Shudinor ḳalo Allare faurio na
8
1 “Oḳon ami tumrare ze hukum diram, tumra kub kiali oia ita amol ḳorio, teu tumra basia roibae, tumrar aolad baṛibo, ar tumrar moe-murobbir gese Mabude ḳosom ḳaia ze desh dibar oada ḳorsoin, hou desho hamaia doḳol ḳortae farbae. 2 Ar tumra mono rakio, tumrar Mabud Allae ou sallish bosore morubumir mazdi tumrare kila loia aisla, tumrar boṛai-beṭagiri bangibar lagi, ar tumra tan hukum-ahkam manbae ki na oḳan forikka ḳorar niote, tumrar dilor ḳobor zanar lagi tain tumrare noto ḳorsoin. 3 Tumrar moe-murobbire ḳani-kuraki na dia ufash raḳla, bade ze ḳani tara sinta na, manna namor ou ḳani ḳaoaia tain tumrar boṛai-beṭagiri bangisoin. Tain tumrare hikaita saila, ḳali ruṭi ḳaileu manush base na, borong Allar forteḳ kalameu manshor zan base. 4 Ou sallish bosoror maze tumrar gotror ḳafoṛ-sufoṛ nosṭo oise na, din-rait aṭileo tumrar fao fulche na. 5 Oḳon tumrar dilo gatia rakio, bafe zela nizor fuare shashon ḳore, tumrar Mabud Allae tumrareo ola shashon ḳoroin.6 “Tumra nizor Mabud Allar hukum-ahkam amol ḳorio, tan fote solio, ar tanre ḍoraio. 7 Tumrar Mabud Allae tumrare ze aramor desho nira, i zagat faṛ-forbot, faṛia gang, fanir zorna ase, ar maṭir toleo fani ase. 8 Hino gom, barli, angur, ḍumur gas, anuar fol, zoetunor tel ar mou ase. 9 Hi desho bout ḳani-fani faibae, kuntar obab tumrar oito nae. Hinor fattoror maze lua ase, honor faṛ kudile tumra tama-fitol faibae. 10 Hou desho feṭ boria ḳana-fina ḳaia harle tumrar Mabud Allar deoa ou aramor deshor lagi tan shukria adae ḳorio.
11 “Ta-o tumra hushiar roio, tumrar Mabud Allare kunu shomoe faurio na, ar ami oḳon tumrare zeta hukum-ahkam, niom-ḳanun, ar shoriot zanairam, ita amol ḳorte kunu gafloti ḳorio na. 12 Hono gia feṭ bori ḳana-fina ḳaia, shundor ḳori gor-baṛi banaia, 13 tumrar goru-sagolor fal boṛo ḳoria, shuna-rufa zomaia, hoḳol monte don-samana baṛia harle hushiar roio. 14 Tumrar dilre boṛai-beṭagiri ḳorte dio na. Ar hou Alla Mabudre faurio na, zein tumrare Mishor desh taki, hou gulami taki bar ḳoria anchoin. 15 Tain to tumrare bezuita bifod-afode bora biraṭ morubumi taki, ḳoṭin bishakto haf, bishakto ḳakṛa-bisae bora fotedi tumrare far ḳori anchoin. shokto fattoror bitor taki tumrar lagi fani bar ḳorsoin. 16 Tain hou morubumir maze tumrare manna ḳabaisoin, zetar nam tumrar moe-murobbi oḳole hunchoino na. Tumrar bitoror boṛai-beṭagiri bangibar lagi, ar tumrare forikka ḳorar nioteu ita ḳorsoin, zate heshe tumrar balai oe. 17 Tumra mone mone ḳoio na, amar nizor bol-shoktie nizor ḳamai dia doni oisi. 18 Oile tumrar nizor Mabud Allae tumrar moe-murobbir gese ḳosom ḳaia zeta oada ḳorsla, ota oḳon furafur ḳorar lagi tumrare i don-samana disoin, erlagi tanre mono rakio.
19 “Tumra zudi kunu din tumrar Mabud Allare faurilao, ar deb-debir fuza ḳorat lago, otar ḳezmot ba bozona ḳoro, te ami oḳon tumrare hushiari diar, tumra nichchit binash oizibae. 20 Tumrar Mabud Allar hukum-ahkam na manle, tumrar samne hou zeta zati oḳolre tain binash ḳorsoin, tumrareo ola binash ḳorba.”