metuud. Iin, su kengukumen mukaˈ keglumpaken, mekebian di metuud. ¹² Su matanen, maˈniin nug ligaˈ gapuy. Di gulunen, melaun tundek. Misulatan iin di ngalanen, ki ngalan kia, iin da laak salaneni mekesuun dun. ¹³ Su suuben, mileep duguˈ. Iini paingalan diniin, “Su Taluˈ nug Megbebayaˈ.” ¹⁴ Tumindug diniin su nga sundalu dig langit, peksakay dailan dema gemputiˈ kebayuˈ, piselukan dailan dema suub gemputiˈ, mengelinggat sabaˈ kelenuˈen. ¹⁵ Mikseleput dig babaˈeni mauteng gupia sundang, iini pekpendaagen tu nga nasud. Naa, saˈ pendaagenen na, meglekaunutan dayun tuˈu di nga nasud, peguiten dinilani sekud putaw. Peglaatanen ilan maaˈ nu getaw mekpees di gubas saˈ megbaal penginumen, puˈ mangit dinilan gupia su Tampusan Ginuungan Megbebayaˈ. ¹⁶ Sinulat di suuben mukaˈ di paanen ki gelalen kini, “Su Meglegadiˈ di nga gadiˈ, su Meglekaunutan di nga kaunutan.”

¹⁷ Mendadi minitaˈu pelum sala tawan sesuguˈen nu Megbebayaˈ getaw langit pegindeg dia mata gendaw. Pitikteganen gupia sebiay su kelaun manukmanuk peglayug dia gawanawan, laungen, “Pekpungun amu dini, saup namu dig lumpuk nu Megbebayaˈ. ¹⁸ Dini niu pengaanay su guned nu nga gadiˈ mukaˈ nu nga kaunutan sundalu sampay su nga sundalu, su guned nga kebayuˈ sampay su suminakay dun, su guned nu tibaˈan getaw, saˈ gulipen, saˈ su kanaˈ gulipen, datuˈ saˈ gempusuk!”

¹⁹ Naa mendadi, minitaˈu su mekendekendek menamad gandang guminawen kia dig dagat mukaˈ su nga gadiˈ dinig lumbang sampay su kelaun sundalu nilan, mikpungun ilan gelaˈ, adun pembunuˈen nilan ki peksakay di gemputiˈ kebayuˈ mukaˈ su kelaun daniin sundalu. ²⁰ Dayun daapay su mekendekendek menamad mukaˈ su sala tawan kia tautau pimuunan nu Megbebayaˈ, su minggulaula nga mekesalebuˈ di pegitaˈen nu menamad.^a (Miksekat di nga mekesalebuˈ kia, piglimbungan nu tautau pimuunan su nga getaw mituˈusan nu mekendekendek menamad, sampay sug lumaun miktamuy tug ledawanen.) Linabuˈ dayun ditug linaw gapuy su mekendekendek menamad mukaˈ su tautau pimuunan nu Megbebayaˈ tetubuˈ pa, su gapuy lamug asupre ndiˈ mpaleng. ²¹ Pinatay dayuni nga sundalu nilan di sundang, su sundang mikseleput diag babaˈ nu peksakay gemputiˈ kebayuˈ, mukaˈ pingaan nug lumaun manukmanuk su guned nilan taman mibesug ilan.