Bibi Dinar loge ḳobisi ḳamor bodla loa
34
1 Lear goro Dina name Iakubor ze fuṛi oisil, ein eḳdin honor fuṛintor loge deḳa ḳorat gela. 2 Ar Shikim namor eḳzon manshor souḳo foṛla. I Shikim asil Hibbi zatir shordar Homuror fua. Shikime ere zur ḳori doria nia ḳobisi ḳam ḳorillo. 3 Dinar bae tar dil ashik oigelo. He ere mohobbot kori erloge miṭa miṭa mat matto laglo. 4 Bade Shikime tar baf Homurre ḳoilo, “Tumi ou ḳoinare amar loge biar bondobost koro.”5 Iakube ḳobor faila, Shikime tan fuṛire beijjoti ḳorse, oile tan fuain foshur fal loia bondo taḳae, tain na-matia nirai roila. 6 Shikimor baf Homure Iakubor gese biar mat loia ailo, 7 ar i ḳobor hunia Iakubor fuain-o bondo tone aila. Tara betaea gusa ar gorom oila, ḳaron Iakubor fuṛire beijjoti ḳorae Shikime asta Israilor loge beijjoti ar nazaiz ḳam ḳorse.
8 Teu Homure erare ḳoilo, “Afnarar ḳoinar lagi amar fua ashik oigese. Doea ḳori, amar fuar loge er shadi dilaukka. 9 Amrar loge kuṭumita ḳoroukka, amrar ḳoinaintore afnara neukka ar afnararta amrare deukka. 10 Ar amrar loge taḳoukka, i asta deshu to samne roise, afnara ono-u taḳoin, ḳae-ḳarbar ḳoria, nizor malikana ḳaim ḳoroin.” 11 Shikime Dinar baf-baire ḳoila, “Amar bae afnara doea ḳoroin, afnara amar gese zeta saiba, ami ota-u dimu. 12 Mohorana ar mal-samana afnara zeta dabi ḳorba ami dimu, zekunu laḳan-u Dinare amar loge bia deukka.”
13 Shikime tarar boinre beijjoti ḳorsil ḳori Iakubor fuainte tare ar tar baf Homurre bana deḳaia ḳoila, 14 “Mosolmani ḳam na ḳorail kunu damandor loge amrar boinre bia dile amrar beijjoti oibo. 15 Oile ou ḳam ḳorle amra razi oimu, afnara hoḳol beṭainte mosolmani ḳoraia, amrar laḳan oiba. 16 Taile amrar fuṛintore afnarar gese dimu ar afnarar fuṛintore-o amra anmu, amra-o afnarar loge eḳ zati oia boshot kormu. 17 Oile afnara i mosolmanir ḳota na manle, amrar ḳoinare loia zaimugi.”
18 Teu tarar i mate Homur ar tar fua Shikim kushi oila. 19 Ou Shikim oilo gusṭir maze hoḳol tone dami manush. He deri na ḳoria ḳota manilailo, ḳaron Iakubor fuṛir bae he ashik asil. 20 Bade ṭaunor duaror gese aia, Homur ar tan fuae hokkol manshor loge matia ḳoila, 21 “I manushguinte amrare kunu zamela ḳorer na. Amrar desho erar taḳar lagi bout zagao ase, te era ono-u taḳouk ar ḳae-ḳarbar ḳorouk, amra erar fuṛintore bia ḳoria ani ar amrar fuṛintore-o tarar gese dei. 22 Oile amra ekkan ḳam ḳorle, tara amrar loge eḳ zati oite razi asoin. Ḳamṭa oilo, tarar laḳan amrar-o hokkol beṭaintor mosolmani ḳorani lagbo. 23 Ar tarar goru-meṛa, mal-samana hokkolta-u to amrar oibo, tarar ḳotae razi oile-u tara amrar loge taḳba.” 24 Ou ṭaunor hoḳol beṭain Homur ar tan fua Shikimor mate razi oilo, ar tara hoḳolor mosolmani ḳam ḳorailo.
25 Heshe tin dinor din zebla hoḳol beṭainte mosolmanir bedonae ḳoshṭo faira, ou shomoe Dinar afon bai Iakubor dui fua Shimion ar Lebi, tarar toluar loia ṭauno hamaia, erare be-kialo faia hoḳol beṭaintore ḳatol ḳorlo. 26 Tara Homur ar tan fua Shikimre-o toluardi ḳatol ḳoria Shikimor gor tone Dinare loia ailo. 27 Era tarar boinre beijjoti ḳorsil ḳori, Iakubor hoḳol fuainte mora lashor gese aia ṭauno luṭ-toraz ḳorla. 28 Ar ṭaunor bitor-bairor goru-gada, sagol-meṛa, ar ḳetor hoḳolta luṭia loia aila. 29 Hoḳol mal-samana, fua-fuṛin, beṭin, ar goror hoḳolta-o luṭ-faṭ ḳorla. 30 Heshe Iakube Shimion ar Lebire ḳoila, “Tumra i deshor Kenani ar Farizi oḳolor gese amare fosa-ginnar manush banaia mosiboto falaiso. Amar manush ḳom, oḳon tara ekḳano oia amare hamla ḳorle, ami foribaror hokkolre loia mormu.” 31 Tara zuaf dila, “He amrar boinre nia ḳanki banailito ni?”