¹ Mendadi duun pelumi minitaˈu sesuguˈen nu Megbebayaˈ getaw langit, peglusad. Duuni peguitenen, ki gunsiˈ inandam ditug bayaˈ, mukaˈi gembagel lantaylantay. ² Ki gembagel metetubuˈ maˈniin palas buaya, sug dengantu gilal mamak, saˈitada su Palin atawaka si Satanas, iin, binalud dayun nu getaw langit lantaylantay taman sengibu taun. ³ Puˈ linabuˈ nu getaw langit ditug bayaˈ, dayunen tekepay mukaˈ piligenanen sampay metektaki sengibu taun kiin, adun ndiˈ mekelimbung puliˈ di nga kilawan dini tibuukan benwa. Naa, saˈ metektak nai sengibu taun, beluyen pa puliˈ su Palin ndiˈ maiben.

⁴ Mendadi minitaˈu dayuni nga gingkudan gadiˈ mukaˈ su nga pemegingkud dia. Ki nga pemegingkud dun, bigayan ilan pegbayaˈ tu kengukum. Minitaˈu pa padun su nga gimuud nu nga getaw pimutukan gulu, sabaˈ nilan megukit ditu metuud biwasan ni Isus mukaˈ tu taluˈ nu Megbebayaˈ. Ilan kini, ndaˈ nilan pektemuyay su mekendekendek menamad atawaka sug ledawanen. Ndaˈ da nilan dema pesulatay di ngalaneni gangas nilan atawaka kemet nilan. Mendadi ki nga piputukan gulu kia, pitubuˈ ilan puliˈ. Migduma ilan dayun dini Kristu meglekaunutan taman sengibu taun. ⁵ Naa, su kepetubuˈ dinilan puliˈ, iin sug bekna ketubuˈ puliˈ. (Laak, su samaˈ nu nga getaw gandang mimatay, ndaˈ pailan metubuˈ puliˈ, sampay metektubi sengibu taun.) ⁶ Naa tumuˈ, su mipeduma dig bekna ketubuˈ puliˈ kini, su gempantek mipaas nailan nu Megbebayaˈ, penleliagen ilan gupia. Ndiˈ ilan mpeduma di keduaˈ kepatay, saˈitada ndiˈ ilan puliˈ melegenan. Mbaal ilan dayun ngag belian nu Megbebayaˈ mukaˈ ni Kristu. Megduma dailan dema dini Kristu meglegadiˈ taman sengibu taun.

⁷ Naa mendadi, kini si Satanas, benaˈ mpapas na su sengibu taun, beluyen iin ditu pirisuan dun. ⁸ Mpanaw dayun tu kelaun nasud misigwag di tibuuk lumbang, adun peglimbunganen su ginsekupan nu nga nasud. Paingalan dun su nga nasud kia, Gog mukaˈ Magog. Pungunen dayun su ginsekupan nu nga nasud, adun meglegubat ilan. Ndiˈ ilan mbilang sabaˈ kelaunen, gitungan dun sug lubek dia geksid dagat. ⁹ Naa saˈ mpungun nailan, mesigwag ilan pakayaw diag liwenagan benwa, puˈ adun pegalidungan nilan su pegbebelayan nu piglegetawan nu Megbebayaˈ sampay su syudad kia pitail nu Megbebayaˈ. Dagid duun pelumi gapuy melabuˈ genat ditug langit sumapul di nga nasud. ¹⁰ Dayun ki Palin meglimbung di nga nasud, pelebuˈen na tuˈu ditug linaw gapuy lamug asupre, dia tandaˈ gandang bileng dadema su sala tawan tautau pimuunan nu Megbebayaˈ mukaˈ ki mekendekendek menamad. Dayun ilan peglegetay ditu gebii gendaw di ndaˈi tamanen, ki tautau pimuunan nu Megbebayaˈ mukaˈ su mekendekendek menamad, ketelunen su Palin si Satanas.

¹¹ Naa tubus itu, duuni minitaˈu gembagel gupia gingkudan gadiˈ, gemputiˈ, mukaˈ minitaˈui pegingkud dia. Mendadi ki pegingkud kia, mitekaw mawaˈ ditu gedapanen su gekleb langit buˈ lupaˈ sampay mialep ilan gupia. Ndaˈ nailan puliˈ maitaˈ. ¹² Naa, minitaˈu pa pagid sug launan mimatay, datuˈ mukaˈ gempusuk, pemegindeg ilan dia mesunguˈan nu gingkudan kia. Bimbal dayuni ngag linulun sinulat. Bimbal pa pagidi sala sinulat, kig linulun sinulat tandaˈ milista su ngalan nu nga getaw mpeduma di ketubuˈ ndaˈi tamanen. Inukum dayun su nga mimatay, inukuman ilan mbantang tu gulaula nilan misulat na dia ngag linulun sinulat kia. ¹³ Puˈ su nga mimatay pelum diag liwenagan dagat, ditu gumul sampay su ngag ditug bayaˈ, mimengguaˈ ilan ditu. Ki tibaˈan nilan, inukuman mbantang tu gulaula nilan. ¹⁴ Mendadi ki gumul mukaˈ kig bayaˈ, linabuˈ na tuˈu ditug linaw gapuy. (Kig linaw gapuy kini, maˈananen su keduaˈ kepatay, su kepatay ndaˈi tamanen.) ¹⁵ Dayun lebuˈay ditug linaw gapuy su kelaun getaw, adin su ndaˈ mesulati ngalanen dig linulun sinulat kia tandaˈ milista su ngalan nu nga getaw mpeduma di ketubuˈ ndaˈi tamanen.